អន្តរជាតិ
ហុងកុង៖ ក្រុមប្រជាធិបតេយ្យ ផ្ដួលក្រុមប៉េកាំងក្នុងការបោះឆ្នោតក្រុមប្រឹក្សាស្រុក អ្នកគាំទ្រអបអរក្រោយលទ្ធផលបង្ហាញថា បេក្ខជនប្រជាធិបតេយ្យទទួលបានសំឡេងច្រើនក្នុងការបោះឆ្នោតជ្រើសរើសក្រុមប្រឹក្សាស្រុកនៅហុងកុង។ រូបភាព AFP
× នៅហុងកុងបេក្ខជនមាននិន្នាការរកប្រជាធិបតេយ្យ បានទទួលសំឡេងច្រើនលើសលុបក្នុងការបោះឆ្នោតជ្រើសរើសសមាជិកក្រុមប្រឹក្សាស្រុក ដែលធ្វើឡើងនៅថ្ងៃទី២៤ ខែវិច្ឆិកា។ ជ័យជម្នះនេះ ជាសារដ៏ម៉ឺងម៉ាត់មួយទៅកាន់រដ្ឋាភិបាលប្រធានប្រតិបត្តិ ការី ឡាំ និងអ្នកនយោបាយគាំទ្រទីក្រុងប៉េកាំង។ អ្នកនយោបាយប្រជាធិបតេយ្យខ្លះទៀត យល់ថា លទ្ធផលនេះ ជាការគាំទ្រចលនាបាតុកម្មដែលអុកឡុកទីក្រុងហិរញ្ញវត្ថុអស់៦ខែមកនេះ។
ជាលើកដំបូង បេក្ខជនគាំទ្រប្រជាធិបតេយ្យ បានឈ្នះអាសនៈច្រើនក្នុងការបោះឆ្នោតជ្រើសរើសក្រុមប្រឹក្សាស្រុកនៅថ្ងៃទី២៤ ខែវិច្ឆិកា។ ក្នុងការបោះឆ្នោតជាលើកដំបូងក្រោយការផ្ទុះបាតុកម្មតាំងពីខែមិថុនាមក បេក្ខជនប្រជាធិបតេយ្យ ទទួលបានកៅអីច្រើនជាងពាក់កណ្ដាលក្នុងចំណោមកៅអីប្រឹក្សាស្រុកសរុប៤៥២ ទល់នឹងបេក្ខជនដែលសម្បូរធនធាន និងមាននិន្នាការគាំទ្រប្រព័ន្ធដឹកនាំបច្ចុប្បន្ន និងរដ្ឋាភិបាលមជ្ឈិម។
ជាមួយនឹងជោគជ័យនេះ ក្រុមប្រជាធិបតេយ្យ នឹងខិតជិតពលរដ្ឋហុងកុងកាន់តែខ្លាំង។ ក្រុមប្រឹក្សាស្រុក មានសិទ្ធិអំណាចគ្រប់គ្រងលើការចំណាយមួយចំនួនរបស់ខណ្ឌនានារបស់ហុងកុង ហើយសម្រេចចិត្តលើគោលនយោបាយសំខាន់ដែលនៅជាប់ប្រជាជន។ អ្វីកាន់តែសំខាន់ ក្រុមប្រឹក្សាស្រុក ក៏ជាស្ថាប័នមូលដ្ឋានដែលអាចបញ្ជ្រាបគំនិតនយោបាយដោយផ្ទាល់ផងដែរ។
បេក្ខជនដែលឈ្នះឆ្នោតខ្លះ បានប្រដូចលទ្ធផលនេះទៅនឹងការគាំទ្រក្រុមតវ៉ាដូច្នោះដែរ ហើយអាចបន្ថែមសម្ពាធលើរដ្ឋាភិបាលអ្នកស្រី ការី ឡាំ ក្នុងកាលៈទេសៈដែលហុងកុងជួបវិបត្តិនយោបាយធ្ងន់ធ្ងរបែបនេះ។ លោក Tommy Cheung អតីតមេដឹកនាំបាតុកម្មនិស្សិតដែលឈ្នះកៅអីក្រុមប្រឹក្សានៅស្រុក Yuen Long ក្បែរព្រំដែនជាមួយចិន និយាយថា នេះជាកម្លាំងប្រជាធិបតេយ្យ និងជារលកស៊ូណាមិប្រជាធិបតេយ្យ។
បើតាមកាសែត South China Morning Post គិតត្រឹមម៉ោង៩ព្រឹក (ម៉ោងហុងកុង) បេក្ខជនប្រជាធិបតេយ្យ បានឈ្នះនៅខណ្ឌចំនួន១៧ក្នុងចំណោមខណ្ឌទាំង១៨ ដោយទទួលបានកៅអីច្រើនជាង២៧៨ ។ កាលពីការបោះឆ្នោតឆ្នាំ២០១៥ ក្រុមគាំទ្ររដ្ឋាភិបាល បានគ្រប់គ្រងខណ្ឌទាំងអស់ជាមួយសំឡេងលើសលុប។ ចំណែកចំនួនអ្នកទៅបោះឆ្នោតក៏មានចំនួនច្រើនផងដែរ ពោលគឺមាន៧១,២ភាគរយនៃអ្នកមានឈ្មោះបោះឆ្នោតជាងបួនលាននាក់។
សម្រាប់ក្រុមប្រជាធិបតេយ្យ ឬក្រុមប្រឆាំងប៉េកាំង ជ័យជម្នះនេះ ពិតជាសំខាន់ព្រោះពួកគេអាចទទួលសំឡេងបានច្រើនក្នុងការបោះឆ្នោតជ្រើសរើសប្រធានប្រតិបត្តិតំបន់រដ្ឋបាលពិសេសនេះ។ គន់គូរតាមសំឡេងក្នុងក្រុមប្រឹក្សាស្រុកដែលពួកគេគ្រប់គ្រងស្ទើរទាំងអស់ ក្រុមគាំទ្រប្រជាធិបតេយ្យអាចទទួលបានកៅអីចំនួន១២០ក្នុងការគណៈកម្មាធិការបោះឆ្នោត ដែលជាស្ថាប័នជ្រើសរើសប្រមុខទីក្រុងហិរញ្ញវត្ថុអន្តរជាតិនេះ៕
Tag:
ហុងកុង
ចិន
ការី ឡាំ
© រក្សាសិទ្ធិដោយ thmeythmey.com