ជាតិ
ថវិកាសម្រាប់ធ្វើទំនើបកម្មមន្ទីរពេទ្យកាល់ម៉ែត្រ កើនជាង១០០លានដុល្លារ
× ភ្នំពេញ៖ គិតត្រឹមថ្ងៃទី៦ ខែធ្នូនេះ ថវិកាដែលទទួលបានពីសប្បុរសជនសម្រាប់ធ្វើទំនើបកម្មមន្ទីរពេទ្យកាល់ម៉ែត្រ បានកើនឡើងដល់ ៧០លានដុល្លារ និងប្រាក់រៀល ៣២លានរៀល។ នេះបើតាមសារនៅលើហ្វេសប៊ុកសម្ដេចនាយករដ្ឋមន្ត្រី ហ៊ុន សែន នៅព្រឹកថ្ងៃនេះ។
បើគិតទាំងថវិកាដែលបញ្ចេញដោយរដ្ឋាភិបាល ៣០លានដុល្លារទៀត ទឹកប្រាក់សរុបសម្រាប់អភិវឌ្ឍន៍មន្ទីរពេទ្យកាល់ម៉ែត មកដល់ពេលនេះគឺមានចំនួនប្រមាណជាង ១០០លានដុល្លារអាមេរិក។
សម្ដេចបានគូសបញ្ជាក់ដូច្នេះថា៖«បើគិតទាំងថវិការ៣០លានដុល្លាររបស់រាជរដ្ឋាភិបាលផង ចំនួនទឹកប្រាក់ឡើងដល់ជាង១០០លានដុល្លារដែលធ្វើឱ្យយើងមានលទ្ធភាព រៀបចំមន្ទីរពេទ្យកាល់ម៉ែតឱ្យក្លាយទៅជាមជ្ឈមណ្ឌលពហុបច្ចេកទេស សម្រាប់ការពិនិត្យព្យាបាលជូនប្រជាជនយើងឱ្យកាន់តែមានប្រសិទ្ធភាព»។
ជាមួយគ្នានេះ ប្រមុខរដ្ឋាភិបាលបានថ្លែងអំណរគុណដល់សប្បុរសជនយ៉ាងដូច្នេះថា៖«ខ្ញុំសូមអរគុណចំពោះសប្បុរសជនទាំងអស់ដែលចូលរួមបរិច្ចាគ ដើម្បីសង្គ្រោះជិវិតមនុស្សតបតាមការអំពាវនាវរបស់ខ្ញុំ»។
ការរៃអង្គាសថវិកាសប្បុរសជនមកធ្វើទំនើបកម្មមន្ទីរពេទ្យកាល់ម៉ែតនេះ គឺបានចាប់ផ្ដើមតាំងពីពីរសប្ដាហ៍មុន ខណៈដែលសម្ដេចបានទៅកំដរម្ដាយក្មេកសម្រាកព្យាបាល និងបានមើលឃើញពីភាពខ្វះខាតអគារ និងសម្ភារៈនៅមន្ទីរពេទ្យមួយនេះ៕
© រក្សាសិទ្ធិដោយ thmeythmey.com