របាយការណ៍ Knight Frank៖ វិស័យ​សំខាន់ៗ​នៃ​ទីផ្សារ​អចលនទ្រព្យ​កម្ពុជា បន្ត​មាន​កំណើន​ប្រសើរឡើង​ក្នុង​ឆ្នាំ​២០១៩
អចលនទ្រព្យ
អត្ថបទពាណិជ្ជកម្ម
របាយការណ៍ Knight Frank៖ វិស័យ​សំខាន់ៗ​នៃ​ទីផ្សារ​អចលនទ្រព្យ​កម្ពុជា បន្ត​មាន​កំណើន​ប្រសើរឡើង​ក្នុង​ឆ្នាំ​២០១៩
24, Nov 2019 , 8:39 am        
រូបភាព
អគារខ្ពស់កំពុងសាងសង់នៅក្នុងរាជធានីភ្នំពេញ
អគារខ្ពស់កំពុងសាងសង់នៅក្នុងរាជធានីភ្នំពេញ
ដោយ: ថ្មីៗ
​យោងតាម​របាយការណ៍​របស់​ធនាគារអភិវឌ្ឍន៍អាស៊ី និង​ធនាគារជាតិ​នៃ​កម្ពុជា ប្រទេស​កម្ពុជា ត្រូវបាន​គេ​ស្គាល់​ថា​ជា​ប្រទេស​ដែលមាន​កំណើនសេដ្ឋកិច្ច​ខ្ពស់ ជាមួយនឹង​អត្រា​ប្រមាណ ៧% ប្រចាំឆ្នាំ​។ កំណើន​ដ៏​ខ្ពស់​នេះ កើតឡើង​ដោយសារតែ​ការគាំទ្រ​ពី​វិស័យ​ចំនួន ៣ សំខាន់ៗ គឺ​វិស័យ​សំណង់ វិស័យ​អចលនទ្រព្យ និង​វិស័យ​ទេសចរណ៍​។ ស្របពេល​នោះដែរ វិស័យ​កសិកម្ម​បាន ចូលរួមចំណែក​មួយផ្នែក ប៉ុន្តែ​ហាក់​បាន​ថយចុះ​។
 
​នៅ​ដើមឆ្នាំ​២០១៩ ទុនវិនិយោគ​មានតម្លៃ ៥.២ លាន​ដុល្លារ បាន​ហូរ​ចូល​ប្រទេស​កម្ពុជា​។ ប៉ុន្តែ​ភាពមិនច្បាស់លាស់​នៃ​ប្រព័ន្ធ​អនុគ្រោះ​ពន្ធ EBA បានធ្វើ​ឲ្យ​មានការ​ព្រួយបារម្ភ សម្រាប់​កម្ពុជា​។ ទោះជា​យ៉ាងណាក៏ដោយ បើតាម​សមាគម​រោងចក្រ​កាត់ដេរ​កម្ពុជា រោងចក្រ​ថ្មី​ចំនួន ៣៤ បាន​បើក​ដំណើរការ នៅ​ពាក់កណ្តាល​ឆ្នាំ​២០១៩ ប៉ុន្តែ​មាន​រោងចក្រ​ចំនួន​១០ បាន​បិទ​។ នេះ​ជា​អ្វីដែល​បានលើកឡើង នៅក្នុង​របាយការណ៍រ​បស់​ក្រុមហ៊ុន Knight Frank​។ 
 
