កីឡាអន្តរជាតិ
អន្តរជាតិ
ស៊ីហ្គេម៖ ក្រុមបាល់ទាត់ក្នុងពូលជាមួយហ្វីលីពីន សុទ្ធតែជួបបញ្ហាតាំងពីព្រលានយន្តហោះ
×![]()
ដោយ: តន ចាន់រិទ្ធារ៉ា
ក្រុមកីឡាបាល់ទាត់ជម្រើសចំនួន៤ ប្រទេស ដែលត្រូវចូលរួមប្រកួតកីឡាស៊ីហ្គេមនៅហ្វីលីពីន បានជួបបញ្ហាបន្តបន្ទាប់ពេលទៅដល់ហ្វីលីពីន។ បញ្ហាផ្នែកបដិសណ្ឋារកិច្ច ធ្វើឲ្យហ្វីលីពីនរងការរិះគន់យ៉ាងខ្លាំង។
ក្រុមកីឡាបាល់ទាត់ជម្រើសកម្ពុជា ទីម័រខាងកើត ថៃ និងមីយ៉ាន់ម៉ា សុទ្ធតែជួបបញ្ហាទាំងអស់បន្ទាប់ពីទៅដល់ទឹកដីហ្វីលីពីននៅថ្ងៃទី២៣ ខែវិច្ឆិកាដើម្បីប្រកួតលើវិញ្ញាសាបុរស។ ក្រុមជម្រើសទីម័រខាងកើត ត្រូវរង់ចាំនៅព្រលានយន្តហោះជិតបីម៉ោង មុននឹងឡានរបស់ពួកគេមកដល់។ កាន់តែហួសចិត្តនោះ ឡានដឹកកីឡាករទីម័រ ទៅខុសសណ្ឋាគារទៅទៀត។ នេះបើតាមការផ្សាយរបស់សារព័ត៌មានហ្វីលីពីន Manila Bulletin ។
ចំណែកក្រុមជម្រើសជាតិកម្ពុជា ដែលត្រូវប្រកួតបើកឆាកជាមួយហ្វីលីពីននៅថ្ងៃទី២៥ ខែវិច្ឆិកា ក៏ជួបបញ្ហាពេលទៅដល់ដែរ។ ខុសពីទីម័រ ក្រុមកម្ពុជា ត្រូវរង់ចាំយ៉ាងយូរនៅឯសណ្ឋាគារ មុននឹងអាចចូលក្នុងបន្ទប់សម្រាកបាន។ ក្នុងរូបភាពដែលផ្សាយដោយ Manila Bulletin កីឡាករកម្ពុជា បានដេកលើកម្រាលនៃសណ្ឋាគាររបស់ពួកគេ ដើម្បីចាំចូលបន្ទប់សម្រាក។
ឯក្រុមមីយ៉ាន់ម៉ាវិញ បានត្អូញត្អែរពីការរង់ចាំយូរនៅព្រលានយន្តហោះ Ninoy Aquino ។ មីយ៉ាន់ម៉ាក៏មិនពេញចិត្តរថយន្តដឹកកីឡាករដែលមានទំហំតូច ពិបាកដល់កីឡាករពួកគេ។
ម្ចាស់ការពារមេដាយមាសដំរីសឹកថៃវិញ ក៏ប្រទះបញ្ហាដែរ។ បើតាម Rappler ក្រុមថៃត្អូញត្អែរពីការខ្វះខាតបន្ទប់ ដែលបង្ខំឲ្យកីឡាករពួកគេបីនាក់ត្រូវសម្រាកក្នុងបន្ទប់សម្រាប់មនុស្សពីរនាក់។ ថៃក៏ត្រូវបង្ខំចិត្តលុបចោលការហ្វឹកហាត់របស់ខ្លួនផងដែរ ព្រោះទីលានហ្វឹកហាត់នៅចម្ងាយដល់ទៅ៣៨គីឡូម៉ែត្រពីសណ្ឋាគារ។ ចម្ងាយនេះ គេត្រូវចំណាយពេលធ្វើដំណើរយ៉ាងហោចណាស់ក៏ពីរម៉ោងដែរ។ ជំនួសមកវិញ កីឡាករថៃត្រូវហ្វឹកហាត់នៅក្បែរសណ្ឋាគារពួកគេ។
វិញ្ញាសាកីឡាបាល់ទាត់ នឹងចាប់ផ្ដើមនៅថ្ងៃទី២៥ ខែវិច្ឆិកានៅកីឡដ្ឋាន Rizal Memorial Complex ។ មកទល់ពេលនេះ កីឡដ្ឋាននេះ ស្ថិតក្រោមការកែលម្អនៅឡើយ៕
Tag:
ហ្វីលីពីន
SEA Games
© រក្សាសិទ្ធិដោយ thmeythmey.com
