អភិបាលស្រុកបន្ទាយស្រីថ្មីដាក់គោលដៅដោះស្រាយទំនាស់ដីធ្លីត្រឹមមួយអាណត្តិ

ជាតិ

បទយកការណ៍ / បទសម្ភាសន៍

អភិបាលស្រុកបន្ទាយស្រីថ្មីដាក់គោលដៅដោះស្រាយទំនាស់ដីធ្លីត្រឹមមួយអាណត្តិ

27, Nov 2019 , 8:59 am

រូបភាព

ដោយ: អុីសា រ៉ហានី (Isa Rohany)

សៀមរាប៖ លោក ឃឹម ហ្វីណង់ ត្រូវបានចាត់ទុកថាជាយុវជនវ័យក្មេងដែលឡើងមកកាន់តំណែងជាអភិបាលស្រុកបន្ទាយស្រី។ ឡើងកាន់តំណែងនៅដើមខែ តុលា លោក ហ្វីណង់បានបង្ហាញស្នាដៃការងារជាច្រើនគួរឱ្យកត់សម្គាល់ ក្នុងនោះមានទាំងផែនការចុះរុះរើសំណង់ខុសច្បាប់ដែលសង់លើដីរដ្ឋ និងការរៀបចំព្រឹត្តិការណ៍ទេសចរណ៍ផ្សេងៗ។ បញ្ហាទំនាស់ដីធ្លី បានក្លាយជាការងារអាទិភាពសម្រាប់អភិបាលស្រុកថ្មី ក្នុងនោះលោក ហ្វីណង់ បានបង្ហាញគោលការណ៍ដើម្បីដោះស្រាយបញ្ហានេះនៅត្រឹមមួយអាណិតការងាររបស់ខ្លួន។

ព័ត៌មានលម្អិត សូមស្ដាប់បទយកការណ៍ដែលរៀបរៀងដោយអ្នកនាង អ៊ីសា រ៉ហានី ពីខេត្តសៀមរាបដូចតទៅ៖

ទំនាស់ដីធ្លីបានក្លាយជាបញ្ហាស្មុគស្មាញ និងសឹងក្លាយជាជំងឺមហារីកទៅហើយសម្រាប់រដ្ឋបាលស្រុកបន្ទាយស្រី ដែលត្រូវវះកាត់។ ទំនាស់មានច្រើនទម្រង់ និងមានភាពស្មុគស្មាញខ្លាំង ដែលករណីទំនាស់ទាំងនោះកើតឡើងរវាងប្រជាជនជាមួយរដ្ឋ ប្រជាជនជាមួយក្រុមហ៊ុន និងប្រជាជនជាមួយប្រជាជនដូចគ្នា។

អភិបាលស្រុកបន្ទាយស្រី លោក ឃឹម ហ្វីណង់ បានដាក់គោលដៅក្នុងការចុះដោះស្រាយទំនាស់ដីធ្លីឱ្យបានឆាប់តាមតែអាចធ្វើទៅបាន និងមិនចង់ឱ្យបញ្ហានេះនៅរុំារៃក្នុងភូមិសាស្ដ្រនេះទៀតឡើយ។ បំណង១ក្នុងបំណងទាំង៣ដែលលោក ហ្វីណង់ ឡើងជាអភិបាលស្រុក នោះគឺប្រែក្លាយភូមិសាស្ដ្រនេះឱ្យមានសក្កានុពល លែងក្លាយជាទីលានកើតជម្លោះដីធ្លីតទៅទៀត។ លោក ហ្វីណង់ ប្រាប់ថា៖«...ខ្ញុំចង់ឱ្យដី(ស្រុកបន្ទាយស្រី)នេះ ក្លាយជាដែនដីមួយដែលសុខសាន្ត មិនឱ្យមានទំនាស់ជាប់រហូតទេ សង្ឃឹមថាអ្វីៗនឹងបានបញ្ចប់ បើមិនអាចបញ្ចប់បាន សង្ឃឹមថាឱ្យពីធំមកតូច ការងារទំនាស់ដីនេះមានច្រើនបែបច្រើនសណ្ឋាន មានច្រើនកន្លែង ដូច្នេះខ្ញុំសង្ឃឹមថាក្នុងមួយអាណត្តិរបស់ខ្ញុំអាចមានលទ្ធភាពបញ្ចប់រឿងនេះ»។

កត្ដាភូមិសាស្ដ្រស្មុគស្មាញ តំបន់ដីមានការគ្រប់គ្រងច្រើនស្ថាប័ន ក៏ជាមូលហេតុដែលងាយឱ្យកើតមានជម្លោះដីធ្លី ឬការទន្ទ្រានដីកាន់កាប់ខុសច្បាប់ផងដែរ។ តំបន់នេះមួយផ្នែកក្រោមការគ្រប់គ្រងរបស់អាជ្ញាធរជាតិអប្សរា មួយផ្នែកក្រោមការគ្រប់គ្រងរបស់រដ្ឋបាលព្រៃឈើ និងមួយផ្នែកជាឧទ្យានជាតិ។ លោក ហ្វីណង់ ប្រាប់ថា តំបន់ដែលគ្រប់គ្រងដោយរដ្ឋបាលស្រុកគឺមានមួយផ្នែកតូច ក្នុងនោះមានប្រជាជនរស់នៅមិនដល់៥ម៉ឺននាក់ផង សរុបប្រហែល១ម៉ឺនគ្រួសារតែប៉ុណ្ណោះ។

