អន្តរជាតិ
កូរ៉េខាងជើង បាញ់គ្រាប់ផ្លោងថ្ងៃនេះ ខណៈអាមេរិកផ្ដើមអបអរបុណ្យ Thanksgiving មីស៊ីលដែលកូរ៉េខាងជើងបាញ់នាពេលកន្លងមក។ រូបថត KCNA
× កូរ៉េខាងជើង នៅថ្ងៃទី២៨ ខែវិច្ឆិកា បានបាញ់គ្រាប់ផ្លោងជាថ្មី។ នេះបើតាមការប្រកាសរបស់យោធាកូរ៉េខាងត្បូង ប៉ុន្តែមិនបានផ្ដល់ព័ត៌មានលម្អិតទាក់ទងគ្រាប់ផ្លោងនេះឡើយ។ ការបាញ់នេះ ធ្វើឡើងខណៈអាមេរិកផ្ដើមអបអរថ្ងៃបុណ្យ Thanksgiving ដែលជាថ្ងៃឈប់សម្រាកដ៏ធំមួយរបស់ប្រជាជនអាមេរិក។
ក្នុងការជូនដំណឹងបន្ទាន់នៅថ្ងៃទី២៨ ខែវិច្ឆិកា យោធាកូរ៉េខាងត្បូង មិនបានបញ្ជាក់ពីប្រភេទគ្រាប់ផ្លោងនេះ ជាមីស៊ីល ឬជាអ្វីឡើយ ។ យោធាកូរ៉េខាងត្បូងបន្តថា កូរ៉េខាងជើងបានបាញ់គ្រាប់ផ្លោងពីរគ្រាប់ ចេញពីខេត្ត Hamkyong ខាងត្បូង។
នេះជាការបាញ់លើកទី១៣ហើយរបស់កូរ៉េខាងជើងនៅឆ្នាំ២០១៩ នេះ ខណៈដែលការចរចារជាមួយអាមេរិកលើការរំសាយនុយក្លេអ៊ែរកំពុងជាប់គាំង។ ការបាញ់លើកចុងក្រោយ ធ្វើឡើងនៅថ្ងៃទី៣១ ខែតុលា ដែលកាលនោះប្រមុខដឹកនាំកូរ៉េខាងជើង គីម ជុងអ៊ុន បានត្រួតពិនិត្យការបាញ់មីស៊ីលពីរគ្រាប់ចេញពីប្រព័ន្ធបាញ់រ៉ក្កែតចម្រុះ សំដៅសមុទ្រខាងកើត។
ការបាញ់នេះ ក៏ធ្វើឡើងមួយថ្ងៃក្រោយជំនួបមេដឹកនាំកូរ៉េខាងត្បូង និងរដ្ឋសមាជិកអាស៊ាននៅទីក្រុងប៊ូសាន។ មុនជំនួបនេះ លោក គីម ក៏បញ្ជាឲ្យធ្វើសមយុទ្ធមួយក្ឌាំងនៅក្បែរព្រំដែនចែងចែកឧបទ្វីបកូរ៉េផងដែរ៕
© រក្សាសិទ្ធិដោយ thmeythmey.com