មន្ត្រី​៖ រដ្ឋាភិបាល ត្រៀម​៣​ពាន់​លាន​ដុល្លារ ទុក​ដោះស្រាយ​ពេល​មាន​ហានិភ័យ​
ជាតិ
សេដ្ឋកិច្ច
មន្ត្រី​៖ រដ្ឋាភិបាល ត្រៀម​៣​ពាន់​លាន​ដុល្លារ ទុក​ដោះស្រាយ​ពេល​មាន​ហានិភ័យ​
05, Dec 2019 , 7:19 pm        
រូបភាព
លោក ហាវ រតនៈ អគ្គនាយកនៃអគ្គនាយកដ្ឋានថវិកា ថ្លែងក្នុងកិច្ចប្រជុំបូកសរុបលទ្ធផលនៃការអនុវត្តថវិកាកម្មវិធី២០១៥-២០១៧  នៅសណ្ឋាគារភ្នំពេញ កាលពីថ្ងៃទី២០ ខែមីនា ឆ្នាំ២០១៨ (រូបពីអគ្គនាយកដ្ឋានថវិកា)
លោក ហាវ រតនៈ អគ្គនាយកនៃអគ្គនាយកដ្ឋានថវិកា ថ្លែងក្នុងកិច្ចប្រជុំបូកសរុបលទ្ធផលនៃការអនុវត្តថវិកាកម្មវិធី២០១៥-២០១៧ នៅសណ្ឋាគារភ្នំពេញ កាលពីថ្ងៃទី២០ ខែមីនា ឆ្នាំ២០១៨ (រូបពីអគ្គនាយកដ្ឋានថវិកា)
ដោយ: ថ្មីៗ
​លោក ហាវ រតនៈ អគ្គនាយក​នៃ​អគ្គនាយកដ្ឋាន​ថវិកា​នៃ​ក្រសួង​សេដ្ឋកិច្ច បង្ហើប​ថា រដ្ឋាភិបាល​កម្ពុជា មាន​ប្រាក់​បម្រុង​ដល់​ទៅ​ប្រមាណ​៣​ពាន់​លាន​ដុល្លារ​ឯណោះ ដើម្បី​ដោះស្រាយ​នឹង​វិបត្តិ​ឬ​ហានិភ័យ (​ផ្នែក​សេដ្ឋកិច្ច​)​។ បើតាម​មន្ត្រីជាន់ខ្ពស់​រូបនេះ ការ​សន្សំ​ប្រាក់​បម្រុង​នេះ គឺ​ដោយសារតែ​រដ្ឋាភិបាល បាន​ព្យាករ​ថា វិបត្តិ​ឬ​ហានិភ័យ អាច​នឹង​កើតមានឡើង​ជាយថាហេតុ នៅពេល​ណាមួយ​។


 
​ក្នុង​សន្និសីទ​សារព័ត៌មាន​ស្តីពី​វឌ្ឍនភាព​ជាតិ​និង​ការបែងចែក​ភាគ​លាប​ប្រកបដោយ​សមធម៌  ដែល​រៀបចំឡើង​នៅ​ទីស្តីការគណៈរដ្ឋមន្ត្រី កាលពី​ថ្ងៃទី​២៨ ខែវិច្ឆិកា ឆ្នាំ​២០១៩ លោក ហាវ រតនៈ ថ្លែងថា ចំ​ណួ​ល ដែល​បានមកពី​ការប្រមូល​ពន្ធ​និង​បានមកពី​ប្រភព​ផ្សេងៗ​ទៀត រដ្ឋាភិបាល មិនបាន​យកទៅ​ចាយវាយ​ទាំងអស់​ឡើយ ដោយ​សន្សំទុក​ខ្លះ សម្រាប់​ទប់ទល់​នឹង​ហានិភ័យ​។ លោក បញ្ជាក់​ដូច្នេះ​ថា​៖«...​ចំនួន​ដែល​សន្សំ​នោះ ដូច​សម្តេច​តេ​ជោ​នាយករដ្ឋមន្ត្រី ធ្លាប់​លើក​ជា​ញឹកញាប់​មក គឺមាន​ប្រមាណ​៣​ប៊ី​លាន​ដុល្លារ​»​។ 
 
