ជាតិ
សេដ្ឋកិច្ច
វិស័យស្រូវអង្ករ ត្រូវការថវិកាខ្ទង់រយលានដុល្លារបន្ថែម ដើម្បីប្រមូលទិញពីកសិករ រូបពីមន្ទីរកសិកម្មខេត្តព្រះវិហារ
× បើតាមលោក សុង សារ៉ន ប្រធានសហព័ន្ធស្រូវអង្ករកម្ពុជា(CRF) អ្នកប្រមូលទិញ-រោងម៉ាស៊ីនកិនស្រូវ មានលទ្ធភាពអាចទិញស្រូវចូលស្តុកសម្រាប់នាំចេញ គឺត្រឹម៣ខែ ដែលស្មើនឹងប្រមាណ ៣០ម៉ឺនតោនស្រូវ។ លោកប្រាប់ថា ជាការល្អសម្រាប់វិស័យនេះ គឺលុះណាតែកម្ពុជាអាចប្រមូលទិញស្តុកយ៉ាងតិច៦ខែ ដែលគិតជាស្រូវ ៨០ម៉ឺន ទៅ១លានតោន ដែលត្រូវការថវិកាបន្ថែមមិនតិចជាង១០០លានដុល្លារទៀតនោះទេ ទើបអាចបត់បែនតាមស្ថានភាពទីផ្សារអន្តរជាតិបានល្អ។
ប្រសាសន៍របស់លោក សុង សារ៉ន អំពីស្ថានភាពទីផ្សារស្រូវអង្ករសព្វថ្ងៃ និងតម្រូវការថវិកាបន្ថែម៖
«ដោយហេតុថា កម្ពុជាដាំប្រភេទអង្ករក្រអូប និងផ្ការំដួលច្រើន ដែលប្រភេទអង្ករទាំងនេះភាគច្រើនកម្ពុជានាំចេញដោយផ្ទាល់ មិនបាច់ឲ្យវៀតណាមមកទិញទេ។ ហើយដើម្បីឲ្យយើងទិញបានឲ្យបានកំណើនទាំងបរិមាណ និងគុណភាព គឺយើងត្រូវការខ្ទង់២០០លានដុល្លារដើម្បីទិញស្តុកទុកសម្រាប់កិនកែច្នៃ ឲ្យបានរយៈពេល៦ខែ។ ហើយដូចខ្ញុំជម្រាប់អ៊ីចឹង លុយយើងមានប្រហាក់ប្រហែល១០០លានដុល្លារ ប្រើតែ៣ខែគឺអស់ហើយ»។ នេះជាការគូសបញ្ជាក់របស់លោក សុង សារ៉ន ប្រាប់សារព័ត៌មានថ្មីៗ នៅថ្ងៃទី២៩ខែវិច្ឆិកានេះ។
ប្រធាន CRF និងជាអគ្គនាយកក្រុមហ៊ុន AmruRice រូបនេះ អះអាងថា បើកម្ពុជាមានលទ្ធភាពទិញស្រូវស្តុកដល់៦ខែមែន នោះអាចទប់ទល់នឹងការប្រែប្រួលទីផ្សារអន្តរជាតិបានល្អប្រសើរ ពោលគឺបើមានលទ្ធភាពស្តុកបានយូរ អាចរង់ចាំទីផ្សារល្អបានលក់ចេញ។ លោករៀបរាប់បែបនេះ៖«ជាការពិតការប្រែប្រួលគឺមាន ប៉ុន្តែទីផ្សារចាប់បើកឡើងវិញនៅខែមករា(ឆ្នាំក្រោយ) ឧទាហរណ៍ថាមានការទិញឡើងវិញតែយើងអស់ស្រូវរលីង នោះជាវិបិត្ត។ ជាការពិតយើងត្រូវត្រៀមខ្លួន យើងកសាងឃ្លាំង ឡសម្ងួតគ្រប់គ្រាន់ហើយ តែខ្វះខាតដើម្បីទិញនូវពេលប្រមូលផល និងទប់ស្កាត់ពេលដែលប្រទេសនាំចូល មានការពន្យារទិញ»។
តម្រូវការថវិកាបន្ថែមក្នុងវិស័យស្រូវអង្ករនេះ លោក សុង សារ៉ន សង្ឃឹមទៅលើរដ្ឋាភិបាល និងធនាគារពាណិជ្ជ។
ទាក់ទិននឹងតម្រូវការថវិកាសម្រាប់ប្រមូលទិញស្រូវនេះ លោក កៅ ថាច អគ្គនាយកធនាគារអភិវឌ្ឍន៍ជនបទ(RDB) ដែលជាធនាគាររបស់រដ្ឋ បានអះអាងថា ររដ្ឋបានបញ្ចេញកញ្ចប់ថវិកា៥០លានដុល្លារចំនួនពីរម្ដងរួចមកហើយក្នុងឆ្នាំនេះ ហើយមិនមានកញ្ចប់អ្វីបន្ថែមទៀតទេ។ លោកឲ្យដឹងដូច្នេះថា៖«កញ្ចប់ថវិកាពិសេស យើងបានទម្លាក់អស់ហើយ យើងទម្លាក់២វគ្គហើយ ទម្លាក់កាលស្រូវសែនក្រអូបវគ្គទី១ ហើយទម្លាក់ទី២គឺរដូវស្រូវផ្ការំដួលនេះ»។ លោក កៅ ថាច អះអាងបន្ថែមថា ឥណទានដែលបញ្ចេញទៅនេះ ខាងរោងម៉ាស៊ីនកិនស្រូវ បង្វិលសងមិនទាន់ សម្រាប់ឲ្យRDB យកមកបញ្ចេញម្ដងទៀតក្នុងរដូវប្រមូលផលបន្តបន្ទាប់ ក្នុងខែធ្នូ និងខែមករានោះឡើយ។
