អន្តរជាតិ
មហាសេដ្ឋីថៃ៖ សាលារៀន គួរតែកាត់បន្ថយម៉ោងសិក្សា និងកែប្រែកម្មវិធីសិក្សាមួយចំនួន
លោក Dhanin Chearavanont មហាសេដ្ឋីថៃ, រូបភាព Bangkok Post
×![]()
ដោយ: ធៀន ភារិន្ទ
នៅក្នុងយុគបច្ចេកវិទ្យា សិស្សគួរតែ ចំណាយពេលសិក្សានៅក្នុងសាលា ឬសកលវិទ្យាល័យឲ្យតិចជាងការចំណាយពេលនៅក្នុងសង្គម ដើម្បីទទួលបានបទពិសោធជាក់ស្តែង។ ការធ្វើបែបនេះ អាចធ្វើឲ្យសិស្សអាចច្នៃខ្លួនឯង និងត្រៀមខ្លួនសម្រាប់អភិវឌ្ឍបច្ចេកវិទ្យា។ ជាមួយគ្នានេះ សាលា គឺជាកន្លែងផ្តល់ចំណេះដឹងទីពីរ ខណៈពេលសង្គមគឺជាឃ្លាំងនៃបទពិសោធ។ នេះបើតាមការលើកឡើងរបស់មហាសេដ្ឋីថៃមានជាងគេបំផុតរបស់ថៃ លោក Dhanin Chearavanont។ 
«តាមគំនិតរបស់ខ្ញុំ ចំនួនឆ្នាំ ដែលសិស្សត្រូវសិក្សានៅសាលាបឋម គួរតែកាត់បន្ថយពី៦ឆ្នាំ មក៤ឆ្នាំ ខណៈពេលសិស្សមិនត្រូវ ចំណាយពេលច្រើនជាងពីរឆ្នាំទេ នៅកម្រិតថ្នាក់កាន់តែខ្ពស់។ ដូច្នោះ សិស្សអាចបញ្ចប់ និងចាប់ផ្តើមធ្វើការនៅអាយុ១៨ឆ្នាំ»។ លោក Dhanin Chearavanont មហាសេដ្ឋីលំដាប់ប្រាក់ពាន់លានដុល្លារថៃ លើកឡើងបែបនេះនៅក្នុងកិច្ចសម្ភាសផ្តាច់មុខជាមួយកាសែត Bangkok Post នាទីក្រុងប៉ារីស។
បើតាមលោក Dhanin សិស្ស និងនិស្សិតភាគច្រើន បានចំណាយពេលយ៉ាងច្រើននៅក្នុងសាលារៀន។ ជាក់ស្តែង និស្សិតថៃភាគច្រើន ចូលធ្វើការនៅអាយុច្រើនជាង២០ឆ្នាំ ខណៈពេលពួកគេគួរតែចូលធ្វើការត្រឹមតែអាយុ ១៨ឆ្នាំតែប៉ុណ្ណោះ។ ក្នុងន័យនេះ លោកមហាសេដ្ឋីបានពន្យល់ថា សព្វថ្ងៃសិស្សមិនចាំបាច់រៀនតាមវិធីចាស់ឡើយ ព្រោះពួកគេមានព័ត៌មានយ៉ាងច្រើននៅក្នុងប្រព័ន្ធអ៊ីនធឺណិត។
ទន្ទឹមនេះ លោក Dhanin បានចង្អុលបង្ហាញទៀតថា សាលារៀន ឬសកលវិទ្យាល័យ គួរតែផ្លាស់ប្តូរកម្មវិធីសិក្សារបស់ខ្លួន ហើយបង្រៀនឲ្យសិស្ស ឬនិស្សិតទាំងអស់ត្រៀមខ្លួនសម្រាប់ទីផ្សារការងារល្អជាង។ ក្នុងនោះសាលារៀន គួរតែអនុញ្ញាតឲ្យសិស្ស ឬនិស្សិតទាំងនោះ រៀនពីបញ្ហាប្រឈមផ្សេងៗនៅក្នុងសង្គម។ ជាក់ស្តែង នៅក្នុងថ្នាក់ សិស្សអាចទទួលបានត្រឹមតែចំណេះផ្សេងៗប៉ុណ្ណោះ ប៉ុន្តែសង្គម គឺជាកន្លែងដែលផ្ទុកទៅដោយចំណេះដឹង។
ពីទីក្រុងប៉ារីស មហាសេដ្ឋីលំដាប់ទី១ ថៃរូបនេះ ក៏បានរិះគន់ប្រព័ន្ធអប់រំនៅក្នុងប្រទេសថៃផងដែរ។ ក្នុងនោះ លោកបានគូសបញ្ជាក់ថា សាលារៀន ក្នុងសម័យនេះ បណ្តុះបណ្តាលជំនាញសម្រាប់សម័យមុនតែប៉ុណ្ណោះ មិនមែនបច្ចុប្បន្នឡើយ។ ជាក់ស្តែង សាលារៀន និងសកលវិទ្យាល័យមួយចំនួន នៅតែបង្រៀនតាមកម្មវិធីសិក្សា ដែលហួសសម័យ ខណៈពេលពិភពលោក បានដើរលើផ្លូវមួយផ្សេងទៀតតាំងពីយូរមកហើយ។ លោក Dhanin បានប្រៀបធៀបសាលារៀន ទៅនឹងកន្លែងបង្ហាត់ទាហានថា សិស្ស មិនជាទាហាន ដែលត្រូវសិក្សាលើជំនាញត្រឹមត្រូវ សម្រាប់ទីផ្សារការងារឡើយ ប៉ុន្តែសាលារៀន ត្រូវតែបង្រៀនសិស្ស ដើម្បីឲ្យពួកគេអាចផ្លាស់ប្តូរការងារបាន។
ដើម្បីកែប្រែប្រព័ន្ធអប់រំ រដ្ឋាភិបាលគួរតែ វិនិយោគឲ្យកាន់តែច្រើនទៅលើគ្រូបង្រៀន។ ការធ្វើបែបនេះ គឺដើម្បីប្រាកដថា រដ្ឋាភិបាលអាចទាក់ទាញអ្នកមានខួរក្បាលល្អ និងខ្លាំង។ ដូចនេះ អ្វីដែលអាចធ្វើបាន រដ្ឋាភិបាល ត្រូវតែផ្តល់ប្រាក់ខែឲ្យកាន់តែច្រើន ទើបអ្នកពូកែ ចង់ធ្វើជាគ្រូបង្រៀន។
សូមបញ្ជាក់ថា លោក Dhanin Chearavanont ដែលមានវ័យ ៨០ឆ្នាំ គឺជាមហាសេដ្ឋីមានជាងគេបំផុតនៅក្នុងប្រទេសថៃ និងមានលុយរហូតដល់ទៅជាង ២៩ពាន់លានដុល្លារ។ ជាពិសេសបុរសវ័យ ៨០ឆ្នាំរូបនេះក៏ជានាយកប្រតិបត្តិរបស់ក្រុមហ៊ុន CPផងដែរ៕
Tag:
ថៃ
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