ប្រវត្តិនៃការកើតជម្លោះដីធ្លីក្នុងស្រុកបន្ទាយស្រី ត្រូវបានលោក ហ្វីណង់ សិក្សាស្វែងយល់ពីរឿងរ៉ាវលម្អិតមួយៗនិងដឹងពីប្រភពដែលកើតមានបញ្ហាដ៏ស្មុគស្មាញនេះ។ លោកពន្យល់យ៉ាងដូច្នេះថា៖« សាវតានៅទីនេះ យើងព្យាយាមដោះម្ដងដោះស្រាយទ្រង់ទ្រាយធំ តាមសារាចរណ៍លេខ០១ ក្រោយមកក៏មានយុវជនចុះវាស់ដីធ្លីមកវាស់បញ្ចប់កាលពីឆ្នាំ២០១១ យើងបានវាស់ច្រើន ហេតុនេះហើយទើបមានប្រជាជនមួយចំនួនមានប្លង់រឹង តែរឿងនេះមិនបានបញ្ចប់ទេពីព្រោះកាលណោះយើងដោះជាយុទ្ធសាស្ដ្រស្បែកខ្លា តំបន់ដីរដ្ឋក៏ដោយឱ្យតែមានប្រជាជនរស់នៅពិតប្រាកដ យើងសុទ្ធចិត្តឱ្យគាត់។ ហើយតំបន់ណាអត់មនុស្សនៅយើងទុក តំបន់ណាមានមនុស្សយើងឃ្វាល តែចាប់ពីមានប្លង់រឹងមានមនុស្សនៅតំបន់ស្បែកខ្លាក្លាយជាតំបន់លែងស្បែកខ្លា ជម្លោះដំបូងកើតចេញពីប្រជាជន ៨៤គ្រួសារ ដែលមានប្រភពចេញពីប្រជាជនក្បែរនោះជាប់ដីគ្នា ចាប់យក នោះគេហៅថា ជម្លោះប្រជាជន៨៤គ្រួសារ»។

លោកអភិបាលបន្តទៀតថា៖« ក្រោយមកក្នុងចំណោម៨៤គ្រួសារ ក៏មានលេចចេញចលនាមួយក្រុមទៀតហៅថា ប្រជាជនមកពីក្រុម ៥៦២គ្រួសារ មានប្រវត្តិភាគច្រើនអ្នកនៅទីនេះ ដោយឡែក៨៤គ្រួសារជាសកម្មជនដីធ្លីមកពីតំបន់ផ្សេងៗ ខ្លះមានតាំងពីសកម្មជនបឹងកក់ កំពង់ចាម និងភ្នំពេញ។ ក្នុង៨៤គ្រួសារភាគច្រើនមកពីក្រៅ តែក៏មានអ្នងក្នុងស្រុកដែរ។ អ្នកខាងក្នុងឃើញអ្នកខាងក្រៅបាន ក៏ទៅកៀងគរអ្នកនៅភ្នំត្បាញឱ្យមកដណ្ដើមដីនឹងគេដែរ ក៏ដណ្ដើមនៅម្ដុំជើងភ្នំគូលែន អស់ដីដណ្ដើមក៏ចាប់ផ្តើមឆ្លងថ្នល់មកម្ដង គឺកើតជាក្រុម ៣០២ នៅខាងឆ្វេងដៃបើយើងជិះឡានភ្នំគូលែនទៅ»។

លោក ហ្វីណង់ ចាត់ទុកដីជម្លោះទាំងអស់គឺជាដីរបស់រដ្ឋទាំងស្រុង។ ជម្លោះនៅជើងភ្នំគូលែន គឺកើតក្រោយយុទ្ធសាស្ដ្រស្បែកខ្លារបស់រាជរដ្ឋាភិបាល ដូច្នេះអ្នកដែលយោងលើការអាស្រ័យផលជាក់ស្ដែង គឺមិនត្រឹមត្រូវនោះទេ។ ផ្ទុយពីទីតាំងនេះ គឺជម្លោះរវាងប្រជាជន៤៧គ្រួសារ ជាមួយក្រុមហ៊ុន លី អ៊ុំអេង ដែលជម្លោះនេះកើតឡើងតាំងពីឆ្នាំ២០០៤មក។ អភិបាលស្រុកបន្ទាយស្រីពន្យល់ថា ទីតាំងនេះគឺទាំងប្រជាជននិងក្រុមហ៊ុន សុទ្ធតែរស់នៅលើគម្របដីព្រៃឈើដូចគ្នា។ ដូច្នេះស្ថានភាពបច្ចុប្បន្នរបស់ស្រុកបន្ទាយស្រី ប្រជាជនរស់នៅលើដីរបស់រដ្ឋ ពេលខ្លះប្រជាជនដែលទៅរំលោភលើដីរដ្ឋ និងប្រជាជនរំលោភដីរដ្ឋដូចគ្នា ឈ្លោះគ្នាហើយនោះ ពេលខ្លះប្រជាជនឈ្លោះជាមួយឈ្មួញទៅទៀត ដោយសារមានឈ្មួញខ្លះបានទិញយកដីដែលរំលោភដីរដ្ឋពីប្រជាជនដែលរំលោភនោះ។

