ជាតិ
សង្គមជាតិ
អាជ្ញាធរ ប្រាប់ពលរដ្ឋឱ្យវាងផ្លូវ នាថ្ងៃដង្ហែបូជាព្រះសពសម្តេចព្រះរៀម បុប្ផាទេវី
× ភ្នំពេញ៖ រដ្ឋបាលរាជធានីភ្នំពេញ ប្រាប់ពលរដ្ឋដែលធ្វើដំណើរតាមមហាវិថីចំនួន៥ ត្រូវវាងទៅផ្លូវផ្សេង នាថ្ងៃដង្ហែព្រះសពរបស់សម្តេចរាជបុត្រីព្រះរៀម នរោត្តម បុប្ផាទេវី«ទេពនាដវត្តីឯក» ទៅបូជា នៅថ្ងៃ២៥ ខែវិច្ឆិកា។ នេះបើតាមសេចក្ដីជូនដំណឹងរបស់សាលារាជធានីភ្នំពេញ នៅថ្ងៃទី២២ វិច្ឆិកា។
ផ្លូវទាំង៥ដែលអាជ្ញាធររាជធានីភ្នំពេញ ប្រាប់ឱ្យពលរដ្ឋបញ្ចៀសការធ្វើដំណើរបណ្ដោះអាសន្ន នៅព្រឹកថ្ងៃទី២៥ វិច្ឆិកានោះ មានមហាវិថីព្រះសុរាម្រឹត ,មហាវិថីព្រះនរោត្តម ,រង្វង់មូលវិមានឯករាជ្យ ,មហាវិថីព្រះសីហនុ និងមហាវិថីសម្តេចសុធារស ។ នៅពេលការប្រារព្ធពិធីនេះចប់ រដ្ឋបាលរាជធានីភ្នំពេញនឹងបើកឲ្យធ្វើចរាចរណ៍ធម្មតាវិញ។
បើតាមគណៈកម្មាធិការជាតិរៀបចំបុណ្យជាតិ-អន្តរជាតិ ព្រះសពរបស់សម្តេចរាជបុត្រីព្រះរៀម នរោត្តមបុប្ផាទេវី នឹងត្រូវរំកិលឡើងលើទីនាំងរថយន្តបុស្បុក(កងកិត្តិយសថ្វាយព្រះវន្ទនកិច្ច និងភ្លេងក្លងខែកប្រគំ) នាម៉ោង៧ព្រឹក ថ្ងៃទី២៥ វិច្ឆិកា ដោយដង្ហែចេញពីសាលាព្រះធម្មសភា ឆ្ពោះទៅកាន់ និងឡើងព្រះមេរុមុខវត្តបទុមវតី ដើម្បីធ្វើពិធីបូជាព្រះសព «ទេពនាដវដ្តីឯក»។
សូមបញ្ជាក់ថា សម្ដេចរាជបុត្រី ព្រះរៀម នរោត្តម បុប្ផាទេវី បានយាងសោយព្រះពិរាល័យក្នុងព្រះជន្ម ៧៧ព្រះវស្សា កាលវេលាម៉ោង ១២:៣០ នាទី ថ្ងៃទី១៨ ខែវិច្ឆិកា ឆ្នាំ២០១៩ ក្នុងមន្ទីរពេទ្យព្រះរាជាណាចក្រថៃ ដោយជរាពាធ៕
© រក្សាសិទ្ធិដោយ thmeythmey.com