កីឡាជាតិ
ជាតិ
កម្ពុជាកើនមេដាយមាស ខណៈប៉េតង់ ប្រដាល់ និងគុនខ្មែរ សុទ្ធតែកក់មេដាយទុក ក្រុមកីឡាការិនីប៉េតង់ពេលទទួលមេដាយ និងក្រុមកីឡាករដែលត្រៀមដណ្តើមមេដាយលើវិញ្ញាសារៀងៗខ្លួន។ រូបថត Camsoc និងអគ្គនាយកដ្ឋានកីឡា
× ក្រុមកីឡាការិនីប៉េតង់វិញ្ញាសា៣ទល់៣ ដែលមានកីឡាការិនី ស្រ៊ាង សុរ៉ាឃីម, ដួង ឌីណា, ឃួន យ៉ារី និង វង ចន្ថា បានឈ្នះមេដាយមាស ក្រោយស៊ីក្រុមម៉ាឡេស៊ី ១៣-៤ នៅវគ្គផ្តាច់ព្រ័ត្រ កាលពីថ្ងៃទីថ្ងៃទី៥ ខែធ្នូ ឆ្នាំ២០១៩។ ជោគជ័យនេះ នាំឲ្យកម្ពុជា ទទួលបានមេដាយមាសទីពីរក្នុងព្រឹត្តិការណ៍កីឡាស៊ីហ្គេម នៅហ្វីលីពីន។ មេដាយសរុបដែលកម្ពុជាបាននៅពេលនេះ គឺ មាស២ ប្រាក់៣ និងសំរឹទ្ធ១៧។
ជំនួបកាលពីម្សិលមិញផងដែរ កម្ពុជាបានកក់ទុកមេដាយយ៉ាងហោចបីបន្ថែមទៀត ដោយក្រុមកីឡាប៉េតង់វាយគូបុរស ប្រដាល់សកលទម្ងន់៦៤គីឡូក្រាម និងគុនខ្មែរទម្ងន់៦៣.៥គីឡូក្រាម សុទ្ធតែឈានទៅកាន់វគ្គពាក់កណ្តាលផ្តាច់ព្រ័ត្រ ឬតំបន់ដែលត្រូវទទួលបានមេដាយ។
សម្រាប់វិញ្ញាសាប៉េតង់វាយគូបុរស ដែលមានកីឡាករសុខ ចាន់មាន និងញ៉ែម បូរ៉ា បានយកឈ្នះឥណ្ឌូណេស៊ី ១៣-១ ឈ្នះវៀតណាម ១៣-១១ តែចាញ់ថៃ ១០-៨។ នៅវគ្គពាក់កណ្តាលផ្តាច់ព្រ័ត្រ ថៃត្រូវប៉ះមីយ៉ាន់ម៉ា ខណៈកម្ពុជាត្រូវតទល់ជាមួយឡាវ នាថ្ងៃទី៦ ខែធ្នូ នេះ។
រីឯការប្រកួតប្រដាល់សកល កីឡាករ ស៊ីវ សុខម៉េង ឈានទៅវគ្គពាក់កណ្តាលផ្តាច់ព្រ័ត្រក្នុងទម្ងន់៧៥គីឡូក្រាម កីឡាករ យ៉ុង ដារ័ត្ន ក៏ឈានទៅកាន់វគ្គនេះផងដែរ ក្រោយយកឈ្នះកីឡាករទីម័រខាងកើត QUINTAS DA SILVA JONEZI EMANUEL ៤-១ ក្នុងលទ្ធផល ៤-១ ទម្ងន់៦៤គីឡូក្រាម។
ចំណែកប្រភេទវិញ្ញាសាគុនខ្មែរ កីឡាករ ឡៅ ចិត្រា បានយកឈ្នះកីឡាករឡាវ Banxabeth Soubinh ក្នុងលទ្ធផល ៣០-២៧ ដើម្បីឡើងទៅជួបកីឡាករថៃ Khundam Norapat នៅវគ្គពាក់កណ្តាលផ្តាច់ព្រ័ត្រ។
មេដាយដែលកម្ពុជាទទួលបានរួមមាន៖
កីឡា Arnis៖ មាស ១ ប្រាក់២ និងសំរឹទ្ធ១៧
-កីឡាករ យ៉ុង ម៉េងលី មាស១ ប្រាក់១
-កីឡាការិនី ស៊ីវ័ន្ត សូនីតា ប្រាក់១ សំរឹទ្ធ១
-កីឡាការិនី បូ ចន្ធី សំរឹទ្ធ២
-កីឡាការិនី យស់ សញ្ចនា សំរឹទ្ធ២
-កីឡាការិនី ខៀវ ចិន្តារ័ត្ន សំរឹទ្ធ២
-កីឡាករ ឌឹប ង៉ែត សំរឹទ្ធ២
-កីឡាករ មឿន ប៊ុនលី សំរឹទ្ធ២
-កីឡាករ សុខ ឈុន សំរឹទ្ធ២
-កីឡាករ ឆេម សីឡា សំរឹទ្ធ២
-កីឡាការិនី អេង ស៊ូម៉ាឡា សំរឹទ្ធ២
កីឡាប៉េតង់៖ មាស១
-ក្រុមនារីបីទល់បី (ស្រ៊ាង សុរ៉ាឃីម, ឃួន យ៉ារី, ដួង ឌីណា និងវង ចន្ថា) មេដាយមាស ១
កីឡាសីប៉ាក់តាក្រ (សីដក់)៖ ប្រាក់១
-ក្រុមបុរស (នុត វិសាល, ហេង រ៉ាវុធ, ហួត សុវុត្ថា, ឈន សុខុម, ឈុំ ហាប់ឈុន, ជាតិ ខេមរិន្ទ) ប្រាក់១
Tag:
ស៊ីហ្គេម
SeaGames
ប៉េតង់
ប្រដាល់
គុនខ្មែរ
© រក្សាសិទ្ធិដោយ thmeythmey.com