​មន្ត្រី​រដ្ឋាភិបាល​ខាងលើ ពុំបាន​និយាយ​ឲ្យ​ចំ​នោះទេ​ថា វិបត្តិ​ឬ​ហានិភ័យ​នោះ គឺ​សំដៅលើ​អ្វី​។ យ៉ាងណា បច្ចុប្បន្ននេះ សាធារណជន​ខ្លះ ពិសេស​អ្នកជំនាញ​សេដ្ឋកិច្ច​និង​អ្នក​តាម​ស្ថានការណ៍​សង្គម កំពុង​បារម្ភ​ពី​ការបាត់​ប្រព័ន្ធ​អនុគ្រោះ​ពន្ធ​សព្វ​មុខទំនិញ EBA របស់​សហភាព​អឺរ៉ុប និង ប្រព័ន្ធ​អនុព័ន្ធ​ទូទៅ GSP របស់​សហរដ្ឋអាមេរិក ដែល​នាំ​ឲ្យ​ប៉ះពាល់​ដល់​សេដ្ឋកិច្ចកម្ពុជា​។ គេ រឹតតែ​បារម្ភ​ពី​ការប៉ះពាល់​ជីវភាព​របស់​កម្មករ​ក្នុង​វិស័យ​វាយ​ន​ភ័ណ បើ​បាត់​ប្រព័ន្ធ​អនុគ្រោះ​ពន្ធ​ទាំងពីរ​នេះ​។ 
 
​កាលពី​ថ្ងៃទី​១២ ខែវិច្ឆិកា ឆ្នាំ​២០១៩ សហភាព​អឺរ៉ុប បាន​ផ្ញើ​របាយការណ៍​បឋម​ស្តីពី​នីតិវិធី​នៃ​ការដក​ឬ​មិន​ដក EBA មកកាន់​រដ្ឋាភិបាល​ក​ម្ពុ​ជា​។ រដ្ឋាភិបាល​កម្ពុជា មាន​ពេល​ឆ្លើយតប​ទៅ​គណៈកម្មការ​អឺរ៉ុប​វិញ ដោយ​គិត​ចាប់តាំងពី​ថ្ងៃ​ទទួលបាន​របាយការណ៍ រហូតដល់​ថ្ងៃទី​១២ ខែធ្នូ (១​ខែ​)​។​
 
​សហភាព​អឺរ៉ុប ប្រកាសថា នៅ​ខែកុម្ភៈ ឆ្នាំ​២០២០ គឺមាន​រយៈពេល​គ្រប់​១​ឆ្នាំ​ហើយ ដែល​សហភាព​អឺរ៉ុប នឹង​ចេញ​របាយការណ៍​ចុងក្រោយ ហើយក៏​នឹងធ្វើ​សេចក្តីសម្រេច​ចុងក្រោយ​ផងដែរ ថា ដក EBA ពី​កម្ពុជា​ជា​បណ្តោះអាសន្ន ឬ បន្ត​រក្សាទុក​។ សហភាព​អឺរ៉ុប បានចាប់ផ្តើម​នីតិវិធី​ដំបូង​ពី​រឿង​ដក​ឬ​មិន​ដក EBA នេះ តាំង​ខែកុម្ភៈ ឆ្នាំ​២០១៩​មក​។ 
 
​បើ​សហភាព​អឺរ៉ុប សម្រេច​ដក EBA ពិតមែន ជា​នីតិវិធី គឺ​ត្រូវការ​រយៈពេល​៦​ខែក្រោយ​មកទៀត ទើប​សេចក្តីសម្រេច​នោះ ចូល​ជា​ធរមាន​។ វា មានន័យថា ៦​ខែក្រោយ​នៃ​ការដក EBA ទើប​កម្ពុជា ចាប់ផ្តើម​បង់ពន្ធ ពេល​នាំ​ទំនិញ​ចូលទៅ​ទីផ្សារ​អឺរ៉ុប​។ 
 
​ចំណែក​សមាជិក​រដ្ឋសភា​និង​សមាជិក​ព្រឹទ្ធសភា​អាមេរិក​មួយចំនួន បាន​តាក់តែង​ច្បាប់ ដើម្បី​ឲ្យ​រដ្ឋបាល​របស់លោក​ប្រធានាធិបតី ដូ​ណា​ល់ ត្រាំ យកទៅអនុវត្ត​ក្នុង​ការដក GSP ពី​កម្ពុជា​។ យ៉ាងណា មកដល់ពេលនេះ ច្បាប់​នោះ មិនទាន់​ចូល​ជា​ធរមាន​នោះទេ​។ 
 
​ទាំង​សហភាព​អឺ​រុ​ប ទាំង​សហរដ្ឋអាមេរិក សុទ្ធតែ​យល់ថា សិទ្ធិមនុស្ស​និង​លទ្ធិប្រជាធិបតេយ្យនៅ​កម្ពុជា បាន​ធ្លាក់ចុះ ម្ល៉ោះហើយ​ទើប​យក EBA និង GSP មក​ព្រមាន​រដ្ឋាភិបាល​កម្ពុជា​។ ប្រមុខ​រដ្ឋាភិបាល ប្រកាន់​ជំហរ​ថា សុខចិត្ត​ឲ្យ​បាត់​ប្រព័ន្ធ​អនុគ្រោះ​ពន្ធ​ឬ​ជំនួយ តែ​មិន​ឲ្យ​បាត់​អធិបតេយ្យ​ឬ​ឯករាជ្យ​ឡើយ​៕ 

Tag:
 EU
  EBA
  ប្រាក់​បម្រុង​
© រក្សាសិទ្ធិដោយ thmeythmey.com