Knight Frank បាន​បញ្ចេញ​របាយការណ៍​ឆមាស​ទី​១ ឆ្នាំ​២០១៩ ស្ដីពី​ស្ថានភាព​នៃ​ទីផ្សារ​អចលនទ្រព្យ​កម្ពុជា ដោយ​ផ្តោតលើ​តំបន់​សំខាន់ៗ ចំនួន​បី គឺ​ភ្នំពេញ ក្រុងព្រះសីហនុ និង​សៀមរាប​។ របាយការណ៍​បានបង្ហាញ​ពី​កំណើន​ប្រសើរឡើង សម្រាប់​វិស័យ​នីមួយៗ ធៀប​ទៅនឹង​ឆ្នាំ​កន្លងទៅ​។ ខាងក្រោម​នេះ គឺជា​ចំណុច​សំខាន់ៗ​មួយចំនួន ដែល​បានបង្ហាញ​នៅក្នុង​របាយការណ៍ របស់​ក្រុមហ៊ុន Knight Frank ក្នុងនោះ​ពាក់ព័ន្ធ​នឹង​វិស័យ​ការិយាល័យ វិស័យ​លក់រាយ វិស័យ​សណ្ឋាគារ វិស័យ​អា​ផាត​មិន វិស័យ​ខុន​ដូ បុរី និង​វិស័យ​ឧស្សាហកម្ម​។
 
១. វិស័យ​ការិយាល័យ​
 


 (​គម្រោង​មជ្ឈមណ្ឌល​ព្រី​ន​ហ័ន​យូ​)
 
​នៅក្នុង​ទីក្រុង​ភ្នំពេញ ការផ្គត់ផ្គង់​ការិយាល័យ​ត្រូវបាន​មើលឃើញថា មានការ​កើនឡើង​ចំនួន ១១% ចាប់តាំងពី​ចុងឆ្នាំ​២០១៨ ដោយមាន​ការបញ្ចប់​គ​ម្រោ​ង​មួយចំនួន ដូចជា Diamond Twin, Tower, Elysee Tower and Prince Holding ដែលមាន​ទម្រង់​ជា​សហកម្មសិទ្ធិ និង​ផ្តាច់មុខ​។ ភាគច្រើន​នៃ​គម្រោង​ទាំងអស់នេះ ស្ថិតនៅក្នុង​កម្រិត​B និង C ប៉ុន្តែ​សម្រាប់​កម្រិត A គេ​មិនឃើញ​មាន​គម្រោង​អ្វី ក្នុង​ដើមឆ្នាំ​២០១៩​នេះ​ទេ​។ ជាក់ស្តែង ការិយាល័យ​កម្រិត B មាន​អត្រា​ចំនួន ៤៥% ហើយ C មាន​អត្រា ៤៣% ស្រប​ពេលដែល​កម្រិត A មាន​ត្រឹមតែ ១២% ប៉ុណ្ណោះ​។  មិនតែប៉ុណ្ណោះ គេ​ក៏​រំពឹងថា​មាន​គម្រោង​ចំនួន ៤ ផ្សេងទៀត ដែល​នឹង​បញ្ចប់​នៅក្រោយ​ឆ្នាំ​២០២១ ដូចជា Flatiron By Meridian, Golden Tower 322, Prince Haon Yu Centre និង​គម្រោង Prince Financial Tower​។​
 
​លើសពីនេះទៅទៀត ការកាន់កាប់​បែរជា​មានការ​ធ្លាក់ចុះ សម្រាប់​កម្រិត B និង C ទៅវិញ ប៉ុន្តែ​សម្រាប់​កម្រិត A អត្រា​នៃ​ការកាន់កាប់ មានការ​កើនឡើង​ចំនួន ៣.៣% បើ​ប្រៀបធៀប​ទៅនឹង​ដើមឆ្នាំ​២០១៨​។ ទោះបីជា​យ៉ាងណាក៏ដោយ តម្លៃ​នៃ​ការិយាល័យ​កម្រិត​ទាំង ៣ នេះ មិនមាន​ការប្រែប្រួល​ច្រើន​នោះទេ​។ សម្រាប់​កម្រិត A តម្លៃ​ចាប់ពី ២៨ ដុល្លារ ទៅ ៤០ ដុល្លារ ក្នុង​មួយ​ម៉ែត្រការ៉េ​។ សម្រាប់​កម្រិត B ចាប់ពី ១៨ ដុល្លារ​ទៅ ២៩ ដុល្លារ​ក្នុង​មួយ​ម៉ែត្រការ៉េ និង​សម្រាប់​កម្រិត C ចាប់ពី ៩ ដុល្លារ​ទៅ ១៨ ដុល្លារ​។​
 
