ពីនេះ ពីនោះ
រូបភាពពីហ្វេសប៊ុក Cctip Cedac
×![]()
ដោយ: ផាត ដាណេ
ភ្នំពេញ៖ ផ្កាខាត់ណា ជាបន្លែពេញនិយមសម្រាប់យកមកធ្វើម្ហូបអាហារបានច្រើនមុខ និងជាដំណាំដែលកសិករអាចរកប្រាក់ចំណូលច្រើនផងដែរ។ ដូច្នេះដើម្បីឲ្យទទួលបានទិន្នផលល្អ កសិករត្រូវដឹងពីបច្ចេកទេសដាំដុះ និងការថែទាំជាមុនសិន។ បើតាមសៀវភៅកសិករជោគជ័យនៃមជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជា។
ចំពោះបច្ចេកទេសដាំដុះកសិករ ត្រូវរៀបចំថ្នាលបណ្ដុះកូនដំណាំជាមុនសិន។ ក្នុងការរៀបចំថ្នាលបណ្ដុះកសិករ ត្រូវបែកចែកជា ២រដូវគឺ រដូវវស្សា និងរដូវប្រាំង។ សម្រាប់រដូវវស្សា កសិករត្រូវបណ្ដុះកូននៅក្នុងកន្ទោងពីស្លឹកចេក។ ជំហានដំបូងមុនពេលបណ្ដុះ កសិករត្រូវលាយដីជាមួយលាមកសត្វ និងផេះអង្កាម ដោយដីត្រូវមានបរិមាណ ៣ភាគ លាមកសត្វ ១ភាគ និងផេះអង្កាម ១ភាគ បញ្ចូលគ្នាដាក់ចូលក្នុងកន្ទោង។ បន្ទាប់ពីលាយដីរួច កសិករត្រូវដាក់ដាំគ្រាប់ពូជ ១គ្រាប់ក្នុងមួយកន្ទោង ហើយគ្របចំបើង ២-៣ថ្ងៃ ឲ្យដុះពន្លកទើបបើកចេញ។
ដោយឡែក រដូវប្រាំងវិញ ត្រូវលាយដីដាក់ក្នុងកន្ទោងដូចគ្នា កសិករគ្រាន់តែសាបព្រោះគ្រាប់ពូជស្តើងៗ ដើម្បីឲ្យដំណាំលូតលាស់បានល្អ រួចគ្របចំបើង ២-៣ថ្ងៃឲ្យដុះពន្លកទើបបើក។ ក្នុងរយៈពេលនៃការបណ្ដុះ កសិករត្រូវស្រោចទឹក២ដងក្នុងមួយថ្ងៃ និងបាញ់ថ្នាំការពារសត្វល្អិតបំផ្លាញ (ថ្នាំផ្សំពីធម្មជាតិ) រហូតកូនដំណាំមានស្លឹក៤-៥ទើបអាចដកយកទៅដាំបាន។
មុនពេលដាំកសិករ ត្រូវភ្ជួររាស់ដី ៣ដង ដើម្បីឲ្យដីរាបស្មើ ហើយដាក់ខ្សែតម្រង់រួចកាប់រណ្ដៅជាជួរក្នុងមួយរណ្ដៅត្រូវដាក់លាមកសត្វ ១ដៃ និងជីធម្មជាតិ ១ស្លាបព្រា។ កសិករ ត្រូវដកកូនដំណាំមកដាំនៅពេលរសៀល មុនដកក៏ត្រូវស្រោចទឹកឲ្យជោក ដើម្បីកុំឲ្យបែកដី ដាច់ឫស និងត្រូវដាំគុម្ពចន្លោះ ៣តឹក និងរង ៦តឹក។
នៅពេលដាំបាន ១សប្ដាហ៍ កសិករត្រូវជ្រោយដីបោចស្មៅ និងបាចជីធម្មជាតិបំប៉នបន្ថែមលើទី១។ បន្ថែមលើនេះ មួយសប្ដាហ៍ក្រោយមក កសិករ ត្រូវជ្រោយស្មៅដាក់ជីធម្មជាតិលើកទី២ និងលប់គល់រង ហើយត្រូវស្រោចទឹក ២ដង ក្នុងមួយថ្ងៃព្រឹក-ល្ងាច។ ជាពិសេសកសិករត្រូវយកស្បៃមុង សំណាញ់ ក្រឡាស្អិត មកហ៊ុមព័ទ្ធជុំវិញចម្ការផ្កាខាត់ណា ដើម្បីការពារការបំផ្លាញពីសត្វល្អិត និងដង្កូវ ៕
(សារព័ត៌មានថ្មីៗដកស្រង់ចេញពីសៀវភៅកសិករជោគជ័យនៃមជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជា)
Tag:
កសិកម្ម
ផ្កាខាត់ណា
© រក្សាសិទ្ធិដោយ thmeythmey.com
