អន្តរជាតិ
កូរ៉េខាងជើង ព្រមានអាមេរិកថា សង្គ្រាមពាក្យសម្តីរវាងប្រទេសទាំងពីរអាចកើតឡើងម្តងទៀត លោកប្រធានាធិបតីដូណាល់ ត្រាំ (ខាងឆ្វេង) និងមេដឹកនាំកូរ៉េខាងជើង គីម ជុងអ៊ុន។ រូបភាព៖ Xinha
× មន្ត្រីការទូតជាន់ខ្ពស់កូរ៉េខាងជើង នោថ្ងៃទី៥ ខែធ្នូ បានព្រមានពីការផ្ទុះសង្គ្រាមពាក្យសម្ដីឡើងវិញ បន្ទាប់ពី ការប្រើពាក្យសម្តីមិនសមរម្យរបស់ប្រធានាធិបតីដូណាល់ ត្រាំ លើមេដឹកនាំ គីម ជុងអ៊ុន ដែលក្រុងព្យុងយ៉ាងចាត់ទុក ជាការមិនឲ្យតម្លៃ។ ការលើកឡើងរបស់មន្ត្រីជាន់ខ្ពស់បែបនេះ គឺបន្ទាប់ពីលោក ដូណាល់ ត្រាំ បានហៅ មេដឹកនាំកូរ៉េខាងជើង គីម ជុងអ៊ុនថា «បុរសរ៉ុក្កែត»។
ក្នុងសេចក្តីថ្លែងការណ៍ ដែលបានចេញផ្សាយដោយទីភ្នាក់ងារព័ត៌មានKCNA អនុរដ្ឋមន្ត្រីការបរទេសកូរ៉េខាងជើង Choe Son-hui បានព្រមានយ៉ាងច្បាស់ៗថា ទីក្រុងព្យុងយ៉ាង អាចផ្ទុកសង្គ្រាមពាក្យសម្តីជាមួយទីក្រុងវ៉ាស៊ីនតោនម្តងទៀត បន្ទាប់ពីប្រធានាធិបតីអាមេរិក ដូណាល់ ត្រាំ បានហៅមេដឹកនាំកូរ៉េខាងជើង គីម ជុងអ៊ុន ក្នុងអំឡុងកិច្ចប្រជុំបក្សសម្ពន្ធយោធាណាតូនាទីក្រុងឡុងដ៍ ថា «បុរសរ៉ុកែត»។
ទន្ទឹមគ្នានេះ អ្នកស្រី Choe Son-hui បានបញ្ជាក់ទៀតថា ពាក្យឌឺដងរបស់លោកត្រាំ បានធ្វើឲ្យលោក គីមមិនពេញចិត្តជាខ្លាំង។ តាមការចុះផ្សាយរបស់ទីភ្នាក់ងារព័ត៌មាន Yonhap លោកស្រី Choe បាននិយាយយ៉ាងដូច្នេះថា៖ «ប្រសិនបើពាក្យបុរសរ៉ុកែតលេចឡើងម្តងទៀត កូរ៉េខាងជើងច្បាស់ណាស់ថានឹងឆ្លើយតបត្រលប់ទៅវិញ ដោយភាសា ឬពាក្យមិនសមរម្យដូចគ្នា។»
យ៉ាងណាក៏ដោយ ដើម្បីការពារកុំឲ្យបញ្ហាកាន់តែស្មុគស្មាញ លោកស្រី Choe ក៏បានបន្ថែមទៀតថា បើទោះបីជាលោកត្រាំប្រើពាក្យ «បុរសរ៉ុក្កែត» នៅក្នុងកិច្ចប្រជុំNATOក៏ពិតមែន ប៉ុន្តែលោក គីម មិនទាន់បានប្រើពាក្យមិនសមរម្យណាមួយដាក់ប្រធានាធិបតីអាមេរិកនៅឡើយទេ។
សេចក្តីថ្លែងការណ៍មួយនេះ គឺធ្វើឡើងតែមួយថ្ងៃប៉ុណ្ណោះ បន្ទាប់ពីលោក ប៉ាក់ ជុងឆុន (Pak Jong Chon) នាយអគ្គសេនាធិការកងទ័ពប្រជាជនកូរ៉េខាងជើង បានឆ្លើយតបទៅកាន់មេដឹកនាំអាមេរិកថា កូរ៉េខាងជើង នឹងប្រើប្រាស់វិធានការគ្រប់បែបយ៉ាង ដើម្បីការពារពីការវាយប្រហារយោធាពីសំណាក់អាមេរិក។
សូមបញ្ជាក់ថា កាលពីឆ្នាំ ២០១៧ ជាអំឡុងពេល នៃភាពតានតឹងយ៉ាងខ្លាំងរវាងទីក្រុងព្យុងយ៉ាង និងទីក្រុងវ៉ាស៊ីនតោន មេដឹកនាំគីម និងប្រធានាធិបតី ត្រាំ បានឌឺដងផ្លែផ្កាដាក់គ្នាកគ្នាទៅវិញទៅមក។ ក្នុងពាក្យឌឺដងទាំងនោះ លោកត្រាំបានហៅមេដឹកនាំកូរ៉េខាងជើងថា « បុរសរ៉ុក្កែតតូច» ខណៈពេលលោក គីមបានហៅប្រធានាធិបតីអាមេរិកថា «មនុស្សចាស់វង្វេងស្មារតី»៕
Tag:
កូរ៉េខាងជើង
អាមេរិក
© រក្សាសិទ្ធិដោយ thmeythmey.com