កីឡាជាតិ
ជាតិ
ដឹងច្បាស់ពីបច្ចេកទេសកីឡាករហ្វីលីពីន ទើប យ៉ុង ម៉េងលី ប្រឹងរហូតដល់ឈ្នះមេដាយមាស រូបភាពពី Cambodia SEA Games 2023
× កីឡាករគុនល្បុក្កតោ យ៉ុង ម៉េងលី ជាកីឡាករដំបូងគេ ដែលដណ្តើមបានមេដាយមាសឲ្យកម្ពុជាក្នុងព្រឹត្តិការណ៍កីឡាស៊ីហ្គេមនៅហ្វីលីពីនឆ្នាំនេះ។ បើតាម ម៉េងលី មេដាយមាសនេះ មានការរួមចំណែកយ៉ាងធំធេងពីគ្រូបង្វឹកជនជាតិហ្វីលីពីន ព្រោះលោកបានប្រាប់ពីបច្ចេកទេស និងតិចនិកក្នុងការផ្តួលកីឡាករម្ចាស់ផ្ទះនៅវគ្គផ្តាច់ព្រ័ត្រ។ នាយបេសកកម្មស៊ីហ្គេមកម្ពុជា លោក វ៉ាត់ ចំរើន ចាត់ទុកមេដាយមាសនេះ ជាគំរូ និងជាកម្លាំងចិត្តសម្រាប់កីឡាករនៃប្រភេទកីឡា ក្នុងការប្រជែងដណ្តើមមេដាយជូនជាតិ។
ទើបតែបង្ហាញខ្លួនលើកដំបូងក្នុងព្រឹត្តិការណ៍កីឡាស៊ីហ្គេម តែកីឡាករជម្រើសជាតិគុនល្បុក្កតោ យ៉ុង ម៉េងលី ហាក់ទទួលបានជោគជ័យខ្លាំងគួរឲ្យកោតសរសើរ។ បន្ទាប់ពី រូបគេ ដណ្តើមបានមេដាយមាស១ និងប្រាក់១ក្នុងការប្រកួតដំបងខ្លី Arnis ដែលជាកីឡាប្រពៃណីរបស់ហ្វីលីពីន។ ជោគជ័យដ៏ធំធេងនេះ មិនត្រឹមតែជួយលើកមុខមាត់ប្រទេសជាតិប៉ុណ្ណោះទេ តែវាជួយឲ្យ ម៉េងលី មានកេរ្តិ៍ឈ្មោះកាន់តែល្បីល្បាញ ជាពិសេសឈ្មោះរបស់គេត្រូវបានកត់ត្រាទុកក្នុងព្រឹត្តិការណ៍នេះថែមទៀតផង។
ម៉េងលី ជាកីឡាករដំបូងគេ ដែលដណ្តើមបានមេដាយមាសឲ្យកម្ពុជា សម្រាប់ព្រឹត្តិការណ៍ស៊ីហ្គេមនៅហ្វីលីពីនឆ្នាំនេះ។ គ្រូបង្វឹកជនជាតិហ្វីលីពីនជាអ្នកផ្តល់បច្ចេកទេស ក៏ដូចជាតិចនិកដល់ ម៉េងលី ក្នុងការផ្តួលកីឡាករហ្វីលីពីននៅវគ្គផ្តាច់ព្រ័ត្រ។ ជាមួយការបង្ហាញអារម្មណ៍រំភើប ម៉េងលី បានលើកឡើងដូច្នេះថា៖«គ្រូបង្វឹកជនជាតិហ្វីលីពីនគាត់បានបង្វឹកខ្ញុំ ហើយគាត់បានឲ្យទឹកដល់ខ្ញុំ ពេលនោះគាត់បានប្រាប់តិចនិកដល់ខ្ញុំ ហើយខ្ញុំបានធ្វើតាមគាត់ទើបទទួលបានលទ្ធផលល្អ»។
មេដាយមាសនេះ បានកើតឡើងក្រោយកីឡាករ យ៉ុង ម៉េងលី យកឈ្នះកីឡាករហ្វីលីពីន Valenzuela Billy Joel ក្នុងការប្រកួតកីឡា Arnis លើវិញ្ញាសា Padded Stick ទម្ងន់៦០-៦៥គីឡូក្រាមនៅវគ្គផ្តាច់ព្រ័ត្រ។ នៅក្នុងវគ្គពាក់កណ្តាលផ្តាច់ព្រ័ត្រកីឡាកររូបនេះ បានយកឈ្នះកីឡាករមីយ៉ាន់ម៉ា Linn Aung Khaing ខណៈកីឡាករហ្វីលីពីនឈ្នះកីឡាករវៀតណាម Vu Duc Hung។
លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា និងជានាយបេសកកម្មកីឡាស៊ីហ្គេម មានមោទកភាពខ្លាំងមែនទែនចំពោះជ័យជម្នះដ៏ធំធេងរបស់កីឡាករគុនល្បុក្កតោ យ៉ុង ម៉េងលី ហើយលោកចាត់ទុកមេដាយនេះជាកម្លាំងចលករដល់កីឡាករកីឡាការិនីកម្ពុជាដទៃទៀត។
«មេដាយមាសនេះគឺជាគំរូនិងលើកទឹកចិត្តឲ្យកីឡាករកីឡាការិនីគ្រប់ប្រភេទកីឡាទាំងអស់ខិតខំប្រឹងប្រែងស្វែងរកមេដាយមាសបន្តទៀត។ កីឡាករកម្ពុជានៅទីនេះ(ហ្វីលីពីន)មានការខិតខំប្រឹងប្រែងមែនទែន។ ដូច្នេះសូមបងប្អូនប្រជាពលរដ្ឋកម្ពុជាទាំងអស់ជួយផ្តល់កម្លាំងនិងលើកទឹកចិត្តដល់កីឡាករយើងទាំងអស់គ្នា»។ នេះជាការលើកឡើងរបស់លោក វ៉ាត់ ចំរើន៕
Tag:
ល្បុក្កតោ
យ៉ុង ម៉េងលី
SEA Games
វ៉ាត់ ចំរើន
© រក្សាសិទ្ធិដោយ thmeythmey.com