ភ្នំពេញ៖ «កម្មវិធីទូរស័ព្ទដៃទន្លេសាបអ្នកលក់» នឹងជួយឲ្យកសិករ និងអ្នកផ្គត់ផ្គង់ផលិតផលកសិកម្មងាយស្រួលជាងមុន ចំណាយតិច ចំណេញពេលវេលា និងបង្កើនការលក់ ជាពិសេសធ្វើឲ្យអតិថិជនស្គាល់ផលិតផលរបស់អ្នកកាន់តែទូលំទូលាយ។
«កម្មវិធីទូរស័ព្ទដៃទន្លេសាបអ្នកលក់» ត្រូវបានបង្កើតឡើង និងដាក់ឲ្យប្រើប្រាស់ជាផ្លូវការនៅក្នុងសិក្ខាសាលាស្តីអំពី “កម្មវិធីទូរស័ព្ទដៃទីផ្សារអនឡាញសម្រាប់អ្នកផ្គត់ផ្គងផលិតផលកសិកម្ម និងវឌ្ឍនភាពនៃកម្មវិធីទូរស័ព្ទដៃទន្លេសាប ”ប្រព្រឹត្តទៅនៅថ្ងៃទី ០៥ ខែធ្នូ ឆ្នាំ២០១៩ នៅផ្សារទំនើបអ៊ីអន១ ក្នុងរាជធានីភ្នំពេញ ដោយមានការចូលរួមពីភ្ញៀវកិត្តិយសជាច្រើនដូចជា កសិករអ្នកផ្គត់ផ្គង់សម្ភារៈកសិកម្ម ,អ្នកលក់ផលិតផលកសិកម្ម ,អ្នកជំនាញបច្ចេកទេសកសិកម្ម ,ស្ថាប័នក្រសួងពាក់ព័ន្ធ ,ដៃគូអភិវឌ្ឍន៍ ,អង្គការក្រៅរដ្ឋាភិបាល និងអ្នកសារព័ត៌ជាច្រើនផងដែរ។
សិក្ខាសាលានេះ រៀបចំឡើងដោយគ្រឹះស្ថានមីក្រូហិរញ្ញវត្ថុ អេ អឹម ខេ ក្នុងគោលបំណងជួយផ្សព្វផ្សាយពីកម្មវិធីទូរស័ព្ទដៃទន្លេសាបអ្នកលក់ថ្មីមួយនេះ ដែលបង្កើតឡើងដើម្បីជួយជំរុញការលក់ផលិតផលកសិកម្មសម្បូរបែប តាមរយៈការប្រើប្រាស់បច្ចេកវិទ្យាទំនើប ឬទីផ្សារអនឡាញ។ កសិករ និងអ្នកផ្គត់ផ្គង់ផលិតផលកសិកម្មអាចចុះឈ្មោះដោយផ្ទាល់នៅលើ«កម្មវិធីទូរស័ព្ទដៃទន្លសាបអ្នកលក់» ដើម្បីលក់ផលិតរបស់ខ្លួន និងគ្រប់គ្រងការបញ្ជាទិញផលិតផលរបស់ខ្លួនដោយផ្ទាល់តាមកម្មវិធីនេះ។ ជាពិសេសការដាក់លក់គ្រប់មុខផលិតផលតាមអនឡាញបានយ៉ាងងាយស្រួលក្នុងការផ្សព្វផ្សាយ និងលក់ផលិតផលទៅកាន់ទីផ្សារធំទូលាយជាងមុន ព្រមទាំងបង្កើនបរិមាណលក់ និងអតិថិជនកាន់តែប្រសើរឡើង។
