កីឡាជាតិ
ជាតិ
កីឡាការិនី កែ ឡេង (រូបក្នុងរង្វង់) និងកីឡាការិនី ស៊្រាង សុរ៉ាឃីម, រូបពី SEA Games 2023
×![]()
ម្ចាស់មេដាយមាសពិភពលោក៤ជំនាន់ កីឡាការិនី កែ ឡេង ជឿជាក់ថា កីឡាការិនី ស្រ៊ាង សុរ៉ាឃីម នឹងអាចស្នងតំណែង ពេលខ្លួនចូលនិវត្តន៍។ តែយ៉ាងណាអ្នកស្រីសង្កេតឃើញថា សុរ៉ាឃីម ជាកីឡាការិនីមានសមត្ថភាព តែហាក់នៅខ្សោយផ្នែកស្មារតី។ កីឡាការិនីវ័យ៥៧ឆ្នាំរូបនេះ អាចនឹងចូលនិវត្តន៍ ក្រោយត្រឡប់មកពីចូលរួមព្រឹត្តិការណ៍កីឡាស៊ីហ្គេមនៅហ្វីលីពីនឆ្នាំនេះ។
វីរកីឡាការិនី កែ ឡេង ម្ចាស់មេដាយមាសពិភពលោក៤ជំនាន់មិនទាន់កំណត់ពេលវេលាក្នុងការចូលនិវត្តន៍នៅឡើយទេ ទោះបីមានវ័យកាន់តែច្រើនក៏ដោយ។ ប៉ុន្តែកីឡាការិនីរូបនេះ បានសំឡឹងឃើញកីឡាការិនីជំនាន់ក្រោយ ដែលអាចស្នងតំណែងខ្លួនហើយ។ ស្រ៊ាង សុរ៉ាឃីម ជាកីឡាការិនីប៉េតង់ ដ៏មានសក្តានុពលមួយរូប ដែលកីឡាការិនីវ័យ៥៧ឆ្នាំរូបនេះ ជឿជាក់ថា នឹងអាចមានសមត្ថភាពស្នងតំណែងលើវិញ្ញាសាវាយយកពិន្ទុ។ តែយ៉ាងណា ទាមទារឲ្យ សុរ៉ាឃីម ត្រូវខិតខំព្យាយាមហ្វឹកហាត់ពង្រឹងសមត្ថភាពបន្ថែម ពិសេសលើផ្នែកស្មារតី។
«ខ្ញុំមើលឃើញ(អ្នកស្នងតំណែង)..ប៉ុន្តែឥឡូវនេះខ្ញុំទាន់ហ៊ានវាយតម្លៃយ៉ាងម៉េចទេ។ ខ្ញុំគិតថា កីឡាការិនី ស្រ៊ាង សុរ៉ាឃីម នឹងអាចឈានដល់កម្រិតបាន(មានសមត្ថភាពខ្លាំង)។ ប៉ុន្តែគ្រាន់តែពេលចូលប្រកួត គាត់ហាក់ដូចបាត់បង់ស្មារតីបន្តិច»។ នេះជាការលើកឡើងរបស់កីឡាការិនី កែ ឡេង ក្រោយឈ្នះមេដាយមាសលើវិញ្ញាសាវាយយកពិន្ទុ ក្នុងព្រឹត្តិការណ៍ជើងឯកពិភពលោកស្ត្រី និងយុវជនលើកទី១៧ ដែលកម្ពុជាធ្វើជាម្ចាស់ផ្ទះចាប់ពីថ្ងៃទី១៩-២៣ ខែវិច្ឆិកា ដោយមាន៤៩ប្រទេសចូលរួម។
ការសំឡឹងមើលកីឡាការិនីជំនាន់ក្រោយ ដើម្បីស្នងតំណែងទុកមុននេះ ព្រោះវីរកីឡាការិនី កែ ឡេង ទំនងជាអាចប្រកាសចូលនិវត្តន៍ក្រោយត្រឡប់មកពីចូលរួមការប្រកួតកីឡាស៊ីហ្គេមលើកទី៣០នៅហ្វីលីពីនឆ្នាំនេះ។ តែយ៉ាងណាវាអាស្រ័យលើស្ថានភាពជាក់ស្តែង ព្រោះកីឡាការិនីមកពីខេត្តកំពង់ឆ្នាំងរូបនេះអះអាងថា បើសិនសុខភាព ភ្នែក និងកម្លាំងនៅល្អ ខ្លួនប្រហែលអាចនៅបន្តរហូតដល់ការប្រកួតជើងឯកពិភពលោកម្តងទៀត។