២. វិស័យ​លក់រាយ​



 (​គម្រោង​ផ្សារ​ទំនើប​អូ​ឡាំ​ព្យា​)
 
​នៅ​ទីក្រុង​ភ្នំពេញ ការផ្គត់ផ្គង់ មានការ​កើនឡើង​ដោយសារតែ​ការបញ្ចប់​ការសាងសង់​ផ្សារ​ទំនើប​មួយចំនួន ដូចជា​ផ្សារ​អូ​ឡាំ​ព្យា ដែល​ស្ថិតនៅ​ទីប្រជុំជន​នៃ​ទីក្រុង​ភ្នំពេញ ផ្សារ​មី​ត​ថោ​ន និង WB Arena​។ នៅក្នុង​ផ្សារ​អូ​ឡាំ​ព្យា ការលក់​លើ​ភេសជ្ជៈ​មានការ​កើនឡើង​ចំនួន ៤០% ហើយ​ការផ្តល់សេវា​បែប​កម្សាន្ត​មាន​ចំនួន ៣៥% ។ ជាមួយនឹង​គម្រោង​ជាច្រើន​ទៀត​ដូចជា​គម្រោង​របស់ ជីបម៉ុង គ្រុប ដែល​មិនទាន់​បានបញ្ចប់ ការផ្គត់ផ្គង់​នឹង​កើនឡើង​ខ្លាំង​នៅ​ឆ្នាំ​២០២១ ចំនួន ១៤៩% ។​
 
​គម្រោង​អ៊ី​អន​៣ ក៏​ជា​គម្រោង​មួយ ដែល​ធ្វើ​ឲ្យ​មានការ​កើនឡើង​ជា​បន្ត​បន្ទាប់ សម្រាប់​ឆ្នាំ ២០២៣ ផងដែរ​។ ប៉ុន្តែ​សម្រាប់​ការកាន់កាប់​នៅក្នុង​ផ្សារ​ទំនើប​វិញ (Occupancy Rate for Shopping Mall) គេ​សង្កេតឃើញ​ការធ្លាក់ចុះ ចំនួន ៨.១% ចាប់តាំងពី​ចុងឆ្នាំ ២០១៨ មក​ត្រឹម ៨០.៨% នៅក្នុង​ដើមឆ្នាំ​២០១៩​។ ការធ្លាក់ចុះ​នេះ ក៏ត្រូវ​បាន​គេ​មើលឃើញ​នៅក្នុង​ផ្សារ​លក់រាយ​ថ្នាក់ខ្ពស់ (Occupancy Rate of Prime Retail Malls) និង​ការកាន់កាប់​ផ្សារ​លំដាប់ថ្នាក់​ទី​២ (Secondary Mall’s Occupancy)​។ ចំពោះ​តម្លៃ​វិញ ហាក់ដូច​ជាមាន​សភាព​ថេរ​ច្រើន ដោយ​ក្នុង​មួយ​ម៉ែត្រការ៉េ តម្លៃ ៣១ ដុល្លារ ទៅ ៤០ ដុល្លារ ចំពោះ​ផ្សារ​ថ្នាក់ខ្ពស់ (Prime Shopping Centre) និង ២១ ដុល្លារ ទៅ ៣១.៥០ ដុល្លារ ចំពោះ​ផ្សារ​ថ្នាក់​ទី​២​។ ជារួម​វិស័យនេះ ហាក់ដូច​ជាមាន​សញ្ញា​វិជ្ជមាន​ច្រើន ស្រប​ពេលដែល​ចំណូល​កើនឡើង និង​កំណើន​ចំនួន​យុវជន​។​
 