សម្រាប់កម្មវិធីទូរស័ព្ទដៃទន្លេសាប ជាកម្មវិធីផ្តល់ចំណេះដឹងកសិកម្មដំបូងគេនៅកម្ពុជា ដែលបានដាក់ឲ្យប្រើប្រាស់កាលពីដើមឆ្នាំ ២០១៩ ។ទោះក្នុងរយៈពេលខ្លីក៏ពិតមែន តែកម្មវិធីនេះកំពុងទទួលបានការគាំទ្រខ្លាំងពីអ្នកប្រើប្រាស់ជាច្រើនមានចំនួនជិត១ម៉ឺននាក់ ពិសេសគឺ កសិករ និងអ្នកគាំទ្រផលិផលកសិកម្មក្នុងស្រុកតែម្តង។ គោលបំណងនៃអ្នកប្រើប្រាស់កម្មវិធីទូរស័ព្ទដៃទន្លេសាបភាគច្រើនបំផុត គឺដើម្បីរៀនពីបច្ចេកទេសកសិកម្មពីការដាំដំណាំ និងចិញ្ចឹមសត្វ ទទួលព័ត៌មានទីផ្សារ និងដំណោះស្រាយផ្សេងៗពាក់ព័ន្ធនឹងបច្ចេកទេសកសិកម្មពីអ្នកជំនាញ រួមទាំងទទួលបានការចែករំលែកបទពិសោធន៍ពីកសិករជោគជ័យ តម្លៃផលិតផលកសិកម្ម អ្នកផ្គត់ផ្គង់សម្ភារៈឧបករណ៍កសិកម្ម និងព័ត៌មានពីសេវាហិរញ្ញវត្ថុផ្សេងៗផងដែរ។
វឌ្ឍនភាពនៃកម្មវិធីទូរស័ព្ទដៃទន្លេសាបនេះ នឹងរួមបញ្ចូលមុខងារបន្ថែមមួយចំនួន រួមមានអ្នកប្រើប្រាស់នឹងទទួលបានព័ត៌មានពីបំរែបំរួលអាកាសធាតុ បញ្ជាទិញគ្រប់មុខផលិតផលកសិកម្មបានតាមតម្រូវការ ព្រមជាមួយការដឹកជញ្ជូនដល់ទីកន្លែងផងដែរ។
កម្មវិធីទូរស័ព្ទដៃទន្លេសាបទាំងពីរនេះ ត្រូវបានដាក់ឱ្យប្រើប្រាស់ដោយឥតគិតថ្លៃលើ App Store ប្រព័ន្ធ (iOS) និង Play Store ប្រព័ន្ធ Android។
លោកគ្រូ គាបូរាណ ប្រធាននាយកប្រតិបត្តិនៃគ្រឹះស្ថានមីក្រូហិរញវត្ថុ អេ អឹម ខេ បានឲ្យដឹងថា «ដោយសារកម្មវិធីទូរស័ព្ទដៃទន្លេសាប» មានការគាំទ្រខ្លាំងពីអ្នកប្រើប្រាស់ និងមានការគាំទ្រពីរាជរដ្ឋាភិបាលកម្ពុជា អង្គការជាតិនិងអន្តរជាតិជាច្រើននោះ អេ អឹម ខេ បានសម្រេចបង្កើតកម្មវិធីទូរស័ព្ទដៃទន្លេសាបអ្នកលក់ ថ្មីមួយទៀត ដើម្បីជួយគាំទ្រដល់ការលក់របស់អ្នកផ្គត់ផ្គង់ផលិតផលកសិកម្ម និងអ្នកទិញផងដែរ។ «យើងសង្ឃឹមថា កម្មវិធីទូរស័ព្ទដៃទន្លេសាបអ្នកលក់ ដែលទើបបង្កើតឡើងនេះនឹងក្លាយជាទីផ្សារអនឡាញមួយ ដែលអាចជួយកសិករខ្មែរយើងពង្រីកទីផ្សារបានធំជាងមុន និងអាចបង្កើនប្រាក់ចំណូលឲ្យបានប្រសើរជាងមុន តាមរយៈការផ្សារភ្ជាប់រវាងតួអង្គនៃខ្សែច្រវាក់ផ្គត់ផ្គង់កសិកម្មពី