អន្តរជាតិ
ការសិក្សា៖ស្ត្រីដែលមានគូស្នេហ៍មិនសូវស្អាត មានភាគច្រើនរីករាយជាងស្ត្រីទូទៅ
× ការសិក្សារបស់សាកលវិទ្យាល័យ Florida State University របស់អាមេរិក បានបង្ហាញឲ្យថា ស្ត្រីទទួលបានភាពរីករាយច្រើន ជាមួយដៃគូប្រុសដែលមិនរូបសម្បត្តិមិនសូវស្អាត។ ក្រុមអ្នកស្រាវជ្រាវ បានស្ទង់មតិ និងអង្កេតលើគូស្រករថ្មីថ្មោងចំនួន២២៣គូ ចន្លោះអាយុពី២០ ទៅ២៩ឆ្នាំ។
ការរស់នៅប្រចាំថ្ងៃ ទម្លាប់ និងការយកចិត្តទុកដាក់ផ្សេងៗ ជាកត្តាសំខាន់នៃការសិក្សារបស់ក្រុមអ្នកស្រាវជ្រាវនៅសាកលវិទ្យាល័យ Florida State University ដើម្បីស្វែងយល់ឲ្យកាន់តែច្បាស់ពីទំនាក់ទំនងរបស់ស្ត្រី និងគូស្នេហ៍របស់ខ្លួន។
លទ្ធផលនៃការសិក្សាបង្ហាញថា ស្ត្រីដែលមានស្វាមីរូបរាងសង្ហា និងទាក់ទាញ មិនមែនជាស្ត្រីដែលរស់នៅដោយស្រណុកស្រួលឡើយ។ ស្ត្រីទាំងនោះ ភាគច្រើន តែងតែស្រកទម្ងន់ ហើយគិតច្រើន និងគ្មានសុវត្ថិភាពផ្លូវចិត្ត។
ផ្ទុយទៅវិញ ស្ត្រី ដែលមានស្វាមីមិនសូវសង្ហា និងរូបសម្បត្តិ មិនសូវទាក់ទាញ វិញ ស្ត្រីទាំងនោះ មិនដែលមានអារម្មណ៍រងសម្ពាធនោះឡើយ ហើយក៏មិនដែលព្យាយាមតមអាហារ ឬប្រឹងធ្វើអ្វីមួយដើម្បីយកចិត្តគេជ្រុលពេកនោះដែរ។
ផ្អែកតាមលទ្ធផលនៃការស្ទង់មតិលើគូស្រករថ្មីថ្មោងចំនួន២២៣គូ ចន្លោះអាយុពី២០ ទៅ២៩ឆ្នាំ លោកស្រី Tania Reynolds ប្រធានក្រុមអ្នកស្រាវជ្រាវបានអះអាងថា ស្ត្រីដែលមានដៃគូដ៏ទាក់ទាញ តែងតែមានអារម្មណ៍មិនសូវល្អ ជាពិសេសពួកគាត់ចូលចិត្តគិតថា ខ្លួនមិនស្មើស្វាមី។
ទោះបីជាយ៉ាងណាក៏ដោយ ក្រុមអ្នកស្រាវជ្រាវ ផ្តល់ទូន្មានថា ស្ត្រីទាំងអស់មិនគួរយកសម្ផស្សទៅប្រៀបធៀបដែលនាំឲ្យចិត្តច្របូកច្របល់។ ពួកគេគួរតែផ្តោតលើទង្វើរបស់ស្វាមីដែលផ្តល់នូវភាពរ៉ូម៉ែនទិកខាងក្រៅ ជាពិសេសការផ្តល់តម្លៃលើសណ្តានចិត្ត ភាពក្លាហាន និងដៃគូដែលតែងតែលើកទឹកចិត្ត៕
© រក្សាសិទ្ធិដោយ thmeythmey.com