​ចំណែកឯ​នៅ​ខេត្ត​ព្រះសីហនុ​វិញ ការផ្គត់ផ្គង់​នៅក្នុង​ផ្នែក​វិស័យ​លក់រាយ​នេះ មាន​កំណើន​ខ្ពស់ ហួស​ពី​ការ​ស្មាន ដោយសារតែ​កំណើន​ភ្ញៀវទេសចរ​។ កត្តា​នេះ បាន​ជំរុញ​ឲ្យ​មានការ​កើនឡើង នៃ​តម្រូវការ​កាន់តែច្រើន​ចំពោះ​វិស័យ​លក់រាយ និង​ការកើនឡើង នៃ​ទំនិញ​ស្តង់ដា​អន្តរជាតិ​។ ជាក់ស្តែង​គម្រោង Furi Time Square Mall បានចាប់ផ្តើម​សាងសង់ នៅ​ពាក់កណ្តាល​ឆមាស​ទី​២ ឆ្នាំ​២០១៨ ដេ​ល​រំពឹងថា នឹង​បញ្ចប់​ការសាងសង់​នៅ​ចុងឆ្នាំ​២០១៩ ។ ហើយ​ការសាងសង់​នេះ នឹង​ផ្តល់​កន្លែង​សម្រាប់​វិស័យ​លក់រាយ​ចំនួន ១២,០០០ ម៉ែត្រការ៉េ​។ ក្រៅពី​គម្រោង​នេះ គេ​នៅមាន​គម្រោង​ផ្សេងៗ​ជាច្រើន​ទៀត ដែល​កំពុងតែ​ចាប់ផ្តើម​ផងដែរ​។ ប៉ុន្តែ​យោងតាម​ការស្រាវជ្រាវ  ចំនួន​ភ្ញៀវទេសចរ និង​ចំនួន​ប្រជាពលរដ្ឋ​នៅ​តំបន់​នោះ មិនអាច​ទ្រទ្រង់​វិស័យនេះ បានទេ​នៅ​ឆ្នាំ​បន្ទាប់​។​
 
​ងាក​មក​មើល​ស្ថានភាព​នៅ​ខេត្តសៀមរាប​វិញ ការផ្គត់ផ្គង់​ក្នុង​វិស័យ​លក់រាយ​នេះ ហាក់ដូចជា​មិនមាន​អ្វី​លេចធ្លោ​ជា​ដុំកំភួន​ទេ ប៉ុន្តែ​ការសាងសង់​សំណង់ សម្រាប់​ផ្គត់ផ្គង់​នៅតែ​ឃើញ​មានការ​កើនឡើង​។ ជាទូទៅ នៅ​តំបន់​នោះ គេ​ច្រើនតែ​ឃើញ​មាន​ផ្សារ លក្ខណៈ​ប្រពៃណី ដែលមាន​លក់​វត្ថុ​អនុស្សាវរីយ៍​ផ្សេងៗ ដែលជា​តម្រូវការ​រប​ស់​ភ្ញៀវទេសចរ​។ ផ្សារ​ទំនើប​ដែល​សាងសង់​ដំបូង​គេ នៅ​ខេត្តសៀមរាប គឺ The Heritage Walk ដែល​បញ្ចប់​ការសាងសង់​នៅ​ពាក់កណ្តាល​ឆមាស​ទី​២ នៃ​ឆ្នាំ​២០១៨​។ គេ​នៅ​ឃើញ​មាន​ផ្សារ​ម៉ាក្រូ ដែល​វិនិយោគ​ដោយ​ជនជាតិ​ថៃ ក៏បាន​បើក​ដំណើរការ ហើយ​គម្រោង​ផ្សេងៗ​ទៀត នៅតែ​កើត ជា​បន្តបន្ទាប់​ដែរ​។ វិស័យ​លក់រាយ​នៅ​ខេត្តសៀមរាប​នេះ ពឹងផ្អែក​ភាគច្រើន​លើ​តម្រូវការ​ភ្ញៀវទេសចរ នៅ​តំបន់​នោះ​។​
 
