លោក វ៉ាត់ ចំរើន៖ ស៊ីហ្គេមឆ្នាំនេះ កម្ពុជានឹងដណ្តើមមេដាយបានច្រើនជាងលើកមុន

កីឡាជាតិ

ជាតិ

លោក វ៉ាត់ ចំរើន៖ ស៊ីហ្គេមឆ្នាំនេះ កម្ពុជានឹងដណ្តើមមេដាយបានច្រើនជាងលើកមុន

27, Nov 2019 , 5:04 pm

រូបភាព

លោក វ៉ាត់ ចំរើន ផ្តល់បទសម្ភាសដល់អ្នកសារព័ត៌មាននៅអាកាសយានដ្ឋានអន្តរជាតិភ្នំពេញមុនចេញទៅហ្វីលីពីន

ដោយ:

អគ្គលេខាធិការនៃគណៈកម្មាធិការជាតិអូឡាំពិកកម្ពុជា លោក វ៉ាត់ ចំរើន ជឿជាក់លើសមត្ថភាពរបស់អត្តពលិកកម្ពុជាក្នុងការដណ្តើមមេដាយពីការប្រកួតកីឡាស៊ីហ្គេមលើកទី៣០នៅហ្វីលីពីនឆ្នាំនេះ។ លោក ក៏រំពឹងដែរថា កម្ពុជានឹងអាចរំកិលចំណាត់ថ្នាក់របស់ខ្លួនក្នុងតារាងមេដាយសរុប។ ការបង្ហាញភាពជឿជាក់និងក្តីរំពឹងបែបនេះ ធ្វើឡើងក្រោយ លោកសង្កេតឃើញពីសក្តានុពល និងភាពរីកចម្រើនរបស់អត្តពលិកកម្ពុជា។ ជាពិសេសឆ្នាំនេះ កម្ពុជាបានបញ្ជូនកីឡាសក្តានុពលជាច្រើនឲ្យចូលរួម។

ថ្លែងមុនចេញដំណើរទៅប្រទេសហ្វីលីពីន នៅយប់ថ្ងៃទី២៦ វិច្ឆិកា លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា បានបង្ហាញការជឿជាក់យ៉ាងមុតមាំថា ការប្រកួត SEA Games នៅឆ្នាំនេះ អត្តពលិកកម្ពុជានឹងអាចដណ្តើមមេដាយបានច្រើនជាងស៊ីហ្គេមឆ្នាំ២០១៧ នៅទីក្រុងកូឡាឡាំពួរប្រទេសម៉ាឡេស៊ី។ កត្តាដែលធ្វើឲ្យ លោកជឿជាក់នេះ គឺដោយសារភាពរីកចម្រើននៃវិស័យកីឡា និងការហ្វឹកហាត់ពង្រឹងសមត្ថភាពត្រៀមបានល្អរបស់អត្តពលិក។

លើសពីនេះ កម្ពុជាបានបញ្ជូនកីឡាមួយចំនួនរួមមានល្បុក្កតោ ប្រដាល់សកល ការ៉ាតេ សូហ្វតិន្នីស ហុកគី កាយសម្ព័ន្ធ ទូកក្តោង និងចំបាប់ជាដើម ទៅហ្វឹកហាត់ពង្រឹងសមត្ថភាពនៅក្រៅប្រទេស ដើម្បីត្រៀមប្រជែងក្នុងព្រឹត្តិការណ៍នេះផងដែរ។

«បើតាមការដាក់សន្ទុះមេដាយដែលយើងចង់បាន គឹធ្វើយ៉ាងណាដណ្តើមមេដាយមាសឲ្យបានច្រើនជាងស៊ីហ្គេមនៅកូឡាឡាំពួរ។ យើងសង្ឃឹមជឿជាក់ថា យើងទៅលើកនេះមានគ្នាច្រើន ហើយមានប្រភេទកីឡាសក្តានុពលមួយចំនួន ដូច្នេះយើងនឹងអាចដណ្តើមមេដាយបានច្រើនជាងស៊ីហ្គេមនៅកូឡាឡាំពួរ»។ លោក វ៉ាត់ ចំរើន លើកឡើងបែបនេះហើយរំពឹងថា កម្ពុជានឹងអាចរំកិលចំណាត់ថ្នាក់រួមក្នុងតារាងមេដាយនៅឆ្នាំនេះ។

