អន្តរជាតិ
ក្រោយស្ងៀមស្ងាត់១សប្តាហ៍ ពលរដ្ឋហុងកុងរាប់ម៉ឺននាក់ចេញតវ៉ាតាមដងផ្លូវជាថ្មី
បាតុករហុងកុង ធ្វើសកម្មភាពតវ៉ា នៅក្នុងតំបន់ Kowloon នៃទីក្រុង ហុងកុង នៅថ្ងៃ ១ ធ្នូ ២០១៩ (AFP)
×![]()
ពលរដ្ឋហុងកុងរាប់ម៉ឺននាក់ បានត្រលប់មកធ្វើសកម្មភាពតវ៉ាតាមដងផ្លូវជាថ្មី នៅថ្ងៃអាទិត្យ ១ ធ្នូ ពោលគឺមួយសប្តាហ៍ប៉ុណ្ណោះក្រោយបេក្ខជនគាំទ្រប្រជាធិបតេយ្យ បានឈ្នះអាសនៈច្រើនក្នុងការបោះឆ្នោតជ្រើសរើសក្រុមប្រឹក្សាស្រុក។ ក៏ប៉ុន្តែសកម្មភាពតវ៉ារបស់ក្រុមបាតុករ ធ្លាក់ចូលក្នុងស្ថានភាពតានតឹងយ៉ាងលឿនរហ័ស ដោយមានការប្រឈមមុខដាក់គ្នាជាមួយប៉ូលិសហុងកុង ហើយរហូតដល់ពាក់កណ្ដាលយប់ ក្រុមជនពាលមួយក្តាប់តូចបានបំផ្លិចបំផ្លាញហាងទំនិញដែលជាប់ពាក់ព័ន្ធនឹងចិនដីគោក។ ជាការឆ្លើយតប ប៉ូលិស បានបាញ់ឧស្ម័នបង្ហូរទឹកភ្នែក និងគ្រាប់កាំភ្លើងជ័រ។
ក្រោយមានភាពស្ងប់ស្ងាត់ជិត២សប្តាហ៍ ភាពចលាចលវិលត្រលប់មកវិញក្នុងតំបន់ Kowloon នៃក្រុងហុងកុង នៅល្ងាចចុងសប្តាហ៍mun។ ខណៈផ្តើមដំបូងដោយអហិង្សា បាតុករមួយក្រុមបាននាំគ្នាគប់ដុំថ្ម ហើយពួកជ្រុលនិយមមួយក្រុមទៀត បានវាយកម្ទេចហាងទំនិញ និងភោជនីយដ្ឋានខ្លះ ព្រមទាំងបំផ្លិចបំផ្លាញច្រកទ្វារស្ថានីយរថភ្លើង Whampoa ផងដែរ។
ដោយលើកគ្រវី បដា ដែលសរសេរថា «កុំភ្លេចមូលហេតុដែលយើងបានចាប់ផ្តើម» ក្រុមបាតុករ ចង់បង្ហាញថា ទោះបីទទួលជោគជ័យក្នុងការបោះឆ្នោតក្តី ក៏ពួកគេនៅតែបន្តធ្វើសកម្មភាពតវ៉ាដែលនឹងចូលដល់ខែទី៧ នាសប្តាហ៍ក្រោយ ពោលគឺរហូតដល់ការទាមទារទាំងអស់របស់ពួកគេបានសម្រេច ។ ក្នុងនោះគឺមាន ការរៀបចំការបោះឆ្នោតដោយសេរីជ្រើសរើសមេដឹកនាំហុងកុង និងការបង្កើតគណៈកម្មាធិការឯករាជ្យស៊ើបអង្កេតសកម្មភាពប៉ូលិសជាដើម។
មួយម៉ោងក្រោយពលរដ្ឋហុងកុងបានចាប់ផ្តើមធ្វើសកម្មភាពតវ៉ាតាមដងផ្លូវ ប៉ូលិស បញ្ជាក់ថា បាតុករមួយក្រុមបានដុតគ្រាប់បែកផ្សែង និងគប់ដបសាំងលើរថយន្តប៉ូលិស ហើយព្យាយាមបិទផ្លូវទៀតផង ជាហេតុធ្វើឲ្យប៉ូលិសសម្រេចចិត្តបាញ់ឧស្ម័នបង្ហូរទឹកភ្នែក និងគ្រាប់កាំភ្លើងជ័រលើហ្វូងមនុស្សកកកុញទាំងនោះ។ ឈានដល់ពេលយប់ ប្រឈមមុខដាក់គ្នាម្តងទៀត បានផ្ទុះឡើងរវាងក្រុមសកម្មជនជួរមុខ និងប៉ូលិសក្នុងស្ថានីយរថភ្លើង Whampoa ហើយក្រោយមក បាតុករយ៉ាងតិច៣នាក់ ត្រូវបានប៉ូលិសចាប់ខ្លួន។