អ្នកផ្គត់ផ្គង់សម្ភារកសិកម្ម អ្នកផលិត អ្នកទិញលក់ផ្ទាល់បានជួបគ្នា ព្រោះ អេ អឹម ខេ ផ្តួចផ្តើមបង្កើតកម្មវិធីទូរស័ព្ទដៃទន្លេសាបនេះឡើង គឺដើម្បីជួយលើកម្ពស់វិស័យកសិកម្មនៅកម្ពុជា និង កាត់បន្ថយភាពក្រីក្រផងដែរ»។ នេះបើតាម អេ អឹម ខេ។
កម្មវិធីទូរស័ព្ទដៃទន្លេសាបត្រូវបានផ្តួចផ្តើម និងបង្កើតឡើងដោយគ្រឹះស្ថានមីក្រូហិរញ្ញវត្ថុ អេ អឹម ខេ ក្រោមកិច្ចសហប្រតិបត្តិការជាមួយក្រសួងកសិកម្ម រុក្ខាប្រមាញ់ និងនេសាទ និងគាំទ្រសហការមូលនិធិដោយ គ្រឹះស្ថាន cksគ្នាដោយ SIDA, SNV, IB Sweden និង BoP Inc. និងគម្រោងហាវែស II នៃទីភ្នាក់ងារជំនួយអាមេរិក USAID។ហើយគម្រោងនេះ មានគោលដៅសំខាន់បំផុត គឺដើម្បីជួយកាត់បន្ថយភាពក្រីក្រ និងជំរុញកំណើនសេដ្ឋកិច្ចតាមរយៈការលើកកម្ពស់ការអភិវឌ្ឍវិស័យកសិកម្ម ដែលស្របទៅនឹងទិសដៅរបស់រាជរដ្ឋាភិបាល និងសម័យបច្ចេកវិទ្យាទូរស័ព្ទ ដើម្បីជួយផ្តល់ជាចំណេះដឹងផ្នែកកសិកម្មដល់កសិករកម្ពុជាផងដែរ។
អេ អឹម ខេ គឺជាគ្រឹះស្ថានមីក្រូហិរញ្ញវត្ថុ ដែលឈានមុខគេលើវិសាលភាពប្រតិបត្តិការ និងចំនួនអតិថិជនប្រាក់កម្ចី និងចាប់ផ្តើមពង្រីកសេវាផ្ទេរប្រាក់ តាំងពីឆ្នាំ ២០១១ មកម្ល៉េះ ។ គិតត្រឹមខែតុលា ឆ្នាំ ២០១៩ អេ អឹម ខេ មានអតិថិជនសរុបចំនួនជាង ៨៨ម៉ឺននាក់ ជាមួយនឹងផលប័ត្រប្រាក់កម្ចីជាង ៣១៥ លានដុល្លារអាមេរិក និងប្រាក់បញ្ញើជាង១៧៧ លានដុល្លារអាមេរិក មានការិយាល័យប្រតិបត្តិការចំនួន ១៤៩ កន្លែង និងមានភ្នាក់ងារជាង៥០០០ កន្លែងនៅទូទាំងប្រទេស។ អេ អឹម ខេ មានផលិតផល និងសេវាកម្មជាច្រើនកំពុងផ្តល់ជូនអតិថិជនដូចជាសេវាប្រាក់កម្ចី ប្រាក់សន្សំ សេវាផ្ទេរប្រាក់ក្នុង និងក្រៅប្រទេស សេវាទូទាត់វិក្កយបត្រ សេវាបង់រំលស់ ធានារ៉ាប់រងខ្នាតតូច ធនាគារចល័ត សេវាបើកប្រាក់បៀវត្សរ៍ ម៉ាស៊ីនដក និងដាក់ប្រាក់ដោយស្វ័យប្រវត្តិ (ATMs/CDNs)។