អត្ថបទពាណិជ្ជកម្ម
ពិធីប្រគល់អាហារូបករណ៍ជូនសិស្សក្រីក្រជំនាន់ទី៨ និងអបអរការបញ្ចប់ថ្នាក់របស់សិស្សក្រីក្រជំនាន់ទី៦ ផ្នែកបច្ចេកទេសជួសជុលរថយន្ត
× នាព្រឹកថ្ងៃទី២៧ ខែវិច្ឆិកា ឆ្នាំ២០១៩ ក្រុមហ៊ុន តូយ៉ូតា (ខេមបូឌា) ដែលជាក្រុមហ៊ុនត្រូវបានទទួលស្គាល់នូវសិទ្ធិនាំចូល និងចែកចាយផ្ដាច់មុខ លើផលិតផលយានយន្ដ និងគ្រឿងបន្លាស់ ម៉ាកតូយ៉ូតា បានរៀបចំពិធីប្រគល់អាហារូបករណ៍ បច្ចេកទេសជួសជុលរថយន្ត ជូនដល់សិស្សក្រីក្រជំនាន់ទី៨ និងពិធីអបអរសាទរការបញ្ចប់ថ្នាក់អាហារូបករណ៍ ជំនាញបច្ចេកទេសជួសជុលរថយន្ត របស់សិស្សក្រីក្រជំនាន់ទី៦ផងដែរ។ ពិធីនេះ ប្រព្រឹត្តទៅក្រោមអធិបតីភាព លោក គង់ នួន ប្រធានក្រុមហ៊ុន តូយ៉ូតា (ខេមបូឌា), លោក ហ៊ីរ៉ូយូគិ អ៊ីតុ អគ្គនាយកក្រុមហ៊ុ, លោក ស៊ឹម សុរិន្ទ នាយកសាលា ហ្ស៊ី វ៉េ សេ (JVC) និងថ្នាក់ដឹកនាំក្រុមហ៊ុន ព្រមទាំងប្អូនៗដែលជាសិស្សអាហារូបករណ៍ទាំងអស់ផងដែរ។
នៅក្នុងកម្មវិធីនោះ លោក គង់ នួន ប្រធានក្រុមហ៊ុន តូយ៉ូតា (ខេមបូឌា) បានថ្លែងឲ្យដឹងថា ឆ្នាំនេះគឺជាឆ្នាំទី៨ហើយ ដែលក្រុមហ៊ុន តូយ៉ូតា (ខេមបូឌា) ផ្តល់អាហារូបករណ៍ដល់សិស្សក្រីក្រ ដែលពុំមានលទ្ធភាពបង់ថ្លៃសិក្សា ដើម្បីឲ្យពួកគាត់មានឱកាសទទួលបាននូវចំណេះដឹង ចំណេះធ្វើ និងជំនាញមួយច្បាស់លាស់ ពាក់ព័ន្ធនឹងបច្ចេកទេសជួសជុលរថយន្ត ក៏ដូចជាដើម្បីចូលរួមដល់ការបណ្តុះបណ្តាលធនធានមនុស្ស ក្នុងវិស័យយានយន្ត និងរួមចំណែកកាត់បន្ថយភាពក្រីក្រនៅក្នុងប្រទេសកម្ពុជា។ លោក គង់ នួន បានបន្តថា កម្មវិធីអាហារូបករណ៍នេះ គឺជាការចូលរួមចំណែកស្របពេលដែល ការលក់រថយន្ត និងតម្រូវការទីផ្សារផ្នែកជាងជួសជុលរថយន្ត មានការកើនឡើងគួរឲ្យកត់សម្គាល់ ពីមួយឆ្នាំទៅមួយឆ្នាំ។
ប្រធានក្រុមហ៊ុន តូយ៉ូតា (ខេមបូឌា) លោក គង់ នួន បានលើកឡើងថា៖«គិតមកដល់ឆ្នាំសិក្សា២០១៨-២០១៩នេះ សិស្សអាហារូបករណ៍របស់ក្រុមហ៊ុន តូយ៉ូតា (ខេមបូឌា) មានចំនួនសរុប ៧៩រូប ដែលក្នុងនោះសិស្សអាហារូបករណ៍ជំនាន់ទី១ មាន១៦រូប សិស្សជំនាន់ទី២ មាន១០រូប សិស្សជំនាន់ទី៣ មាន១០រូប សិស្សជំនាន់ទី៤ មាន១០រូប សិស្សជំនាន់ទី៥ មាន៩រូប និងសិស្សជំនាន់ទី៦ មាន១១រូប ដែលពួកគាត់ទើបតែប្រលងបញ្ចប់ការសិក្សា កាលពីខែសីហាកន្លងទៅនេះ។ ចំណែកសិស្សជំនាន់ទី៧ មាន១៣រូប ដែលពួកគាត់ កំពុងសិក្សានៅសាលា។
លើសពីនេះទៅទៀត ក្រុមហ៊ុន ក៏បានប្រគល់អាហារូបករណ៍ រួមមាន ថ្លៃសិក្សា ស្នាក់នៅ និងប្រាក់ឧបត្ថម្ភប្រចាំខែ ដល់សិស្សក្រីក្រជំនាន់ទី៨ ចំនួន ៩រូបផ្សេងទៀត ដែលមកពីបណ្តាខេត្ត៧ផ្សេងៗគ្នា រួមមានខេត្តស្ទឹងត្រែង កំពត តាកែវ កណ្តាល ខេត្តកំពង់ឆ្នាំង ព្រះសីហនុ និងរាជធានីភ្នំពេញ ឲ្យសិក្សា និងស្នាក់នៅ នៅសាលាមធ្យមសិក្សាបច្ចេកទេស ហ្ស៊ី វ៉េ សេ (JVC) ផងដែរ។
ឆ្លៀតក្នុងឱកាសនេះ លោក គង់ នួន ក៏បានសម្តែងនូវសេចក្តីត្រេកអរ ដែលសិស្សជំនាន់ទី៦ ទាំង ១១រូប ដែលពួកគាត់បានតស៊ូអស់ពីកម្លាំងកាយចិត្ត ក្នុងការប្រលងបញ្ចប់ការសិក្សា ជាមួយនឹងលទ្ធផលដ៏ល្អប្រសើរ ហើយពួកគាត់ទាំងអស់ទទួលបានការងារធ្វើគ្រប់ៗគ្នា នៅតាមស្ថាប័នក្នុងប្រទេស ក្រៅប្រទេស និងយានដ្ឋានផ្សេងៗ ជាមួយនឹងជំនាញច្បាស់លាស់ ដែលអាចទទួលបាន ប្រាក់ចំណូលសមល្មម ក្នុងការផ្គត់ផ្គង់ខ្លួនឯង និងក្រុមគ្រួសារផងដែរ។
(អត្ថបទពាណិជ្ជកម្ម)
© រក្សាសិទ្ធិដោយ thmeythmey.com