៣. វិស័យ​សណ្ឋាគារ​



 (​សណ្ឋាគារ​នៅក្នុង​ខេត្ត​ព្រះសីហនុ​)
 
​យោងតាម​ការសិក្សា​ស្រាវជ្រាវ សម្រាប់​វិស័យ​សណ្ឋាគារ​នៅក្នុង​ទីក្រុង​ភ្នំពេញ​វិញ សណ្ឋាគារ​ជាច្រើន ត្រូវបាន​បន្ត​សាងសង់ និង​បើក​ឲ្យ​ដំណើរការ ស្រប​ពេលដែល​ភ្ញៀវទេសចរ​បរទេស ជាពិសេស​ជនជាតិ​ចិន ធ្វើដំណើរ​មកកាន់​កម្ពុ​ជា​។ ការកើនឡើង​នេះ មាន​ចំនួន ៧.៥% នៅ​រវាង​ពាក់កណ្តាល​ឆមាស​ទី​១ នៃ​ឆ្នាំ​២០១៨ និង​ពាក់កណ្តាល​ឆមាស​ទី​១ នៃ​ឆ្នាំ​២០១៩​។ គេ​រំពឹងថា វិស័យនេះ​នឹង​កើន​ឡើងជា​បន្ត គឺ​រហូតដល់ ៤០% សម្រាប់​ប្រភេទ​សណ្ឋាគារ​ផ្កាយ​៥ និង ៣៨% សម្រាប់​ប្រភេទ​សណ្ឋាគារ​ផ្កាយ​៤ នៅ​ពាក់កណ្តាល​ឆមាស​ទី​២ នៃ​ឆ្នាំ​២០១៩ និង​ឆ្នាំ​២០២១​។​
 
​ចំនួន​ភ្ញៀវទេសចរ នៅ​ខេត្ត​ព្រះសីហនុ មានការ​កើនឡើង​ខ្លាំង ដោយសារតែ​ការទាក់ទាញ​ផ្នែក​ទេសចរណ៍ និង​កំណើន​នៃ​ជើងហោះហើរ​ត្រង់ ពី​ប្រទេស​ចិន ទៅកាន់​ត​ខេត្ត​នេះ​។ កំណើន​ភ្ញៀវទេសចរ​នេះ បានធ្វើ​ឲ្យ​ចំនួន​សណ្ឋាគារ​មានការ​កើនឡើង ចំនួន ៦៩% នៅ​ពាក់កណ្តាល​ឆមាស​ទី​១ នៃ​ឆ្នាំ​២០១៩​។ ប្រភេទ​សណ្ឋាគារ​ផ្កាយ​៥ មានការ​កើនឡើង​ចំនួន​១៧% ផ្កាយ ៤ ចំនួន ៣៩% និង​ផ្កាយ ៣ ចំនួន ៣៤% ក្នុង​ចន្លោះ​ពាក់កណ្តាល​ឆមាស​ទី​២ ឆ្នាំ​២០១៨ និង​ពាក់កណ្តាល​ឆមាស​ទី​១ ឆ្នាំ​២០១៩​។ ជាការ​រំពឹងទុក វិស័យ​សណ្ឋាគារ​នឹងមាន​ការកើនឡើង​បន្ថែម នៅក្នុង​ពាក់កណ្តាល​ឆមាស​ទី​២​ឆ្នាំ​២០១៩ ដល់​ក្រោយ​ឆ្នាំ​២០២១ ដោយ​សណ្ឋាគារ​ផ្កាយ​៥ មានការ​កើនឡើង​៣២% ផ្កាយ​៤ ចំនួន​៤៦% និង​ផ្កាយ​៣ ចំនួន​២២%​។​
 
