ជាតិ
សង្គមជាតិ
លោក ស៊ុន ចាន់ថុល៖ កុំខ្លាចប៉ូលិស តែត្រូវខ្លាចច្បាប់ និងសេចក្តីស្លាប់ ទើបគ្មានគ្រោះថ្នាក់ចរាចរណ៍ លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន នាថ្ងៃទី០៣ ខែឆ្នូ រូបភាពពីក្រសួងសាធារណការ និងដឹកជញ្ជូន
× ភ្នំពេញ៖ ពលរដ្ឋកុំខ្លាចប៉ូលិស តែត្រូវខ្លាចច្បាប់ និងសេចក្តីស្លាប់ ទើបគ្មានគ្រោះថ្នាក់ចរាចរណ៍។ នេះជាការលើកឡើងរបស់លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន នៅក្នុងកិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោក នាថ្ងៃទី៣ ខែធ្នូ។
ដើម្បីចូលរួមកាត់បន្ថយការគ្រោះថ្នាក់ចរាចរណ៍នេះ ក្រសួងបានដាក់វិធានការកាត់បន្ថយអត្រាការស្លាប់ដោយសារគ្រោះថ្នាក់ចរាចរណ៍ តាមរយៈការបំពាក់ស្លាកសញ្ញា បិទចំណាំងផ្លាត ជួសជុល ថែទាំផ្លូវ និងបង្កើតយុទ្ធនាការផ្សេងៗ។ បើតាមលោក ស៊ុន ចាន់ថុល ក្រសួងក៏បង្កើនការដាក់កាមេរ៉ាតាមផ្លូវ និងប្រើវិធានការចាប់រថយន្តដែលបើកបរលើសល្បឿនកំណត់ និងរំលោភច្បាប់ចរាចរណ៍។ «កាលណាមានអ្នកល្មើសវិធានការនេះ ក្រសួងនឹងពិន័យដល់ផ្ទះ និងផ្សព្វផ្សាយតាមទំព័រហ្វេសប៊ុករបស់ក្រសួងសាធារណការ និងដឹកជញ្ជូន។ នៅពេលយប់អាជ្ញាធរនឹងដើរល្បោតឆ្មក់ពេលយប់នៅតាមផ្លូវ និងការដាក់ជញ្ជីងលើដងផ្លូវមុខរោងចក្រផលិតស៊ីម៉ងត៍ និងបិទយានដ្ឋានខុសច្បាប់ផងដែរ»។ នេះជាការបញ្ជាក់របស់រដ្ឋមន្ត្រីក្រសួងសាធារណការ។
បន្ថែមពីនេះ លោក ស៊ុន ចាន់ថុល ប្រាប់ឲ្យម្ចាស់រថយន្តត្រូវយកចិត្តទុកដាក់ក្នុងការយករថយន្តទៅត្រួតពិនិត្យលក្ខណៈបច្ចេកទេសឲ្យបានត្រឹមត្រូវ និងទៀងទាត់ ដើម្បីកាត់បន្ថយអត្រានៃការរងរបួសធ្ងន់ធ្ងរឲ្យមកត្រឹម៥០ភាគរយ ត្រឹមឆ្នាំ២០២០ ស្របតាមគោលដៅទសវត្សរ៍របស់អង្គការសហប្រជាជាតិស្តីពីសុវត្ថិភាពចរាចរណ៍ផ្លូវគោក។ ជាមួយគ្នានេះ មន្ត្រីនគរបាល ត្រូវប្រឹងប្រែងប្រើយុទ្ធសាស្ត្រ និងនីតិវិធី ដែលធ្វើយ៉ាងណាឲ្យអត្រាគ្រោះថ្នាក់ចរាចរណ៍ថយចុះ។
គ្រោះថ្នាក់ចរាចរណ៍រយៈពេល១០ខែ ឆ្នាំ២០១៩ មានការកើនឡើងដល់៧៦១ករណី បើប្រៀបធៀបទៅនឹងរយៈពេលដូចគ្នា ក្នុងឆ្នាំ២០១៨។ ក្នុងនោះមានអ្នកស្លាប់ដោយសារជួបគ្រោះថ្នាក់ចរាចរណ៍ជាង១៦០០នាក់។ ក្នុងចំណោមអ្នកស្លាប់ដោយសារគ្រោះថ្នាក់ចរាចរណ៍ ភាគច្រើននៅតាមបណ្តាខេត្តមួយចំនួន គឺរាជធានីភ្នំពេញមានអ្នកស្លាប់២៧៤នាក់ ខេត្តព្រះសីហនុមានអ្នកស្លាប់ ១២៨នាក់ ខេត្តកណ្តាលមានអ្នកស្លាប់ ១២៦នាក់ និងខេត្តកំពង់ស្ពឺមានអ្នកស្លាប់ចំនួន ២១២៥នាក់។ នេះបើតាមរបាយការណ៍ដែលសម្តេច ស ខេង រដ្ឋមន្ត្រីក្រសួងមហាផ្ទៃបានលើកឡើងនាពិធីប្រារព្ធទិវាអន្តរជាតិរម្លឹកដល់ជនរងគ្រោះផ្លូវគោក នាថ្ងៃទី២៤ ខែវិច្ឆិកា៕
Tag:
លោក ស៊ុន ចាន់ថុល
ប៉ូលិស
ច្បាប់
ចរាចរណ៍
© រក្សាសិទ្ធិដោយ thmeythmey.com