ជាតិ
សង្គមជាតិ
ជំនួបរវាងលោក អ៊ិត សំហេង និង អ្នកស្រី Heaeun Choi (រូបពីក្រសួងការងារ )
×![]()
ដោយ: ផាត ដាណេ
ភ្នំពេញ៖ គណៈប្រតិភូនៃទីភ្នាក់ងារសុខភាព និងសុវត្ថិភាពការងារនៃសាធារណរដ្ឋកូរ៉េ (KOSHA) សន្យាថានឹងបន្តជួយលើកកម្ពស់សុវត្ថិភាព និងសុខភាពការងារកម្មករតាមរោងចក្រនិងតាមសហគ្រាសនានានៅកម្ពុជាឲ្យកាន់តែមានភាពល្អប្រសើរឡើង។ នេះជាការលើកឡើងរបស់លោកស្រី Heaeun CHOI អគ្គនាយករងនៃអគ្គនាយកដ្ឋានអភិវឌ្ឍកិច្ចសហប្រតិបត្តិការក្រសួងការងាររបស់នៃសាធារណរដ្ឋកូរ៉េ ក្នុងជំនួបជាមួយលោក អ៊ិត សំហេង រដ្ឋមន្ត្រីក្រសួងការងារកម្ពុជា នៅថ្ងៃទី២៩ ខែវិច្ឆិកា ឆ្នាំ២០១៩។ 
ក្រសួងការងារ បានចុះផ្សាយថា លោក អ៊ិត សំហេង បានស្វាគមន៍ចំពោះកិច្ចសហប្រតិបត្តិការលើគ្រប់វិស័យរវាងកម្ពុជានិងកូរ៉េ ពិសេសសំដៅលើការលើកកម្ពស់សុវត្ថិភាព និងសុខុមាលភាពកម្មករនៃប្រទេសទាំង២។ ក្នុងនោះដែរ លោករដ្ឋមន្ត្រី បានស្នើឲ្យភាគីកូរ៉េ ពន្លឿនអនុវត្តគម្រោងនៃការសិក្សាស្រាវជ្រាវ និង ការរៀបចំច្បាប់ស្ដីពីសុវត្ថិភាព និងសុខភាពការងារ ឲ្យហើយក្នុងឆ្នាំ២០២៣។
ការស្នើនេះ គឺដើម្បីកាត់បន្ថយគ្រោះថ្នាក់ការងារ និង ជំងឺរបស់កម្មករនៅតាមសហគ្រាសនីមួយៗ។ ចំពោះច្បាប់នេះ ត្រូវបានអនុវត្តប្រើក្នុងតំបន់អាស៊ានហើយ មានតែកម្ពុជា និងឡាវតែប៉ុណ្ណោះ ដែលមិនទាន់អនុវត្ត។
អ្នកស្រី Heaeun CHOI បានបញ្ជាក់ថា រដ្ឋាភិបាលនៃសាធារណរដ្ឋកូរ៉េ កំពុងរៀបចំច្បាប់គតិយុត្តិ ហើយនឹងសិក្សាបន្ថែម ដើម្បីឲ្យមានការធានាថា ក្រោយពីមានការអនុវត្តច្បាប់នេះហើយ នឹងទទួលបានការគាំទ្រពីគ្រប់ភាគីពាក់ព័ន្ធ និងផ្ដល់ឲ្យកម្មករនូវផលប្រយោជន៍កាន់តែប្រសើរ។ ភាគីកូរ៉េ បានបញ្ជាក់ទៀតថា នឹងនៅតែបន្តគាំទ្រលើកកម្ពស់សុវត្ថិភាព និងសុខភាពការងារកម្មករកម្ពុជា ឲ្យរឹតតែមានភាពល្អប្រសើរឡើង។
លោករដ្ឋមន្ត្រី បានបន្ថែមថា ការរៀបចំច្បាប់នេះ គឺបានកំណត់ក្នុងកម្មវិធីទី១ នៃផែនការយុទ្ធសាស្ត្រអភិវឌ្ឍវិស័យការងារ និងបណ្ដុះបណ្ដាលវិជ្ជាជីវៈ ដំណាក់កាលទី២ ចាប់ពីឆ្នាំ២០១៩-២០២៣ ដែលជាការយកចិត្តទុកដាក់លើសុខុមាលភាព និងសុវត្ថិភាពការងារ។ ការរៀបចំច្បាប់នេះ ក៏នឹងរួមចំណែកកែលម្អ បំពេញការខ្វះខាតលើវិស័យ ការងារ សុខុមាលភាព និងវឌ្ឍនភាព ពិពិធកម្មផ្នែកសេដ្ឋកិច្ច សង្គមកម្ពុជា ព្រមទាំងជាការប្រកួតប្រជែងក្នុងតំបន់ និងអន្តរជាតិ។
សូមបញ្ជាក់ថា តាមរយៈគម្រោងសម្រាប់ពេល៣ឆ្នាំ (២០១៩-២០២៣) គឺរៀបចំធ្វើឡើងក្នុងគោលបំណងសិក្សាស្រាវជ្រាវ និងរៀបចំច្បាប់ស្ដីពីសុវត្ថិភាព និងសុខភាពការងារ ដែលនាយកដ្ឋានពេទ្យនៃក្រសួងការងារ ជាអ្នកអនុវត្តគម្រោងដោយគាំទ្រផ្នែកបច្ចេកទេស និងហិរញ្ញវត្ថុពីក្រសួងមុខរបរការងារ និង KOSHA ដែលប្រើប្រាស់ថវិកាសរុបជាង២៧ម៉ឺនដុល្លារ៕
Tag:
កូរ៉េ-កម្ពុជា
វិស័យការងារ
កម្មករ
សុខភាព
© រក្សាសិទ្ធិដោយ thmeythmey.com