ប្រសាសន៍លោក កៅ ថាច៖
បើតាមលោក កៅ ថាច វិស័យស្រូវអង្ករត្រូវការប្រមាណ២០០ ទៅ២៥០លានដុល្លារបន្ថែមទៀត សម្រាប់ការប្រមូលផលផ្កាម្លិះក្នុងខែធ្នូ និងស្រូវសែនក្រអូបវគ្គ២ ចាប់ពីខែមករា។
ជាមួយគ្នានេះ លោក កៅ ថាច អំពាវឲ្យធនាគារពាណិជ្ជបញ្ចេញឥណទានដល់វិស័យស្រូវអង្ករ ឲ្យបានច្រើន ដើម្បីជួយបំពេញតម្រូវការថវិកានេះ។ លោកថ្លែងប្រាប់សារព័ត៌មានថ្មីៗថា៖«សូមឲ្យខាងធនាគារពាណិជ្ជមួយចំនួនធំ ដែលគាត់មានមូលនិធិថវិកាដែលអាចប្រើបាន នៅច្រើនមែនទែន តែគាត់អត់ហ៊ានចូលមក។ ខ្ញុំសុំជម្រាបថា ការយកស្តុកស្រូវធ្វើជាវត្ថុបញ្ចាំនេះ គឺមានហានិភ័យតិចតួចណាស់ តែខាងធនាគារពាណិជ្ជអត់ហ៊ានចូលមក ខ្លាចថាហានិភ័យច្រើន។ បើពួកគាត់ចូលរួមតែបួនដប់ធនាគារត្រឹម១០០ ឬ២០០លានដុល្លារ ដូចអត់មានអ្វីពិបាក»។
ដោយឡែកលោក អ៊ិន ចាន់នី ប្រធានសមាគមធនាគារនៅកម្ពុជា និងជាប្រធាននាយកប្រតិបត្តិធនាគារអេស៊ីលីដា អះអាងថា មូលនិធិសម្រាប់វិស័យស្រូវអង្ករដែលបញ្ចេញដោយធនាគារពាណិជ្ជ គឺមិនខ្វះនោះទេ ពោលគឺអាចឆ្លើយតបនឹងម្រូវការបាន។ លោកប្រាប់ថា គ្រាន់តែធនាគារអេស៊ីលីដា តែមួយ បានបញ្ចេញឥណទានដែលកំពុងដំណើរការ ដល់វិស័យកសិកម្ម(ស្រូវអង្ករក្នុងនោះដែរ) ប្រមាណ ៧០០លានដុល្លារដែលស្មើ២០ភាគរយនៃឥណទានសរុបរបស់ធនាគារមួយនេះ ឬ ៤០ភាគរយនៃឥណទានសរុបក្នុងវិស័យកសិកម្មនៅកម្ពុជា។ លោកមានប្រសាសន៍ដូច្នេះថា៖«យើងបានធ្វើច្រើនមែនទែនជាមួយវិស័យកសិកម្ម ហើយឥឡូវយើងក៏នៅតែមានមូលនិធិបន្តដែរ ឲ្យតែមានអតិថិជនត្រូវការយើងផ្ដល់ជូន»។
លោក អ៊ិន ចាន់នី បន្តថា មូលនិធិឥណទានសម្រាប់វិស័យកសិកម្មក្នុងរដូវប្រមូលផលនេះ គឺមិនខ្វះទេ ដែលបញ្ចេញដោយធនាគារពាណិជ្ជនៅកម្ពុជា។ លោកគូសបញ្ជាក់ដូចនេះថា៖«រដូវនេះជារដូវប្រមូលផល ធនាគារនីមួយៗយកចិត្តទុកដាក់ដើម្បីឆ្លើយតបនឹងតម្រូវការ។ ក្នុងវិស័យធនាគារទាំងមូល មិនខ្វះទេមូលនិធិសម្រាប់វិស័យកសិកម្ម ព្រោះយើងដឹងហើយថាដែលមានសុវត្ថិភាពបំផុតក្នុងការផ្ដល់ឥណទានដល់វិស័យកសិកម្ម គឺខែប្រមូលនេះហើយ អ៊ីចឹងអ្នកណាទៅរារែកផ្ដល់ឥណទាន»៕
Tag:
ស្រូវអង្ករ
សុង សារ៉ន
កៅ ថាច
អ៊ិន ចាន់នី
© រក្សាសិទ្ធិដោយ thmeythmey.com