សម្ដេច ហ៊ុន សែន ប្រាប់ឲ្យពលរដ្ឋធ្វើស្រូវប្រាំងមួយ១ដង ស្របពេលកម្ពុជាប្រឈមជួបគ្រោះរាំងស្ងួត

ជាតិ

សម្ដេច ហ៊ុន សែន ប្រាប់ឲ្យពលរដ្ឋធ្វើស្រូវប្រាំងមួយ១ដង ស្របពេលកម្ពុជាប្រឈមជួបគ្រោះរាំងស្ងួត

23, Nov 2019 , 1:59 pm

រូបភាព

ដោយ: ឡាយ សុភាវតី

ភ្នំពេញ៖ សម្ដេចនាយករដ្ឋមន្ត្រី ហ៊ុន សែន ប្រាប់ឲ្យពលរដ្ឋធ្វើស្រូវប្រាំងមួយ១ដងប៉ុណ្ណោះ ដើម្បីកុំឱ្យខាតបង់ ស្របពេលកម្ពុជា នឹងជួបគ្រោះរាំងស្ងួតនាពេលខាងមុខ។ នេះបើតាមសារាចរណែនាំរបស់រដ្ឋាភិបាល ចុះថ្ងៃទី២១ វិច្ឆិកា ឆ្នាំ ២០១៩។

សារាចររបស់រដ្ឋាភិបាល បានបញ្ជាក់ថា កម្ពុជា បានទទួលរងឥទ្ធិពលបាតុភូត អែលនីណូ បណ្ដាលឲ្យមានភាពក្ដៅហួតហែងខ្លាំង គួបផ្សំរដូវវស្សាមកដល់យឺត ហើយទឹកភ្លៀងមានភាពរអាក់រអួលមិនស្មើគ្នា ដែលធ្វើឱ្យរបបទឹកទន្លេមេគងមានការប្រែប្រួលខ្លាំង ។ ជាពិសេសជំនន់កន្លងមក មានតែមួយលើក ហើយស្រកចុះបន្តបន្ទាប់ដល់កម្រិតទាបបំផុត ដែលមិនធ្លាប់ជួបប្រទះ។

ក្រោយពិនិត្យឃើញស្ថានភាពបែបនេះ សម្ដេច ហ៊ុន សែន សម្រេចចេញសារាចរណែនាំឲ្យពលរដ្ឋធ្វើស្រូវប្រាំងតែ១ដងប៉ុណ្ណោះ ក្នុងឆ្នាំ២០១៩-២០២០ ។ ចំណែកអាជ្ញាធរពាក់ព័ន្ធត្រូវចាត់វិធានការថែរក្សាទឹកទុកប្រើប្រាស់។

សារាចរណែនាំដែលចុះហត្ថលេខាដោយសម្ដេច ហ៊ុន សែន បានសង្កត់ធ្ងន់ដូច្នេះថា៖« ការងារបង្កបង្កើនផលស្រូវប្រាំងឆ្នាំ២០១៩-២០២០ ត្រូវធ្វើតែ១ដងប៉ុណ្ណោះ មិនត្រូវធ្វើស្រូវប្រាំងលើកទី២ បើទោះបីមានទឹកនៅតាមបណ្ដាលអាងដែលរក្សាទុកនិងកន្លែងមួយចំនួនក៏ដោយ។ គួរតែទុកទឹកប្រើប្រាស់ប្រចាំថ្ងៃនិងការដាំដំណាំរួមផ្សំផ្សេងៗទៀត។ លើសពីនេះ គ្រប់អាជ្ញាធរពាក់ព័ន្ធ ត្រូវចាត់វិធានការរក្សាទុក ដើម្បីផ្គត់ផ្គង់សម្រាប់ការប្រើប្រាស់ប្រចាំថ្ងៃ រហូតដល់មានភ្លៀង»។

កាលពីខែកក្កដា ឆ្នាំ២០១៩ បាតុភូត អែល នីណូ បានថយឥទ្ធិពលបណ្ដើរៗ ធ្វើឲ្យអាងទឹករក្សាទឹកទុកបាន១០០ភាគរយ ក្នុងក្របខ័ណ្ឌទូទាំងប្រទេស។ យ៉ាងណាក៏ដោយ បញ្ហាគ្រប់គ្រងនិងប្រើប្រាស់ទឹក ត្រូវតែចាត់ទុកជាអាទិភាព សម្រាប់ស្រូវធ្ងន់ចុងវស្សា និងស្រូវរដូវប្រាំង២០១៩ដល់២០២០ ។ ជាពិសេសការប្រើប្រាស់ប្រចាំថ្ងៃរហូតដល់មានភ្លៀងថ្មី។ នេះបើតាមរដ្ឋាភិបាល៕