​ចំណែកឯ​ស្ថានភាព​សណ្ឋាគារ​នៅក្នុង​ខេត្តសៀមរាប​វិញ វា​មាន​សភាព​ប្រកួតប្រជែង​ខ្លាំង​ជាង​ខេត្ត​ផ្សេងៗ ដោយសារតែ​សៀមរាប គឺជា​តំបន់​ទេសចរណ៍​។ សណ្ឋាគារ​បើក​ថ្មី និង​បិទ​ទៅវិញ​មាន​ជា​រៀងរាល់ខែ ប៉ុន្តែ​ប្រភេទ​សណ្ឋាគារ ដែលមាន​ការផ្គត់ផ្គង់​ច្រើន​នៅក្នុង​ទីផ្សារ​នោះ​គឺ​សណ្ឋាគារ​ប៊ូ​ទិ​ក​ទំហំ​តូច​។ ការផ្គត់ផ្គង់​ចំនួន ៦៣% គឺជា​សណ្ឋាគារ​ផ្កាយ​៤ សណ្ឋាគារ​ផ្កាយ​៥ មាន​ចំនួន ២៣% និង​ផ្កាយ ៣ ចំនួន ១៤%​។ ទោះបីជា​យ៉ាងណា គេ​នៅតែ​រំពឹងថា​មានការ​កើនឡើង​បន្ត នៅ​ឆ្នាំ​បន្តបន្ទាប់​ផងដែរ ដោយ​សណ្ឋាគារ​ផ្កាយ​៥ មាន​ចំនួន​៥៨% និង​ផ្កាយ​៤ ចំនួន​៤២% នៅ​ថ្ងៃ​អនាគត​។​
 
៤. វិស័យ​អា​ផាត​មិន​
 


 (​ទិដ្ឋភាព​គម្រោង​ធំៗ​កំពុង​សាងសង់ នៅក្នុង​ខេត្ត​ព្រះសីហនុ )
 
​វិស័យ​អា​ផាត​មិន បានបង្ហាញ​ឲ្យ​ឃើញ​មាន​កំណើន​នៅក្នុង​ទីក្រុង​ភ្នំពេញ​។ ជាក់ស្តែង គម្រោង​ចំនួន​៥ បានបញ្ចប់ និង​បើក​ឲ្យ​ដំណើរការ​នៅ​ពាក់កណ្តាល​ឆមាស​ទី​១ នៅ​ឆ្នាំ​២០១៩​នេះ ដូចជា Monorom Apartment, Alpha Residence, Champs Elysees Apartment Khiev, Precious Serviced Apartment and Central Town​។ នៅក្នុង​ទីផ្សារ​ទីក្រុង​ភ្នំពេញ ប្រភេទ Mid-tier គ្រប់គ្រង​ទីផ្សារ​ចំនួន ៥៧% ប្រភេទ Affordable មាន​ចំនួន ២២% និង​ប្រភេទ High-end មាន​ចំនួន​២១%​។ 
 
​មូលហេតុ​ដែល​ធ្វើ​ឲ្យ​ទីផ្សារ​អា​ផាត មិនមាន​ការប្រកួតប្រជែង​ដោយសារតែ​ចំណូល​របស់​ប្រជាពលរដ្ឋ​ចិន ដែល​មកកាន់​ប្រទេស​កម្ពុជា​។ ចំណែក​តម្លៃ​នៃ​អា​ផាត​មិន មាន​លក្ខណៈ​ថេរ ដោយ​ប្រភេទ Affordable មានតម្លៃ ៧ ដុល្លារ ក្នុង​មួយ​ម៉ែត្រការ៉េ ក្នុង​រយៈពេល ១ ខែ ប្រភេទ Mid-tier មានតម្លៃ ១៣ ដុល្លារ និង​ប្រភេទ High-end មានតម្លៃ ២៣ ដុល្លារ​។ ចំពោះ​ការកាន់កាប់ នៅក្នុង​ពាក់កណ្តាល​ឆមាស​ដំបូង នៃ​ឆ្នាំ​២០១៩​នេះ មានការ​កើនឡើង​ចំនួន ៧៤ ដុល្លារ​។​
 
