ជាតិ
នយោបាយជាតិ
ស្ថាប័នប៉ូលិសកម្ពុជា គាំទ្រការចាត់វិធានការលើបាតុករហុងកុង
× ឧត្តមសេនីយ៍ឯក ឆាយ គឹមខឿន អគ្គស្នងការរងនិងជាអ្នកនាំពាក្យអគ្គស្នងការដ្ឋានគរបាលជាតិកម្ពុជា បានបង្ហាញការគាំទ្រលើចំណាត់ការនិងការអនុវត្តច្បាប់របស់រដ្ឋាភិបាលហុងកុង ដើម្បីស្តារទីក្រុងហុងកុង ឲ្យវិលទៅរកសភាពដើមវិញ។ នេះបើតាមការចុះផ្សាយរបស់អគ្គស្នងការដ្ឋាននគរបាលជាតិ នៅថ្ងៃទី២៧ ខែវិច្ឆិកា ឆ្នាំ២០១៩។
ការបង្ហាញជំហររបស់លោក ឆាយ គឹមខឿន គឺជាការឆ្លើយតបនឹងសំណួររបស់ក្រុមសារព័ត៌មានក្នុងស្រុក ដែលចង់ដឹងអំពីប្រតិកម្មរបស់ស្ថាប័ននគរបាលកម្ពុជា ជុំវិញចំណាត់ការរបស់នគរបាលហុងកុង ទៅលើក្រុមបាតុករ។ គេហទំព័ររបស់អគ្គស្នងការដ្ឋាននគរបាលជាតិ បានស្រង់សម្តីរបស់លោក ឆាយ គឹម ខឿន ទៅចុះផ្សាយថា៖«យើង អត់ចង់ឃើញស្ថានការណ៍អាប់អួ ប្រកបទៅដោយមហន្ដរាយបែបនេះទេ»។
អគ្គស្នងការរងរូបនេះ បន្តថា៖«ជាទស្សនៈ និងជាជំហររបស់យើង គឺយើងគាំទ្រចំពោះរដ្ឋាភិបាលហុងកុង ក្នុងការចាត់វិធានការសមស្រប ដើម្បីអនុវត្ដវិធានការច្បាប់ ដើម្បីស្រោចស្រង់ និងដោះស្រាយសភាពការណ៍ ដែលបានកើតឡើង និងកំពុងតែគំរាមកំហែងទីក្រុងហុងកុង រហូតដល់ថ្ងៃនេះ។ នេះ គឺជាភាពចាំបាច់ ដែលត្រូវដោះស្រាយ ដើម្បីស្ដារប្រក្រតីភាព ដើម្បីពង្រឹងស្ថិរភាព សន្ដិសុខ សណ្ដាប់ធ្នាប់សង្គម នៅទីក្រុងហុងកុង ឲ្យបានល្អប្រសើរឡើងវិញ»។
កាលពីខែសីហា ឆ្នាំ២០១៩ ក្រសួងការបរទេសកម្ពុជា ក៏បានចេញសេចក្តីថ្លែងការណ៍គាំទ្ររដ្ឋាភិបាលចិន និងតំបន់រដ្ឋបាលហុងកុងផងដែរ ក្នុងការចាត់វិធានការទៅលើក្រុមបាតុករ។ តាមរយៈសេចក្តីថ្លែងការណ៍នាពេលនោះ ក្រសួងការបរទេសកម្ពុជា សរសេរដូច្នេះថា៖«កម្ពុជា ចង់ឃើញការវិលត្រឡប់មករកប្រក្រតីភាពឲ្យបានឆាប់នូវជីវភាពរស់នៅប្រកបដោយសុខសន្តិភាពរបស់ប្រជាជនហុងកុងទាំងមូល»៕
Tag:
ឆាយ គឹមខឿន
ហុងកុង
បាតុកម្ម
© រក្សាសិទ្ធិដោយ thmeythmey.com