ជាតិ
សង្គមជាតិ
រដ្ឋមន្ត្រីព័ត៌មាន តម្រូវឲ្យអាស៊ីសេរី ឈប់ប្រើពាក្យ «របបក្រុងភ្នំពេញ» បើចង់ដំណើរការឡើងវិញ ជំនួបរវាងលោក ខៀវ កាញារីទ្ធ និង លោក Matthew Pennington (រូបពីក្រសួងព័ត៌មាន)
× ក្នុងជំនួបជាមួយលោក ខៀវ កាញារីទ្ធ រដ្ឋមន្ត្រីក្រសួងព័ត៌មាន កាលពីព្រឹកថ្ងៃទី២២ ខែវិច្ឆិកា ឆ្នាំ២០១៩ លោក Matthew Pennington នាយប្រតិបត្តិវិទ្យុអាស៊ីសេរីប្រចាំតំបន់អាស៊ីអាគ្នេយ៍ បានស្នើសុំឲ្យវិទ្យុអាស៊ីសេរី បានបើកការិយាល័យនៅកម្ពុជាឡើងវិញ។ នេះបើតាមការចុះផ្សាយរបស់គេហទំព័ររបស់ក្រសួងព័ត៌មាន។
លោក ខៀវ កាញារីទ្ធ ឆ្លើយតបថា ក្រសួងព័ត៌មាន ស្វាគមន៍ចំពោះវិទ្យុអាស៊ីសេរី ដែលចង់ត្រឡប់មកបើកការិយាល័យនៅកម្ពុជាឡើងវិញ។ គេហទំព័ររបស់ក្រសួងព័ត៌មាន បានសរសេរពីសម្តីរបស់លោករដ្ឋមន្ត្រី ដូច្នេះថា៖«ដើម្បីបើកដំណើរការការិយាល័យផ្សាយនៅកម្ពុជាឡើងវិញ វិទ្យុអាស៊ីសេរីត្រូវកែតម្រូវការប្រើប្រាស់ពាក្យពេចន៍របស់ខ្លួនក្នុងការផ្សាយ ដូចជា ការប្រើពាក្យថារបបក្រុងភ្នំពេញ ជាដើម»។
ជាមួយគ្នានេះ លោករដ្ឋមន្ត្រី ក៏បានប្រាប់ឲ្យវិទ្យុអាស៊ីសេរី បំពេញលក្ខខណ្ឌផ្លូវច្បាប់ផងដែរ។ លោក រម្លឹកថា កន្លងមក ក្រសួង មិនបានបិទការិយាល័យវិទ្យុអាស៊ីសេរីនោះទេ គឺវិទ្យុនេះ បានសម្រេចបិទដោយខ្លួនឯង។
កាលពីអំឡុងខែកញ្ញា ឆ្នាំ២០១៧ វិទ្យុអាស៊ីសេរី បានសម្រេចផ្អាកដំណើរការការិយាល័យខ្លួននៅភ្នំពេញ ដោយលើកមូលហេតុថា ព្រោះតែមានសម្ពាធពីរដ្ឋាភិបាលកម្ពុជា តែរដ្ឋាភិបាល បកស្រាយតបវិញនាពេលនោះថា វិទ្យុអាស៊ីសេរី ពុំបានបំពេញបែបបទ និងលក្ខខណ្ឌផ្លូវច្បាប់ខ្លួនឯង ដែលតម្រូវឲ្យរដ្ឋាភិបាល ត្រូវចាត់វិធានការ។ បប្ចុប្បន្ន វិទ្យុអាស៊ីសេរី បានផ្សាយតាមបណ្តាញសង្គម ចេញពីរដ្ឋធានីវ៉ាស៊ីនតោនមក។
មិនមែនតែវិទ្យុអាស៊ីសេរីទេ ស្ថាប័នសារព័ត៌មានមួយចំនួនទៀត ដូចជា វីអូអេ និង ខេមបូឌា ដេលី ជាដើម ក៏រងការចំណាត់ការពីរដ្ឋាភិបាលដែរ ក្រោមហេតុផលស្រដៀងគ្នា គឺស្ថាប័នព័ត៌មានទាំងនេះ ដំណើរការដោយមិនបានបំពេញបែបបទត្រឹមត្រូវតាមផ្លូវច្បាប់។ ចំណាត់ការនេះ ធ្វើឲ្យវីអេអេ លែងបានផ្សាយសំឡេងតាមវិទ្យុ ហើយខេមបូឌា ដេលី ត្រូវដកខ្លួនចេញពីកម្ពុជា។ កាលនោះ រដ្ឋាភិបាល តម្រូវឲ្យ ខេមបូឌា ដេលី បង់ពន្ធដល់៦លានដុល្លារ ខេបូឌា ដេលី មិនពុំបានធ្វើតាមឡើយ។
ថ្មីៗនេះ លោក W. Patrick Murphy ឯកអគ្គរដ្ឋទូតអាមេរិកប្រចាំកម្ពុជា បានចូលជួបលោក ខៀវ កាញារីទ្ធ ហើយបានបង្ហាញក្តីសង្ឃឹមថា អាស៊ីសេរី និង វីអូអេ នឹងអាចផ្សាយសំឡេងតាមវិទ្យុនៅកម្ពុជាឡើងវិញ។ លោករដ្ឋមន្ត្រី ប្រាប់ទូតអាមេរិកថា ក្រសួង អនុញ្ញាតឲ្យវីអូអេ ផ្សាយសំឡេងតាមវិទ្យុ តាមរយៈការជួលម៉ោងផ្សាយបន្ត ពីវិទ្យុសំបុកឃ្មុំ និង វិទ្យុ១០២ តែវិទ្យុសំបុកឃ្មុំ និង វិទ្យុ១០២ ត្រូវដាក់សំណើទៅក្រសួង។ ក្នុងជំនួបនោះ លោករដ្ឋមន្ត្រី បង្ហាញការមិនពេញចិត្តដូចគ្នា ចំពោះការប្រើពាក្យរបបក្រុងភ្នំពេញរបស់វិទ្យុអាស៊ីសេរី និងស្នើឲ្យឈប់ប្រើពាក្យនេះ៕
Tag:
ខៀវ កាញារីទ្ធ
VOA
RFA
© រក្សាសិទ្ធិដោយ thmeythmey.com