 ចំណែកឯ​នៅ​ខេត្តសៀមរាប​វិញ ដោយសារតែ​កម្រិត នៃ​ការវិនិយោគ​មាន​ទំហំ​តូច ការអភិវឌ្ឍ​ខុន​ដូ មិនមាន​វត្តមាន​នោះទេ​។ ប៉ុន្តែ​ផ្ទះសំណាក់ វីឡា ផ្ទះល្វែង អា​ផាត​មិន និង​ផ្ទះ​អាជីវកម្ម គ្រប់គ្រង​ទីផ្សារ នៅ​ខេត្តសៀមរាប​។ គម្រោង​ទាំងនោះ មានដូចជា Borey Tourism City, Urban Living Solution, និង Bakong Village​។​
 
៥. វិស័យ​ខុន​ដូ​
 


 (​គម្រោង​អគារ​ខ្ពស់ៗ​នៅ​តំបន់​ចំការមន រាជធានី​ភ្នំពេញ​)
 
​ការផ្គត់ផ្គង់ នៃ​វិស័យ​ខុន​ដូ នៅក្នុង​ទីផ្សារ​ភ្នំពេញ មានការ​កើនឡើង​នៅ​ពាក់កណ្តាល​ទី​១ ឆ្នាំ​២០១៩ ដោយសារតែ​គម្រោង​ចំនួន​៦ បានបញ្ចប់ ហើយ​គម្រោង​ទាំង ៦ នេះ បាន​បន្ថែម​ការផ្គត់ផ្គង់​ចំនួន ១,៥១៨ យូ​នី​ត​។ គេ​នៅ​សង្កេតឃើញ​គម្រោង​ចំនួន ១៦ ផ្សេងទៀត ដែល​នឹង​បើក​ឲ្យ​ដំណើរការ ដែលមាន​ដូចជា Phnom Penh Star (៤៤៨​យូ​នី​ត​) Royal Park(២៩៣​យូ​នី​ត​) Royal Platinum Condominium (៨៥១​យូ​នី​ត HCN Mall and Residence (៦៤០​យូ​នី​ត​) និង​Agile Sky Residence (៩៦៣​យូ​នី​ត​)​។ ចំណែកឯ​គម្រោង​១១ ផ្សេងទៀត មានការ​ដាក់​ឲ្យ​ដំណើរការ នៅ​ជាយក្រុង​។ លើសពីនេះទៅទៀត តម្លៃ​នៃ​ការលក់ បង្ហាញ​ឲ្យ​ឃើញ​ការកើនឡើង​តិចតួច​ផងដែរ​។​
 
​ចំណែកឯ នៅក្នុង​ខេត្តសៀមរាប​វិញ ដោយសារតែ​ការកើនឡើង​ចំនួន​ជនជាតិ​ចិន បានធ្វើ​ឲ្យ​វិស័យ​ខុន​ដូ​នេះ រីកដុះដាល​យ៉ាងខ្លាំង​។ ជាក់ស្តែង ខុន​ដូ​ជាច្រើន កំពុងតែ​ដំណើរការ​សាងសង់ នៅ​ពាក់កណ្តាល​ឆមាស​ទី​១ ឆ្នាំ​២០១៩ ហើយ​គេ​រំពឹងថា នឹង​បញ្ចប់​នៅ​ពាក់កណ្តាល​ឆមាស​ទី​២ ឆ្នាំ​២០១៩ និង​ក្រោយ​ឆ្នាំ​២០២១​។ គម្រោង​ចំនួន ១៨  គឺមាន​ទំហំ​ធំ ដែលមាន​៧១% ជា​ប្រភេទ High-end និង​២០% ជា​ប្រភេទ​Mid-tier​។ នៅក្រោយ​ឆ្នាំ​២០២១ ប្រសិនបើ​គម្រោង​ដែល​រំពឹងទុក​នោះ បញ្ចប់​ការសាងសង់ ការផ្គត់ផ្គង់​នឹង​ឡើង​រហូតដល់ ១៨,៥៣៤ យូ​នី​ត ដែល​ឡើង​រហូតដល់ ១៦៩% ចាប់តាំងពី​ឆ្នាំ​២០១៨​។​
 