បាតុករហុងកុងមួយក្រុមទៀត លើកបដានៅមុខស្ថានកុងស៊ុលអាមេរិកក្នុងក្រុងហុងកុង នៅថ្ងៃ១ ធ្នូ ២០១៩ (AFP)
អ្នករៀបចំការតវ៉ានេះ បញ្ជាក់ប្រាប់កាសែត South China Morning Post ថា មនុស្ស ៣៨ម៉ឺននាក់បានចូលរួមក្នុងសកម្មភាពតវ៉ាតាមដងផ្លូវនៅថ្ងៃអាទិត្យ ខណៈប៉ូលិសប៉ាន់ស្មានថា អ្នកចូលរួមមានត្រឹម១៦០០០នាក់ប៉ុណ្ណោះ។
ក្នុងការប្រមូលផ្តុំដាច់ដោយឡែកមួយកាលពីអាទិត្យ ក្រុមបាតុករហុងកុងរាប់រយនាក់ បានលើកទង់ជាតិអាមេរិកគ្រវីគ្រវាត់ ដោយអ្នកខ្លះពាក់មួកនិងអាវយឺតរូបលោកប្រធានាធិបតី ដូណាល់ ត្រាំ ខណៈពួកគេកាន់បដារូបលោកត្រាំ ឈរលើររថក្រោះមួយគ្រឿង ដោយមានទង់ជាតិអាមេរិកនៅពីក្រោយ។ ចំណែកបដាមួយទៀត សរសេរថា៖«លោកប្រធានាធិបតី ត្រាំ សូមជួយធ្វើឲ្យក្រុងហុងកុងមានសេរីភាព»។
កាលពីសប្តាហ៍មុន លោក ត្រាំ បានចុះហត្ថលេខាលើសំណើច្បាប់គាំទ្រប្រជាធិបតេយ្យបាតុករហុងកុង ទោះបីរងការប្រឆាំងទាំងកំហឹងពីរដ្ឋាភិបាលក្រុងប៉េកាំង ។ តាមការចុះផ្សាយរបស់ទីភ្នាក់ងារព័៌ត៌មាន AFP បុរសម្នាក់ស្រែកប្រកាសតាមរយៈមេក្រូថា៖«អរគុណលោកប្រធានាធិបតី ត្រាំ សម្រាប់អំណោយដ៏ធំរបស់អ្នកទៅកាន់ទីក្រុងហុងកុង ហើយសូមឲ្យព្រះផ្តល់ពរដល់អាមេរិក»។
បើចូលជាធរមាន ច្បាប់ប្រជាធិបតេយ្យនិងសិទ្ធិមនុស្សហុងកុង នឹងតម្រូវឲ្យរដ្ឋាភិបាលអាមេរិកវាយតម្លៃជាប្រចាំឆ្នាំលើការអភិវឌ្ឍនយោបាយក្នុងទីក្រុងនេះ។ នោះគឺមើលថា ហុងកុង នៅតែអាចរក្សាលក្ខខណ្ឌស្វ័យភាពគ្រប់គ្រាន់ ដាច់ដោយឡែកពីចិនដីគោក ក្នុងគោលដៅរក្សាការផ្តល់ឲ្យពិសេសពីសហរដ្ឋអាមេរិក។ ទន្ទឹមនេះ ច្បាប់គាំទ្រប្រជាធិបតេយ្យហុងកុងនេះ ក៏នឹងបើកផ្លូវឲ្យរដ្ឋបាលលោកត្រាំដាក់ទណ្ឌកម្មលើមន្ត្រីចិនដែលទទួលខុសត្រូវចំពោះការបំផ្លិចបំផ្លាញសិទ្ធិមនុស្ស និងស្វ័យភាពរបស់ទីក្រុងហុងកុង៕
Tag:
ហុងកុង
បាតុកម្ម
ប៉ូលិស
© រក្សាសិទ្ធិដោយ thmeythmey.com