ក្នុងបទសម្ភាសជាមួយអ្នកសារព័ត៌មាននៅអាកាសយានដ្ឋានអន្តរជាតិភ្នំពេញនោះដែរ ប្រធាននាយបេសកកម្មស៊ីហ្គេមរូបនេះ ក៏បានរំលឹកពីអនុសាសន៍របស់សម្តេចនាយករដ្ឋមន្ត្រី ហ៊ុន សែន ដែលដាស់តឿនឲ្យកីឡាករជៀសវាងប្រព្រឹត្តអំពើ ដែលនាំឲ្យប៉ះពាល់ដល់កិត្តិយសជាតិផងដែរ។ ទន្ទឹមនឹងនេះ លោក ប្តេជ្ញាថា លោករួមជាមួយមន្ត្រី កីឡាករ គ្រូបង្វឹក នឹងអនុវត្តតាមការណែនាំនេះយ៉ាងម៉ឺងម៉ាត់ និងប្រកបដោយប្រសិទ្ធិភាព។

នាពិធីជួបសំណេះសំណាលជាមួយថ្នាក់ដឹកនាំ ប្រតិភូ គ្រូបង្វឹក កីឡាករកីឡាការិនីនៅថ្ងៃទី១៨ វិច្ឆិកា ឆ្នាំ២០១៩ នាវិមានសន្តិភាពសម្តេច ហ៊ុន សែន បានក្រើនរំលឹក ក៏ដូចជាដាស់តឿនឲ្យកីឡាករត្រូវគោរពបទបញ្ជា និងលក្ខខណ្ឌនៃការប្រកួតឲ្យបានត្រឹមត្រូវ។ ជាពិសេស ជៀសវាងប្រព្រឹត្តអំពើ និងប្រើប្រាស់សារធាតុលើកកម្លាំង ដែលនាំឲ្យប៉ះពាល់ដល់កិត្តិយសជាតិ។

ក្រៅពីជំរុញឲ្យតម្កល់កិត្តិយសជាតិជាធំ សម្តេចបានផ្តាំកីឡាករយ៉ាងដូច្នេះថា៖«ត្រូវព្យាយាមធ្វើយ៉ាងណា កុំឲ្យការចង់ឈ្នះរបស់យើងក្លាយជាភាពអាម៉ាស់របស់ជាតិ ហើយយើងត្រូវដឹងថា ការចួលរួមរបស់យើង គឺតំណាងឲ្យជាតិ»។

នៅសល់តែ៣ថ្ងៃទៀតប៉ុណ្ណោះ ការប្រកួតកីឡាស៊ីហ្គេមលើកទី៣០នៅប្រទេសហ្វីលីពីន នឹងបើកការប្រកួតជាផ្លូវការ ខណៈអត្តពលិកនៃប្រភេទកីឡាមួយចំនួនបានទៅដល់ប្រទេសហ្វីលីពីន និងកំពុងដំណើរការប្រកួត។ ជាក់ស្តែង កីឡាបាល់ទាត់បានចាប់ផ្តើមប្រកួតតាំងពីថ្ងៃ២៥ វិច្ឆិកា។ សម្រាប់កម្ពុជាគិតត្រឹមថ្ងៃទី២៧ វិច្ឆិកា មានកីឡា៥ប្រភេទរួមមានល្បុក្កតោ, ទូកក្តោង, បាល់ទះឆ្នេរខ្សាច់, កាយសម្ព័ន្ធ និងបាល់ទាត់កំពុងស្ថិតនៅប្រទេសហ្វីលីពីន។

ក្នុងចំណោមកីឡាទាំង៣១ប្រភេទ ដែលកម្ពុជាបញ្ជូនឲ្យចូលរួមប្រកួតកីឡាស៊ីហ្គេមនៅឆ្នាំនេះ កម្ពុជារំពឹងលើកីឡាគុនល្បុក្កតោ, ប្រដាល់គុនខ្មែរ, ប៉េតង់, តេក្វាន់ដូ, ជឺជិតស៊ូ, វាយកូនបាល់, ប្រដាល់សកល, សូហ្វតិន្នីស, ការ៉ាតេ សីដក់ និងចំបាប់ជាដើមក្នុងការស្វែងរកមេដាយជូនជាតិនៅឆ្នាំនេះ។

សម្រាប់ការប្រកួតកីឡាស៊ីហ្គេមនៅម៉ាឡេស៊ី កាលពីឆ្នាំ២០១៧ អត្តពលិកកម្ពុជាដណ្តើមបានមេដាយមាស៣ ប្រាក់២ និងសំរឹទ្ធ១២ ដោយកាលណោះកម្ពុជាឈរលេខរៀងទី៨ លើឡាវ ព្រុយណេ និងទីម័រខាងកើត៕