៦. ផ្ទះ​បុរី​
​ទីផ្សារ​ផ្ទះ​បុរី នៅ​ទីក្រុង​ភ្នំពេញ មាន​ចំនួន​កើនឡើង នៅ​ពាក់កណ្តាល​ដំបូង នៃ​ឆ្នាំ​២០១៩ ដែលមាន​ចំនួន ៥១,២៧៨ យូ​នី​ត ត្រូវជា ១៣១ គម្រោង ពោលគឺ​កើនឡើង ១១% ពី​ពាក់កណ្តាល​ទី​២ ឆ្នាំ​២០១៨​។ ជាទូទៅ ផ្ទះ​បុរី ច្រើនតែ​ស្ថិតនៅ​ជាយក្រុង ដែលមាន​ចំនួន ៩៦% ហើយ​មាន​ត្រឹមតែ ៤%​ប៉ុណ្ណោះ ដែល​ស្ថិតនៅក្នុង​ទីក្រុង​ភ្នំពេញ​។ ទីតាំង​ពេញនិយម​របស់​ផ្ទះ​បុរី​នេះ មាន​លក្ខណៈ​ផ្ទុយ​ពី​ខុន​ដូ ដែល​ភាគច្រើន​ស្ថិតនៅក្នុង​ទីក្រុង ជាជាង​ជាយក្រុង​។ តាម​ការស្រាវជ្រាវ គេ​ឃើញ​មាន​គម្រោង​ថ្មីៗ​ជាច្រើន​ទៀត ដែល​កំពុងតែ​ដំណើរការ​។ ពាក់ព័ន្ធ​នឹង​តម្លៃ​ផ្ទះ​បុរី ដែលជា​ប្រភេទ Mid-tier វិញ តម្លៃ​ចាប់ពី ៨០១ ដុល្លារ ទៅ ១,៧០០ ដុល្លារ​ក្នុង​មួយ​ម៉ែត្រការ៉េ ហើយ​ប្រភេទ High-end មានតម្លៃ​ចាប់ពី ១,៧០១ ដុល្លារ​ក្នុង​មួយ​ម៉ែត្រការ៉េ​ឡើងទៅ​។ ចំណែកឯ​ផ្ទះ​បុរី Affordable វិញ មានតម្លៃ​ក្រោម ៨០១ ដុល្លារ ក្នុង​មួយ​ម៉ែត្រការ៉េ​។​
 
៧. វិស័យ​ឧស្សាហកម្ម​
​នៅ​ខេត្ត​ព្រះសីហនុ វិស័យ​ឧស្សាហកម្ម បាន​កំពុង​ក្លាយជា​វិស័យ​អាទិភាព នៃ​ខេត្ត​ព្រះសីហនុ ដោយ​ភ្ជាប់​ជាមួយនឹង​ខេត្ត​ស៊ិន​ជិន ប្រទេស​ចិន​។ ប្រទេស​កម្ពុជា ព្យាយាម​ទាក់ទាញ​ការវិនិយោគទុន​ពី​ក្រៅប្រទេស  ជាពិសេស​ប្រទេស​ចិន ហើយ​វិស័យ​ដែល​កំពុងតែ​ដំណើរការ មានដូចជា វាយនភ័ណ្ឌ ដេរ​ស្បែកជើង រោងចក្រ​ស្រា​បៀ ហាដវែ រោងចក្រ​ម៉ាស៊ីន និង​រោងចក្រ​សំណង់​៕
 
 
(​អត្ថបទ​ពាណិជ្ជកម្ម​)

© រក្សាសិទ្ធិដោយ thmeythmey.com