កម្ពុជា-កូរ៉េខាងត្បូង សិក្សាបង្កើតកិច្ចព្រមព្រៀងពាណិជ្ជកម្មសេរីទ្វេភាគី

ជាតិ

កម្ពុជា-កូរ៉េខាងត្បូង សិក្សាបង្កើតកិច្ចព្រមព្រៀងពាណិជ្ជកម្មសេរីទ្វេភាគី

25, Nov 2019 , 10:59 pm

រូបភាព

រូបភាពពីក្រសួងពាណិជ្ជកម្ម

ដោយ: ឡាយ សុភាវតី

ភ្នំពេញ៖ លោក ប៉ាន សូរស័ក្ដិ រដ្ឋមន្រី្តពាណិជ្ជកម្មកម្ពុជា និងលោកស្រី យូ ម្យុងហ៊ី (Yoo Myoung-Hee) រដ្ឋមន្រី្តពាណិជ្ជកម្មប្រទេសកូរ៉េខាងត្បូង បានចុះហត្ថលេខា ស្ដីពីការចាប់ផ្ដើមការសិក្សាលទ្ធភាពក្នុងការបង្កើតកិច្ចព្រមព្រៀងពាណិជ្ជកម្មសេរីទ្វេភាគី។ ការចុះកិច្ចព្រមព្រៀងនេះ ធ្វើឡើងនៅទីក្រុងប៊ូសាន ប្រទេសកូរ៉េ ក្នុងកិច្ចប្រជុំកំពូលរំលឹកខួបទី៣០ នៃទំនាក់ទំនងអាស៊ាន-កូរ៉េ និងកិច្ចប្រជុំកំពូលមេគង្គ-កូរ៉េ ថ្ងៃទី២៥ដល់២៧ វិច្ឆិកា ឆ្នាំ២០១៩។

បើតាមសេចក្ដីប្រកាសព័ត៌មានរបស់ក្រសួងពាណិជ្ជកម្ម កិច្ចព្រមព្រៀងនេះ ធ្វើឡើងក្រោយពីមានកិច្ចប្រជុំទ្វេភាគីរវាងសម្ដេចនាយករដ្ឋមន្ត្រី ហ៊ុន សែន និងលោក មូន ចេអ៊ីន (Moon Jae-In) ប្រធានធិបតីនៃសារធារណរដ្ឋកូរ៉េ នៅប្រទេសកម្ពុជាកាលថ្ងៃទី១៥ មីនា ឆ្នាំ២០១៩ កន្លងមក។ កិច្ចប្រជុំនេះ មេដឹកនាំប្រទេសទាំងពីរ ឯកភាពលើកការជំរុញ និងពង្រីកទំហំពាណិជ្ជកម្ម រួមទាំងការវិនិយោគ។ លើសពីនេះ មេដឹកនាំប្រទេសទាំងពីរ យល់ព្រមឲ្យមានការសិក្សាលទ្ធភាពបង្កើតកិច្ចព្រមព្រៀមពាណិជ្ជកម្មសេរីទ្វេភាគីកម្ពុជា-កូរ៉េ។

តាមការរំពឹងទុកនៃកិច្ចព្រមព្រៀងពាណិជ្ជកម្មសរីរវាងប្រទេសទាំងពីរ នឹងជួយដល់ការពង្រីកទំនាក់ទំនងទំហំពាណិជ្ជកម្ម បង្កើនការងារ ជាពិសេសជួយដល់ការអភិវឌ្ឍសេដ្ឋកិច្ចប្រទេសទាំងពីរ។

សូមបញ្ជាក់ថា ទំហំពាណិជ្ជកម្មនៃប្រទេសទាំងពីរនៅឆ្នាំ២០១៨ មានទំហំប្រមាណ៧៥៦លានដុល្លារ ដែលកើនឡើងប្រមាណ១៤ភាគរយ បើធៀបនឹងឆ្នាំ២០១៧។ ទំនិញសំខាន់ៗដែលកម្ពុជា បាននាំទៅប្រទេសកូរ៉េរួមមាន អាវយឺត សម្លៀកបំពាក់បុរស ស្បែកជើង វ៉ាលី គ្រឿងអេឡិចត្រូនិក កម្ទេចអាលុយមីញ៉ូម ភេសជ្ជៈ សម្ភារៈពេទ្យ(ចេសវះកាត់)ជាដើម។ ចំណែកឯ ទំនិញពីប្រទេសកូរ៉េ មកកម្ពុជាមាន រថយន្តដឹកទំនិញ ក្រណាត់ចាក់ ទឹករ៉ែធម្មជាតិ គ្រឿងអេឡិចត្រូនិក គ្រឿងចក្រ ក្រណាត់ ផលិតផលថែរក្សាសម្រស់ជាដើម៕