ជាតិ
បើសង្ស័យជនណា បន្លំខ្លួនជាមន្រី្តកាំកុងត្រូលទារប្រាក់ ពលរដ្ឋរាយការណ៍ទៅក្រសួងពាណិជ្ជកម្ម មន្រី្តអគ្គនាយកដ្ឋានកាំងកុងត្រូលចុះពិនិត្យទំនិញ។ (រូបភាពពីទំព័រហ្វេសប៊ុករបស់អគ្គនាយកដ្ឋានកាំកុងត្រូល)
× ភ្នំពេញ៖ ក្រសួងពាណិជ្ជកម្ម ប្រាប់ឲ្យអាជីវករ ម្ចាស់ក្រុមហ៊ុន សហគ្រាស និងពាណិជ្ជករ រាយការណ៍ដល់អគ្គយកដ្ឋានកាំកុងត្រូល ប្រសិនបើជួបជនសង្ស័យដែលបន្លំខ្លួនជាមន្រី្តកាំកុងត្រូលដើរទារប្រាក់។ នេះបើតាមសេចក្ដីប្រកាសព័ត៌មានរបស់ក្រសួងពាណិជ្ជកម្ម ចុះថ្ងៃទី៣ ធ្នូ ឆ្នាំ២០១៩។
ក្រសួងកត់សម្គាល់ឃើញ មានជនខិលខូចមួយចំនួន ឆ្លៀតបន្លំខ្លួន ឬប្រើប្រាស់តួនាទីជាមន្រី្តកាំកុងត្រូលដើរទារប្រាក់ពីម្ចាស់ក្រុមហ៊ុន ពាណិជ្ជករ និងអាជីវករ ជាថ្នូរនឹងការដោះស្រាយបញ្ហា ឬសម្របសម្រួលលើបាតុភាពណាមួយជាដើម។ ដោយមើលឃើញពីបញ្ហានេះ ក្រសួងស្នើឱ្យអាជីករ និងម្ចាស់ក្រុមហ៊ុនទាំងអស់ រាយការណ៍ទៅមន្ត្រីជំនាញក្រសួង ដើម្បីចាត់វិធានការលើជនខិលខូចទាំងនោះ។
សេចក្ដីប្រកាសព័ត៌មានរបស់ក្រសួងពាណិជ្ជកម្ម បានបញ្ជាក់ដូច្នេះថា៖«ដើម្បីទប់ស្កាត់និងវែកមុខជនខិលខូចឱ្យទទួលខុសត្រូវចំពោះមុខច្បាប់ អគ្គនាយកដ្ឋានកាំកុងត្រូលបានអំពាវនាវឱ្យអាជីវករសហការជាមួយ ធ្វើការរាយការណ៍ដល់អគ្គនាយកដ្ឋានកាំកុងត្រូលដើម្បីជាប្រយោជន៍ដល់អាជីវករនិងពលរដ្ឋ»។
ដើម្បីកុំឱ្យពលរដ្ឋយល់ច្រឡំពីអត្តសញ្ញាមន្ត្រីកាំកុងត្រូលនោះ ពលរដ្ឋត្រូវកត់សម្គាល់ថា នៅពេលមន្រី្តជំនាញរបស់អគ្គនាយកដ្ឋានកាំកុងត្រូលចុះប្រតិបត្តិការងារ គឺមានសំសៀកបំពាក់ជាឯកសណ្ឋានការងារ ដោយភ្ជាប់ស្លាកឈ្មោះ លេខសម្គាល់ខ្លួន និងមានលិខិតបញ្ជាបេសកកម្មត្រឹមត្រូវ។ នេះជាការបញ្ជាក់របស់ក្រសួងពាណិជ្ជកម្ម។
ក្រសួងពាណិជ្ជកម្ម បានបញ្ជាក់ដូច្នេះថា៖«មន្រី្តជំនាញរបស់អគ្គនាយកដ្ឋានកាំកុងត្រូល កំពុងអនុវត្តតួនាទីចុះពិនិត្យទំនិញនិងសេវា ដើម្បីបង្ក្រាបនិងទប់ស្កាត់ទំនិញក្លែងបន្លំ ធានាគុណភាព សុវត្ថិភាព រួមទាំងការពារផលប្រយោជន៍របស់អ្នកប្រើប្រាស់»។
ប្រសិនបើ ម្ចាស់ក្រុមហ៊ុន និងអាជីវករ ជួបជនសង្ស័យបន្លំខ្លួនណាមួយ អាចរាយការណ៍ទាក់ទងទៅអគ្គនាយកដ្ឋានកាំកុងត្រូលតាមលេខ ០២៣ ២៣១ ៨៥៦៕
Tag:
មន្រី្តកាំកុងត្រូល
អាជីវករ
© រក្សាសិទ្ធិដោយ thmeythmey.com