កីឡាជាតិ
ជាតិ
ក្រុមប៉េតង់នារីកម្ពុជាទី១ ទទួលបានមេដាយសំរឹទ្ធ ក្រោយចាញ់ឡាវនៅវគ្គ១/២
× ក្រុមកីឡាការិនីប៉េតង់កម្ពុជាទី១ ទទួលបានមេដាយសំរឹទ្ធលើវិញ្ញាសា៣នាក់ទល់៣នាក់ ក្រោយចាញ់ឡាវ ១៣-៦ នៅវគ្គពាក់កណ្តាលផ្តាច់ព្រ័ត្រ នាព្រឹកថ្ងៃទី២៣ វិច្ឆិកា ឆ្នាំ២០១៩ នេះ។ ឡាវ អាចប្រជែងជាមួយថៃ ឬបារាំង ដើម្បីដណ្តើមមេដាយមាសប្រចាំព្រឹត្តិការណ៍ជើងឯកពិភពលោកយុវជន និងស្ត្រី ដែលកម្ពុជាធ្វើជាម្ចាស់ផ្ទះ។
មុនឡើងមកជួបគ្នានៅវគ្គពាក់កណ្តាលផ្តាច់ព្រ័ត្រក្រុមនារីកម្ពុជា១ ដែលមានកីឡាការិនី កែ ឡេង, អ៊ុក ស្រីមុំ, អ៊ុន ស្រីយ៉ា និង កែវ វណ្ណា បានទម្លាក់ក្រុមវៀតណាម ក្នុងលទ្ធផល ១៣-៩ នៅវគ្គ៨ក្រុមចុងក្រោយ ខណៈឡាវ ទម្លាក់ក្រុមនារីកម្ពុជា២ក្នុងលទ្ធផល ១៣-៤។
នេះជាមេដាយសំរឹទ្ធចុងក្រោយរបស់កម្ពុជា បន្ទាប់ពីវីរកីឡាការិនី កែ ឡេង ដណ្តើមបានមេដាយមាសលើវិញ្ញាសាវាយយកពិន្ទុ ក្រោយយកឈ្នះកីឡាការិនីឡាវ Bivilak Thepphakan ក្នុងលទ្ធផល ៣៦-២២ នៅវគ្គផ្តាច់ព្រ័ត្រ នារសៀលថ្ងៃទី២២ វិច្ឆិកា។ ដ្បិតក្រុមយុវជន១ យុវជន២ និងក្រុមកីឡាការិនី២របស់កម្ពុជាសុទ្ធតែបានធ្លាក់ត្រឹមវគ្គ១៦ និង៨ក្រុមចុងក្រោយ។
ក្នុងនោះក្រុមយុវជនទី១បានធ្លាក់នៅវគ្គ១៦ក្រុមចុងក្រោយ(១/៨)ក្រោយចាញ់បែលហ្ស៊ិកក្នុងលទ្ធផល ១៣-៦ រីឯក្រុមយុវជន២ធ្លាក់នៅវគ្គ៨ក្រុមចុងក្រោយ(១/៤)ក្រោយចាញ់អេស្ប៉ាញ ក្នុងលទ្ធផល ១៣-៧។ ចំណែកក្រុមនារីទី២ ដែលមានកីឡាការិនី ស្រ៊ាង សុរ៉ាឃីម, ឃួន យ៉ារី, វង ចន្ថា និង ដួង ឌីណា ធ្លាក់នៅវគ្គ៨ក្រុមចុងក្រោយ បន្ទាប់ពីចាញ់ឡាវ ១៣-៤៕
Tag:
ប៉េតង់
Junior & Women Petanque World Championship
© រក្សាសិទ្ធិដោយ thmeythmey.com