ក្រសួងការបរទេសកម្ពុជា បានបញ្ចប់សុពលភាពលិខិតឆ្លងដែនប្រភេទធម្មតា (Ordinary Passport) របស់សកម្មជននិងមន្ត្រីនៃអតីតគណបក្សសង្គ្រោះជាតិ២៧នាក់បន្ថែមទៀត។ ក្រសួងការបរទេស បានធ្វើបញ្ជីឈ្មោះអ្នកទាំងនោះ នៅ២០ ខែវិច្ឆិកា ឆ្នាំ២០១៩ ហើយបញ្ជូនទៅកាន់គ្រប់ស្ថានទូតបរទេសប្រចាំកម្ពុជា ដើម្បីឲ្យបញ្ជូនបន្ត ទៅកាន់រដ្ឋាភិបាលរបស់ពួកគេ។
លោក កុយ គួង អ្នកនាំពាក្យក្រសួងការបរទេស ប្រាប់សារព័ត៌មានថ្មីៗតាមទូរសព្ទ នៅថ្ងៃទី៦ ខែធ្នូ ឆ្នាំ២០១៩ ថា អ្នកទាំងអស់នោះ ជាជនមានទោស ជាពិសេសពាក់ព័ន្ធនឹងការចូលរួមក្នុងគម្រោងធ្វើរដ្ឋប្រហារជាមួយលោក សម រង្ស៊ី កន្លងមក។ លោក បន្តថា ការបញ្ចប់សុពលភាពលិខិតឆ្លងដែននេះ គឺដើម្បីកុំឲ្យពួកគេ អាចធ្វើដំណើរទៅក្រៅប្រទេសទៀត ហើយវិលមកអនុវត្តទោសនៅកម្ពុជា។
លោក បន្ថែមថា បើមិនមានលិខិតឆ្លងដែនផ្សេង ក្រៅពីលិខិតឆ្លងដែនកម្ពុជា ពួកគេ នឹងក្លាយជនខុសច្បាប់ ពេលពួកគេ បន្តរស់នៅក្នុងប្រទេសដទៃ។ លោក អះអាងទៀតថា ការរស់នៅដោយខុសច្បាប់បែបនេះ ម្ចាស់ប្រទេស អាចនឹងបញ្ជូនពួកគេ មកកម្ពុជាវិញ។
អ្នកនាំពាក្យការបរទេស បញ្ជាក់ដូច្នេះថា៖«ពួកគាត់ ប្រើលិខិតឆ្លងដែនខ្មែរហ្នឹង ដើម្បីរត់គេចពីសំណាញ់ច្បាប់។ បើពួកគាត់ នៅក្នុងស្រុកខ្មែរ ប្រឈមមុខនឹងតុលាការធម្មតា មានអ្នកណាទៅដកលិខិតឆ្លងដែនរបស់ពួកគាត់»។
យ៉ាងណា មន្ត្រីការបរទេសរូបនេះ ហ៊ានសន្និដ្ឋានថា បើត្រឡប់មកកម្ពុជាវិញ ពួកគេ ប្រហែលជាមិនប្រឈមនឹងផ្លូវច្បាប់ឡើយ ពោលគឺ ពួកគេ អាចនឹងទទួលបានការអនុគ្រោះពីតុលាការ តាមការស្នើឡើងរបស់សម្តេចនាយករដ្ឋមន្ត្រី ហ៊ុន សែន នាពេលកន្លងមក។
សម្តេចនាយករដ្ឋមន្ត្រី ប្រកាសកន្លងមកថា អ្នកជាប់ឃុំក្រោមបទចូលរួមក្នុងគម្រោងធ្វើរដ្ឋប្រហារ គួរតែត្រូវបានដោះលែង ហើយចំពោះអ្នកដែលមិនទាន់ត្រូវចាប់ខ្លួន តុលាការ គួរបញ្ចប់ការតាមចាប់ពួកគេ។ លើសពីនេះ ប្រមខុរដ្ឋាភិបាល ថែមទាំងអំពាវនាវឲ្យអ្នកដែលរត់គេចទៅក្រៅប្រទេស ឬក៏កំពុងលាក់ខ្លួនក្នុងប្រទេស ឲ្យចេញមុខហើយត្រឡប់ទៅរស់នៅជាមួយគ្រួសារវិញជាធម្មតា ដោយធានាថា នឹងមិនមានការចាប់ខ្លួនឡើយ។
