ក្រសួងអភិវឌ្ឍន៍ជនបទ ប្រាប់ឱ្យមន្រី្តចុះពិនិត្យអណ្ដូងនិងស្រះពលរដ្ឋ ដើម្បីដោះស្រាយបញ្ហារាំងស្ងួត

ជាតិ

ក្រសួងអភិវឌ្ឍន៍ជនបទ ប្រាប់ឱ្យមន្រី្តចុះពិនិត្យអណ្ដូងនិងស្រះពលរដ្ឋ ដើម្បីដោះស្រាយបញ្ហារាំងស្ងួត

22, Nov 2019 , 10:19 pm

រូបភាព

ដោយ: ថ្មីៗ

ភ្នំពេញ៖ ក្រសួងអភវិឌ្ឍន៍ជនបទ ប្រាប់ឱ្យមន្ត្រីក្រសួងនៅតាមរាជធានី-ខេត្ត ចុះពិនិត្យអណ្ដូងនិងស្រះរបស់ពលរដ្ឋ ដើម្បីដោះស្រាយបញ្ហារីងស្ងួត ស្របពេលកម្ពុជានឹងជួបបាតុភូតអែលនីណូ ដែលបណ្ដាលឱ្យអាកាសធាតុក្ដៅហួតហែងខ្លាំង។

សេចក្ដីណែនាំរបស់ក្រសួងអភិវឌ្ឍន៍ជនបទ ចុះថ្ងៃទី២២ វិច្ឆិកា ឆ្នាំ២០១៩ បានបញ្ជាក់ដូច្នេះថា៖«អំពាវនាវដល់ប្រធាននាយកដ្ឋាន និងប្រធានមន្ទីរអភិវឌ្ឍន៍ជនបទរាជធានីខេត្ត ត្រូវចុះទៅពិនិត្យអណ្ដូង ស្រះ និងត្រូវទំនាក់ទំនងអាជ្ញាធរមូលដ្ឋាន ដៃគូអភិវឌ្ឍន៍នានា អង្គការជាតិ និងអន្តរជាតិ ដើម្បីឆ្លើយតបភ្លាមៗដល់ពលរដ្ឋដែលកំពុងខ្លះខាតទឹកប្រើប្រាស់»។

ជាមួយគ្នានេះ មន្រី្តរាជធានីខេត្តនៃមន្ទីរអភិវឌ្ឍន៍ជនបទ ត្រូវណែនាំនិងផ្សព្វផ្សាយ ដល់ពលរដ្ឋរស់នៅតាមតំបន់ងាយរងគ្រោះ ដោយសារខ្វះខាតទឹក ឱ្យបង្កើនការថែរក្សាប្រភពទឹកសម្រាប់ប្រើប្រាស់ រួមទាំងប្រើប្រាស់ដោយសន្សំសំចៃ។ ជាពិសេស ត្រូវធ្វើរបាយការណ៍ និងរាយការណ៍ទៅក្រសួងជាប្រចាំ ដើម្បីមានវិធានការបន្ទាន់។

ការអំពាវនាវរបស់ក្រសួងអភិវឌ្ឍន៍ជនបទនេះ ធ្វើឡើងបន្ទាប់ពីរដ្ឋាភិបាលចេញសារាចរណែនាំ នៅថ្ងៃទី២១ វិច្ឆិកា ឱ្យពលរដ្ឋនិងអាជ្ញាធររក្សាទឹកទុកសម្រាប់ប្រើប្រាស់ ដោយសារកម្ពុជាទទួលរងបាតុភូតអែលនីណូ ដែលធ្វើឱ្យរដូវវស្សាមកដល់យឺត៕