នៅពេលសួរពីផែនការដែលត្រូវដោះស្រាយ លោកអភិបាលស្រុកបន្ទាយស្រីពន្យល់ថា លោកព្យាយាមធ្វើឱ្យស្ថានការណ៍នៅទ្រឹង មិនឱ្យរីកទៅមុខទៀតទេ និងផ្តើមដោះជាដំណាក់កាលៗ។ ស្ថានភាពនេះហាក់ពិបាកបន្ដិច នៅពេលលោកទើបឡើងកាន់តំណែងហើយពលរដ្ឋយល់ថា រដ្ឋបាលលោកមិនហ៊ានប្រើចំណាត់ការទើបពួកគេផ្តើមធ្វើសកម្មភាពពង្រីកបន្ថែម ពិសេសនៅតំបន់ជើងភ្នំគូលែនតែម្ដង។

លោក ហ្វីណង់ បន្ត៖« ក្នុងនាមជាអភិបាលស្រុកខ្ញុំស្រឡាញ់ ខ្ញុំមើលខុសត្រូវជូនប្រជាជនខ្ញុំ ដាច់ខាតដោះ តែក៏ខ្ញុំមិនអាចទទួលបាននៅពេលខ្ញុំមិនទាន់មានឱកាសដោះផងនោះ គាត់បែរជានាំគ្នាពង្រីកថែម ឧទាហរណ៍ពេលអុំទូកថ្មីៗនេះ ក៏លួចសង់ផ្ទះយើងតាមទាន់ ខ្លះមិនទាន់ហើយអស់ទេ...បើសិនយើងអត់មាត់គាត់ដឹងតែសង់ថែមទៀត។ ពេលសួរខ្ញុំថាតើមានវិធានការបែបណា? ខ្ញុំចង់រកប្រជាជនពិត អ្នកដែលរស់នៅពិត ព្រោះបច្ចុប្បន្ននេះទោះតួលេខបង្ហាញថា មានប្រជាជនប្រហែលមួយពាន់គ្រួសារ ប្រជាជនប្រហែល៥ពាន់នាក់ចុះ តែរាល់ការតវ៉ា ខ្ញុំមិនដែលឃើញប្រជាជនលើសពី៣០០នាក់ចេញមកទេ ខ្ញុំតែងសួរខ្លួនឯងថាតើបញ្ជីនេះពិតឬយ៉ាងណា?...អ្នករស់នៅផ្ទាល់មិនដល់១០០នាក់ផងតាមព័ត៌មានជាក់ស្ដែង គាត់មិនដែលរស់នៅ គឺចេញតែពេលមានការតវ៉ាប៉ុណ្ណោះ»។

ដោយសារមានការតាំងចិត្តខ្ពស់លើបញ្ហាដ៏រសើបនេះ ទើបលោក ហ្វីណង់ ដែលឡើងកាន់តំណែងមិនដល់មួយខែផង បានផ្តើមយុទ្ធនាការរុះរើសំណង់ខុសច្បាប់នៅជើងភ្នំគូលែន។ តំបន់នេះ បានផ្ទុះនូវសំណង់អាណាធិបតេយ្យនារយៈពេលប្រមាណ២ឆ្នាំចុងក្រោយនេះ ដោយប្រែក្លាយពីតំបន់ដែលធ្លាប់មានគម្របព្រៃឈើ មកជាតំបន់ដែលមានផ្ទះ និងរោងតូចធំជាច្រើន ពីតំបន់ដែលមិនធ្លាប់មានមនុស្សរស់នៅ ក្លាយជាតំបន់ដែលសំណង់ស្អេកស្កះ។

ក្រោយរុះរើហើយ រដ្ឋបាលស្រុកបន្ទាយស្រីមានវិធានការកុំឱ្យពលរដ្ឋសាងសង់សំណង់ឡើងវិញផងដែរ ក្នុងនោះគឺហាមរាល់ការដឹកជញ្ចូនគ្រឿងសំណង់គ្រប់ប្រភេទទៅកាន់តំបន់ខាងលើ ដោយសង្ឃឹមថាតំបន់នោះនឹងលែងមានកំណើនសំណង់បន្ថែមទៀត៕