ជាតិ
ក្រសួង រៀបចំការប្រកួត «ទីក្រុងដែលមានពិធីបុណ្យឆ្លងឆ្នាំសកលល្អជាងគេប្រចាំឆ្នាំ» រូបភាពពីហ្វេសប៊ុកក្រសួងទេសចរណ៍
× លោក ថោង ខុន រដ្ឋមន្ត្រីក្រសួងទេសចរណ៍និងជាប្រធានគណៈកម្មាធិការជាតិវាយតម្លៃទីក្រុងស្អាត បានជូនដំណឹងអំពីការរៀបចំកម្មវិធីប្រកួតប្រជែង «ទីក្រុងដែលមានពិធីបុណ្យឆ្លងឆ្នាំសកលល្អជាងគេប្រចាំឆ្នាំ» ទៅកាន់គ្រប់អភិបាលរាជធានី-ខេត្ត ដែលជាសមាជិកគណៈកម្មាធិការជាតិវាយតម្លៃទីក្រុងស្អាត។
តាមរយៈលិខិតជូនដំណឹងដែលចុះថ្ងៃទី២២ ខែវិច្ឆិកា ឆ្នាំ២០១៩ លោក ថោង ខុន លើកឡើងថា ការរៀបចំពិធីប្រកួតប្រជែងនេះ គឺដើម្បីអបអរពិធីបុណ្យឆ្លងឆ្នាំសកល២០២០ ដែលនឹងប្រព្រឹត្តទៅថ្ងៃទី៣១ ខែធ្នូ ២០១៩។ លោក បន្តថា កម្មវិធីប្រកួតនេះ នឹងត្រូវធ្វើឡើងដោយពឹងផ្អែកលើលក្ខណៈពិសេសមួយចំនួន ដូចជា ការតុបតែងរចនាលម្អ អនាម័យ បរិស្ថាន សន្តិសុខ សុខវត្ថិភាព សណ្តាប់ធ្នាប់ ភាពពេញចិត្ត ការសប្បាយរីករាយរបស់ភ្ញៀវទេសចរ និងអ្នកចូលរួម ជាដើម។
លោករដ្ឋមន្ត្រី បានស្នើទៅអភិបាលរាជធានី-ខេត្ត ដែលត្រូវរៀបចំព្រឹត្តិការណ៍ឆ្លងឆ្នាំសកល ឲ្យសម្រង់ព័ត៌មានអំពីព្រឹត្តិការណ៍ទាំងនោះ ផ្ញើទៅកាន់អគ្គលេខាធិការដ្ឋាននៃគណៈកម្មាធិការជាតិវាយតម្លៃទីក្រុងស្អាត ឲ្យបានមុនថ្ងៃទី១៦ ខែធ្នូ ឆ្នាំ២០១៩៕
Tag:
ទីក្រុងស្អាត
បុណ្យឆ្លងឆ្នាំ
© រក្សាសិទ្ធិដោយ thmeythmey.com