កីឡាជាតិ
ជាតិ
×![]()
ដោយ: ថ្មីៗ
ក្រសួងអប់រំ យុវជន និងកីឡា នាថ្ងៃទី២៨ ខែវិច្ឆិកា បានចេញសេចក្តីប្រកាសព័ត៌មានស្តីពីការសាងសង់ និងគ្រប់គ្រងទីលានបាល់ទាត់ក្នុងបរិវេណវិទ្យាល័យបឹងត្របែក រាជធានីភ្នំពេញ។ ក្រសួងបានបញ្ជាក់ពីគម្រោងនេះ ថា ជាការអនុវត្តតាមគោលនយោបាយអភិវឌ្ឍវិស័យអប់រំកាយ និងកីឡា ក៏ដូចជាការត្រៀមខ្លួនដើម្បីធ្វើជាម្ចាស់កីឡាស៊ីហ្គេមឆ្នាំ២០២៣។
ទីលានបាល់ទាត់មួយដែលមានលក្ខណៈស្តង់ដាក្នុងបរិវេណវិទ្យាល័យបឹងត្របែក នឹងត្រូវសាងសង់ឡើងក្រោមការផ្តួចផ្តើមរបស់ក្រសួងអប់រំ យុវជន និងកីឡា ដើម្បីលើកកម្ពស់វិស័យកីឡាបាល់ទាត់ ឈានទៅដណ្តើមបានលទ្ធផលល្អលើឆាកអន្តរជាតិ។
តាមរយៈសេចក្តីជូនដំណឹងរបស់ខ្លួន ក្រសួងអប់រំ បានបញ្ជាក់ថា ទីលាននោះ មានបណ្តោយ១១០ម៉ែត្រ និងទទឹង៧០ម៉ែត្រ ដោយមានវេទិកាទស្សនាផងដែរ។ ការសាងសង់នេះ ប្រើប្រាស់ថវិកាជាតិ ដែលទទួលបានពីក្រសួងសេដ្ឋកិច្ច និងហិរញ្ញវត្ថុ ហើយទទួលបន្ទុកសាងសង់ដោយនាយកដ្ឋានសំណង់នៃក្រសួងអប់រំ។
ទីលានស្តង់ដានេះ នឹងស្ថិតក្រោមការគ្រប់គ្រងរបស់វិទ្យាល័យបឹងត្របែកផ្ទាល់ ហើយក្រសួងអប់រំ បន្តជួយគាំទ្របន្ថែម។ ក្រសួងបានក្រើនរំលឹកថា ក្រោយសាងសង់រួចរាល់ ទីលានបាល់ទាត់នោះ នឹងត្រូវប្រើប្រាស់ជាប្រយោជន៍សាធារណៈសម្រាប់សិស្ស និស្សិត បុគ្គលិកអប់រំ និងមន្ត្រីក្រសួង ក៏ដូចជាសកម្មភាពផ្លូវការផ្សេងៗ ដោយមិនមានការអនុញ្ញាតសម្រាប់គោលដៅអាជីវកម្មណាមួយឡើយ៕
Tag:
ទីលានបាល់ទាត់
បឹងត្របែក
© រក្សាសិទ្ធិដោយ thmeythmey.com
