កីឡាជាតិ
ជាតិ
លោក Felix ប្រាប់ទៅកីឡាករ៖ ដំណាក់កាលនេះហើយ កុំគិតលេខ៣ ត្រូវប្រឹងយកមេដាយមាស ក្រុមកីឡាករនាំគ្នាលើកលោក Felix Dalmas ក្រោយកម្ពុជាឡើងទៅវគ្គពាក់កណ្តាលផ្តាច់ព្រ័ត្រ។ រូបថត អគ្គនាយកដ្ឋានកីឡា
× លោក Felix Dalmas បានរីករាយចំពោះការប្រឹងប្រែងរបស់កូនក្រុមលោក ដែលនាំ U22 កម្ពុជា ឈានដល់វគ្គពាក់កណ្តាលផ្តាច់ព្រ័ត្រជាប្រវត្តិសាស្ត្រក្នុងព្រឹត្តិការណ៍កីឡាស៊ីហ្គេម។ គ្រូបង្វឹកសញ្ជាតិអាហ្សង់ទីន បានក្រើនរំលឹកកីឡាករឲ្យពួកគេថែរក្សារាងកាយ ហើយបោះជំហានទៅដណ្តើមយកមេដាយមាស ពោលគឺមិនត្រូវគិតថា ត្រឹមតែមេដាយសំរឹទ្ធ ឬលេខ៣នោះឡើយ។
«ដំណាក់កាលនេះហើយ កុំគិតលេខ៣ ត្រូវប្រឹងយកមេដាយមាស»។ លោក Felix បានថ្លែងយ៉ាងដូច្នេះទៅកាន់ក្រុមកីឡាករ នៅក្នុងបន្ទប់ផ្លាស់សម្លៀកបំពាក់នៃកីឡដ្ឋាន Rizal Memorial នាទីក្រុងម៉ានីល បន្ទាប់ពី U22 កម្ពុជា បានយកឈ្នះម៉ាឡេស៊ី ៣-១ នាការប្រកួតចុងក្រោយក្នុងពូល A នៃព្រឹត្តិការណ៍កីឡាស៊ីហ្គេម។
គ្រូបង្វឹកអាហ្សង់ទីនរូបនេះ បានសម្តែងការរីករាយចំពោះការប្រឹងប្រែងរបស់កីឡាករទាំងអស់ ក៏ដូចជាក្រុមមន្ត្រីបច្ចេកទេស និងការផ្តល់យោបល់ពីសំណាក់លោក Keisuke Honda អ្នកចាត់ការទូទៅក្រុមជម្រើសជាតិកម្ពុជា។
លោកបានលើកឡើងថា៖ «ភាពរីកចម្រើនរបស់ក្រុម ក៏ដូចជាការហ៊ានលេងគឺសំខាន់សម្រាប់ខ្ញុំជាជាងតែលទ្ធផលមួយមុខ។ អ្វីដែលខ្ញុំមិនដែលភ្លេចនោះ គឺការគាំទ្រកម្លាំងចិត្តពីអ្នកគាំទ្រកម្ពុជា»។ ជាមួយគ្នានេះ លោក Felix បានណែនាំទៅក្រុមកីឡាករឲ្យថែរក្សារាងកាយ ព្រោះវាមិនទាន់គ្រប់គ្រាន់នោះឡើយ ខណៈពួកគេនៅបន្តបេសកកម្មឆ្ពោះទៅមុខទៀត៕
Tag:
បាល់ទាត់
ស៊ីហ្គេម
SEAGames
© រក្សាសិទ្ធិដោយ thmeythmey.com