កីឡាអន្តរជាតិ
អន្តរជាតិ
×![]()
ដោយ: ទេព ពិទូរ្យ
ហ្វីលីពីន ចាប់ផ្តើមជម្លៀសមនុស្សរាប់ពាន់នាក់ ខណៈដែលព្យុះទីហ្វុងកំពុងបោកបក់ខ្លាំងពីសមុទ្រប៉ាស៊ីហ្វិក និងបង្ខំអ្នករៀបចំព្រឹត្តិការណ៍កីឡាស៊ីហ្គេម (SEA Games) ត្រូវលុបចោល ឬកំណត់ពេលប្រកួតឡើងវិញសម្រាប់វិញ្ញាសាមួយចំនួន។
ក្រុមអ្នកឧតុនិយមព្យាករណ៍ថាព្យុះទីហ្វុងឈ្មោះ Kammuri នឹងបង្កឲ្យមានការបាក់ដីនៅល្ងាចថ្ងៃច័ន្ទទី២ ខែធ្នូ ឬព្រឹកថ្ងៃអង្គារទី១៣ ដោយបញ្ចេញកម្លាំង ១៧០គីឡូម៉ែត្រក្នុង១ម៉ោង និងមានខ្យល់បក់អតិបរមា ១៤០គីឡូម៉ែត្រក្នុង១ម៉ោង។
ព្យុះកំណាចមួយនេះ បានចូលដល់ទឹកដីហ្វីលីពីននៅល្ងាចថ្ងៃសៅរ៍ទី៣០ ខែវិច្ឆិកាភ្លាមៗមុនប្រធានាធិបតីហ្វីលីពីន រ៉ូឌ្រីហ្គោ ឌូទើតេ និងកំពូលអ្នកប្រដាល់ប្រដាល់ Manny Pacquiao ចូលរួមបើកព្រឹត្តិការណ៍កីឡាតំបន់អាស៊ានឆ្នាំ២០១៩ នេះ។
ព្រឹត្តិការណ៍កីឡាអាស៊ីហ្គេមលើកទី៣០ ដែលរៀបចំក្នុងក្រុងម៉ានីល និងក្រុងជាប់សមុទ្រ Subic ប្រព្រឹត្តទៅចាប់ពីថ្ងៃទី៣០ ខែវិច្ឆិកា ដល់ថ្ងៃទី១១ ខែធ្នូ ឆ្នាំ២០១៩ ដោយមានអត្តពលិកជិត៦ពាន់នាក់មកពី១១ប្រទេសចូលរួម។ ពួកគេត្រូវប្រកួតប្រជែងលើ៥៦ប្រភេទកីឡា ខណៈកម្ពុជាបញ្ជូនអត្តពលិក៣១ប្រភេទកីឡាឲ្យចូលរួម។
យ៉ាងណាក៏ដោយ វិញ្ញាសាមួយចំនួនដែលធ្វើឡើងក្នុងក្រុង Subic ដែលស្ថិតនៅឆ្នេរខាងលិច កោះ Luzon អាចនឹងត្រូវប្រឈមខ្លាំងដោយសារព្យុះ Kammuri នេះ។
លោក Ramon Agregado ប្រធានគណៈកម្មាធិការរៀបចំការប្រកួតនៅប្រជុំកោះ Subic បានប្រាប់ទីភ្នាក់ងារព័ត៌មាន AFP ថា៖ «ដោយសារព្យុះនេះ ត្រូវបង្ខំចិត្តលុបចោលកម្មវិធីប្រកួតមួយចំនួន រហូតដល់អាកាសធាតុប្រសើរឡើងវិញ»។ លោក Agregado បន្ថែមថា វិញ្ញាសាកីឡាទ្រីយ៉ាត្លុងស្ត្រីដែលគ្រោងធ្វើនៅថ្ងៃទី៣ ត្រូវប្តូរពេលប្រកួតនៅថ្ងៃទី២នេះវិញ។
ដោយឡែក ទីតាំងប្រកួតផ្សេងទៀត នឹងមិនត្រូវផ្លាស់ប្តូរនោះទេ ប៉ុន្តែក្នុងករណីមានអាកាសធាតុអាក្រក់ដែលបង្កឲ្យមានការខូចខាតសមភារកីឡានោះអាចនឹងត្រូវរៀបចំប្រកួតឡើងវិញ។
គិតត្រឹមម៉ោង ១១ព្រឹកថ្ងៃទី២ ខែធ្នូនេះ ម្ចាស់ផ្ទះហ្វីលីពីនរកមេដាយបានច្រើនជាងគេរហូតដល់៤៩ ក្នុងនោះ មាស២៥ ប្រាក់១៥ និងសំរឹទ្ធិ៩។ វៀតណាមឈរលេខរៀងទី២ក្នុងតារាងដោយទទួលបានមេដាយសរុប៣៥ ក្នុងនោះ មាស១០ ប្រាក់១៣ និងសំរឹទ្ធិ១២ តាមពីក្រោយដោយថៃដែលរកបានមេដាយមាស៥ ប្រាក់៥ និងសំរឹទ្ធិ១២ សរុប២២ ម៉ាឡេស៊ី បានមាស៥ ប្រាក់២ សំរឹទ្ធិ២ សិង្ហបុរីបានមាស៣ ប្រាក់៣ សំរឹទ្ធិ៥ ឥណ្ឌូណេស៊ីបានមាស២ ប្រាក់៦ សំរឹទ្ធិ៦ ព្រុយណេបានមាស១ ប្រាក់២ សំរឹទ្ធិ១ កម្ពុជាបានបានប្រាក់៣ សំរឹទ្ធិ៦ មីយ៉ាន់ម៉ាបានប្រាក់២ សំរឹទ្ធិ៨ ឡាវបានសំរឹទ្ធិ២ ហើយនិងទីម័រខាងកើតមិនទាន់ទទួលបានមេដានៅឡើយ៕
Tag:
Sea Gaems
ហ្វីលីពីន
© រក្សាសិទ្ធិដោយ thmeythmey.com