មូលហេតុដែលនាំឲ្យមានការអនុគ្រោះដល់អ្នកទាំងនោះ គឺដោយសារតែប្រមុខរដ្ឋាភិបាល យល់ថា គម្រោងធ្វើរដ្ឋប្រហាររបស់លោក សម រង្ស៊ី ត្រូវបរាជ័យទៅហើយ។ ប្រមុខរដ្ឋាភិបាល ចាត់ទុក ការសម្រេចចិត្តបែបនេះ ថាជាការប្រោសប្រណីរបស់រដ្ឋាភិបាលចំពោះពួកគេ ដែលចាញ់ឧបាយកលរបស់លោក សម រង្ស៊ី។ ក្រោយការប្រកាសរបស់ប្រមុខរដ្ឋាភិបាល មកដល់ពេលនេះ មានអ្នកប្រឆាំងជាង៧០នាក់ហើយ ដែលត្រូវបានដោះលែង។
ក្នុងចំណោមអ្នកទាំង២៧នាក់ ដែលត្រូវបញ្ចប់សុពលភាពលិខិតឆ្លងដែន មានស្ត្រី៦នាក់ គឺ វ៉ាន តារា (Van Dara), កុន ម៉ាច (Kun Mach), កឹម តុលា (Kim Tola), យ៉ក នាង (York Neang), សៅ ឧសភា (Sao Ousaphea), និង ញឹម គាថា (Ngoeum Keatha)។ ចំណែក បុរសទាំង២១នាក់ គឺ ឈុន វាន (Chhun Vean), ដួង ចាន់ត្រា (Doung Chantra), ស៊ីម ស៊ាងឡេង (Sim Seang Leng), ឃាន វិសេស (Khean Vises), សេង ម៉េងប៊ុនរ៉ុង (Seng Mengbunrong), ម៉ោញ សារ៉ាត់ (Mounh Sarath), រ័ត្ន សុទ្ធី (Roth Sothy), លី រតនរស្មី (Ly Ratanakraksmey), កាក់ កុម្ភារ (Kak Komphea), ម៉ៅ វិបុល (Mao Vibol), ឈុន សិទ្ធី (Chhun Sithy), សួន ចំរើន (Suon Chamroeun), ណេង សុគុណ (Neng Sokhun), ឆាត វិជ្ជា (Chhat Vichea), ឆាំ ឆៃយ៉ា (Chham Chhaiya), ហេង ឡៃហួរ (Heng Laihour), ខិន រឿន (Khin Roeun), ឡេង សេងហុង (Leng Senghong), អាត វិចិត្រ (At Vichet), ចុន សុខងេង (Chon Sokngeng), និង ហៃ វណ្ណា (Hay Vanna) ។
កាលពីខែវិច្ឆិកា ឆ្នាំ២០១៩ កន្លងទៅ ក្រសួងការបរទេស ក៏បានបញ្ចប់សុពលភាពលិខិតឆ្លងដែនប្រភេទធម្មតារបស់មន្ត្រីនិងថ្នាក់ដឹកនាំ១២នាក់នៃអតីតគណបក្សប្រឆាំងផងដែរ ក្រោមហេតុផលដូចគ្នាថា ពួកគេ ប្រើប្រាស់លិខិតឆ្លងដែនកម្ពុជា ដើម្បីរត់គេចពីទោសទណ្ឌ។ អ្នកទាំង១២នាក់គឺ អ្នកស្រី មូរ សុខហួរ លោក អេង ឆៃអ៊ាង លោក ហូរ វ៉ាន់ លោក ឡុង រី លោក សោ ចាន់ដេត លោក គង់ សភា លោក វ៉ាន់ ណារិទ្ធ លោក ដាង ចំរើន លោក ញឹម គិមញុល លោក ហេង ដាណារ៉ូ លោក អ៊ីសា ឧស្មាន និង លោក ម៉ន ផល្លា៕