ទោះបីមិនបង្ហាញហេតុផល តែតាមរយៈសមត្ថភាព បទពិសោធ និងសមិទ្ធផលលើឆាកអន្តរជាតិកន្លងមករបស់ ស្រ៊ាង សុរ៉ាឃីម អាចជាហេតុផលសម្រាប់វីរកីឡាការិនី កែ ឡេង ក្នុងការជឿជាក់លើរូបនាង។ ក្រោយប្រឡូកក្នុងវិស័យកីឡាប៉េតង់ប្រមាណ៥ឆ្នាំ កីឡាការិនីវ័យ២០ឆ្នាំរូបនេះ សម្រេចបានសមិទ្ធផលជាច្រើនទាំងលើថ្នាក់ជាតិ និងអន្តរជាតិ។ សមិទ្ធផលធំៗរបស់ នាង រួមមានមេដាយប្រាក់ និងសំរឹទ្ធពិភពលោកកាលពីឆ្នាំ២០១៧ និងមេដាយមាស Asian Beach Games នៅវៀតណាមឆ្នាំ២០១៦។
ក្រៅពីនេះក៏មានសមិទ្ធផលជាច្រើនទៀតផងដែរ។ សមិទ្ធផលដ៏ត្រចះត្រចង់នេះ ជួយឲ្យកីឡាការិនីមកពីខេត្តតាកែវរូបនេះ មាន កិត្តិយសនិងកេរ្តិ៍ឈ្មោះល្បីល្បាញ។ លើសពីនេះនាងទទួលបានអាហារូបករណ៍សិក្សានៅសាកលវិទ្យាល័យអាស៊ីអឺរ៉ុប១០០ភាគរយ និងការងារក្នុងក្របខណ្ឌក្រសួងការពារជាតិទៀតផង។
កូនច្បងក្នុងចំណោមបងប្អូនពីរនាក់នៃគ្រួសារមានជីវភាពធូរធារមួយនៅក្នុងស្រុកអង្គរបូរី ខេត្តតាកែវរូបនេះ បានចូលប្រឡូកក្នុងវិស័យកីឡាប៉េតង់តាំងពីរៀននៅសាលាបឋមសិក្សាមកម្ល៉េះ។ ប៉ុន្តែនាងត្រូវបានសហព័ន្ធកីឡាប៊ូល និងប៉េតង់កម្ពុជាជ្រើសរើសឲ្យធ្វើជាកីឡាការិនីថ្នាលនៅឆ្នាំ២០១៤ ក្រោយ នាង ដណ្តើមបានមេដាយសំរឹទ្ធក្នុងការប្រកួតជើងឯកថ្នាក់ជាតិ ដែលរៀបចំដោយសហព័ន្ធ នៅពហុកីឡដ្ឋានជាតិ។
មុនមកចូលរួមជាមួយសហព័ន្ធប៊ូល និងប៉េតង់កម្ពុជា សុរ៉ាឃីម ជាកីឡាការិនីឆ្នើមមួយរូបប្រចាំវិទ្យាល័យអង្គរបូរី ខេត្តតាកែវ។ នាង ធ្លាប់ទទួលបានរង្វាន់លើកទឹកចិត្តម៉ូតូមួយគ្រឿង ក្រោយ នាងដណ្តើមបានមេដាយមាសក្នុងការប្រកួតដណ្តើមជើងឯកពានរង្វាន់ឧបនាយករដ្ឋមន្ត្រី សុខ អាន ដែលជាការប្រកួតជម្រើសថ្នាក់ខេត្ត។ រង្វាន់លើកទឹកចិត្តនេះហើយ ដែលជំរុញឲ្យ សុរ៉ាឃីម មានទឹកចិត្តខិតខំហ្វឹកហាត់ និងស្រលាញ់កីឡានេះកាន់តែខ្លាំង៕
Tag:
កែ ឡេង
ស្រ៊ាង សុរ៉ាឃីម
ប៉េតង់
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
