មានការសម្ដែងល្ខោនខោល និងសិល្បៈចម្រុះដ៏អស្ចារ្យ នៅព្រះលានជល់ដំរី នៅយប់ថ្ងៃទី២៨ វិច្ឆិកា

ជាតិ

មានការសម្ដែងល្ខោនខោល និងសិល្បៈចម្រុះដ៏អស្ចារ្យ នៅព្រះលានជល់ដំរី នៅយប់ថ្ងៃទី២៨ វិច្ឆិកា

28, Nov 2019 , 10:28 am

រូបភាព

រូបពីលោក ប៊ុនណារិទ្ធិ

ដោយ: ប៉ូ សាគុន

ភ្នំពេញ៖ ក្រសួងវប្បធម៌ និងវិចិត្រសិល្បៈ រៀបចំព្រឹត្តិការណ៍សិល្បៈចម្រុះដ៏ធំសម្បើមមួយ ដើម្បីអបអរខួប១ឆ្នាំ នៃការដាក់បញ្ចូលល្ខោនខោលក្នុងបញ្ជីសម្បត្តិបេតិកភណ្ឌវប្បធម៌អរូបីនៃមនុស្សជាតិរបស់អង្គការយូណេស្កូ ។ កម្មវិធីនេះ ធ្វើឡើងក្រោមប្រធានបទ«រាត្រីចងចាំ» ដែលប្រព្រឹត្តទៅនៅល្ងាចថ្ងៃទី២៨ វិច្ឆិកា នៅទីតាំងព្រះលានជល់ដំរី នៃប្រាសាទអង្គរធំខេត្តសៀមរាប។

ដើម្បីផ្សព្វផ្សាយពីវប្បធម៌ និងអរិយធម៌ខ្មែរដ៏សម្បូរបែប ព្រឹត្តិការណ៍សិល្បៈនេះនឹងសម្ដែងអំពីសម្លេងឧបករណ៍ខ្មែរនាសម័យអង្គរ របាំអប្សរា ល្ខោនស្រមោលស្បែកធំ ចាប៉ីដងវែង ការប្រគំតន្ត្រីស្គរជ័យ ការសម្ដែងឈុតខ្លី នៃទម្រង់ល្ខោនខោល “វគ្គមួយក្នុងរឿងរាមកេរ្តិ៍”។ ការបង្ហាញអំពីកងទ័ពហនុមាន ពលស្វា យក្សា អសុរា ក្នុងការធ្វើសឹកសង្គ្រាម។

ការសម្ដែងសិល្បៈបុរាណចម្រុះនេះ ក្នុងគោលបំណងប្រារព្វខួប១ឆ្នាំ នៃការដាក់បញ្ចូលល្ខោនខោល ជាសម្បត្តិបេតិកភណ្ឌវប្បធម៌អរូបីនៃមនុស្សជាតិ។ ដើម្បីលើកស្ទួយទម្រង់សិល្បៈល្ខោនខោល និងផ្សព្វផ្សាយដល់ស្រទាប់យុវជន ឱ្យបានដឹងបានស្គាល់នូវភាពអស្ចារ្យនៃសិល្បៈ ដែលជាស្នាដៃរបស់បុព្វបុរសខ្មែរ។ ក៏ដើម្បីចូលរួមផ្សព្វផ្សាយពីសក្តានុពលនៃវិស័យទេសចរណ៍ និងបរិស្ថានបៃតងផងដែរ។

សូមបញ្ជាក់ថា ល្ខោនខោលបានចុះក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិ នៅថ្ងៃទី២៨ ខែវិច្ឆិកា ឆ្នាំ២០១៨៕

អត្ថបទទាក់ទង

ខួប១ឆ្នាំនៃការដាក់បញ្ជូលល្ខោនខោល ក្នុងបេតិកភណ្ឌពិភពលោក