អន្តរជាតិ
ចិន ចោទមេសិទ្ធិមនុស្ស UN ថាលូកដៃចូលកិច្ចការផ្ទៃក្នុងសំណុំរឿងហុងកុង លោកស្រី Michelle-Bachelet ឧត្តមស្នងការទទួលបន្ទុកកិច្ចការសិទ្ធិមនុស្សអង្គការសហប្រជាជាតិ (AFP)
× រដ្ឋាភិបាលក្រុងប៉េកាំង នៅថ្ងៃសៅរ៍ ៣០ វិច្ឆិកា បានចោទប្រកាន់ឧត្តមស្នងការទទួលបន្ទុកសិទ្ធិមនុស្សអង្គការសហប្រជាជាតិ (UNCHR) លោកស្រី Michelle Bachelet ថាជ្រៀតជ្រែកកិច្ចការផ្ទៃក្នុងរបស់ប្រទេសចិន ក្រោយពីលោកស្រីបានស្នើសុំឲ្យបើកការស៊ើបអង្កេតលើការប្រើកម្លាំងជ្រុលហួសហេតុពីសំណាក់ប៉ូលិសហុងកុង។
ស្ថានបេសកកម្មអចិន្ត្រៃយន៍របស់ចិនប្រចាំ UN ក្នុងទីក្រុងហ្សឺណែវ ប្រទេសស្វីស បានលើកឡើងថា អត្ថបទ Op-ed មួយដែលសរសេរដោយលោកស្រី Bachelet ក្នុងកាសែតហុងកុង South China Morning Post គឺជាមិនត្រឹមត្រូវ ហើយល្មើសនឹងគោលបំណងនិងគោលការណ៍របស់ធម្មនុញអង្គការសហប្រជាជាតិ។
តាមរយៈសេចក្តីថ្លែងការណ៍ ស្ថានបេសកកម្មនេះ បញ្ជាក់ថា អត្ថបទនេះមានរំលេច យោបល់មិនសមរម្យលើស្ថានភាពនៃតំបន់រដ្ឋបាលពិសេសហុងកុង ហើយជ្រៀតជ្រែកចូលកិច្ចការផ្ទៃក្នុងរបស់ចិន។ ខ្លួនសង្កត់ធ្ងន់ទៀតថា អត្ថបទរបស់លោកស្រី Bachelet នឹងធ្វើឲ្យក្រុមធ្វើកុបកម្មកាន់តែមានចរិតហិង្សាធ្ងន់ធ្ងរថែមទៀត។
ក្នុងអត្ថបទដែលបានចុះផ្សាយកាលពីព្រឹកថ្ងៃសៅរ៍កន្លងទៅ លោកស្រី Bachelet បានទទូចឲ្យអាជ្ញាធរក្នុងទីក្រុងហុងកុងបើកការស៊ើបអង្កេតដែលដឹកនាំដោយចៅក្រមដោយឡែក និងឯករាជ្យ សមរម្យមួយ ក្នុងគោលដៅបើកកកាយការពិតជុំវិញរបាយការណ៍នៃការប្រើកម្លាំងជ្រុលហួសហេតុពេកពីសំណាក់ប៉ូលិសហុងកុង។
ការតវ៉ារបស់ពលរដ្ឋហុងកុង ត្រូវបានបញ្ឆេះដោយការខឹងសម្បារជាច្រើនឆ្នាំដោយសារការយល់ឃើញរបស់ប្រទេសចិនជុំវិញការលុបបំបាត់សេរីភាពនៅទីក្រុងពាក់កណ្តាលស្វយ័តនេះ។ វាមានការប៉ះទង្គិចគ្នាដោយអំពើហិង្សាម្តងហើយម្តងទៀតរវាងប៉ូលីសនិងក្រុមបាតុករ ដែលបានអំពាវនាវឲ្យមានគណនេយ្យភាពរបស់ប៉ូលីសនិងការបោះឆ្នោតដោយសេរី។ រដ្ឋាភិបាលក្រុងប៉េកាំងបានបដិសេធរាល់ការទាមទារពីសំណាក់អ្នកតវ៉ាក្រុងហុងកុង ហើយចាត់ទុកថាជា« បដិវត្តពណ៌» ដែលគាំទ្រដោយបរទេសក្នុងគោលបំណងធ្វើឱ្យមានអស្ថិរភាពដល់ប្រទេសចិនដីគោក៕
Tag:
ចិន
UN
សិទ្ធិមនុស្ស
© រក្សាសិទ្ធិដោយ thmeythmey.com