អន្តរជាតិ
ត្រាំ អំពាវនាវឲ្យធនាគាពិភពលោក ឈប់ឲ្យលុយចិនខ្ចីបន្ត ប្រធានាធិបតីអាមេរិក ដូណាល់ ត្រាំ។ រូបភាព៖ Reuters
× ប្រធានាធិបតីអាមេរិក ដូណាល់ ត្រាំ នៅថ្ងៃទី ៦ ខែធ្នូ បានអំពាវនាវដល់ធនាគាពិភពលោក ឈប់បន្តឲ្យចិនខ្ចីលុយ ខណៈពេលអង្គការអន្តរជាតិមួយនេះ បានអនុម័តគម្រោងកម្ចីជាង ១ពាន់លានដុល្លារសម្រាប់ទីក្រុងប៉េកាំង។ ការចេញមុខអំពាវនាវបែបនេះ គឺដោយសារតែលោក ដូណាល់ ត្រាំ សំអាងថាចិន គឺជាប្រទេសអ្នកមាន និងមានលុយចាយច្រើនហូរហៀរ។
ធនាគាពិភពលោក នៅថ្ងៃទី៥ ខែធ្នូ បានអនុម័តគម្រោងផ្តល់ជំនួយទៅចិន ក្នុងទំហំទឹកប្រាក់ពី ១ពាន់លានដុល្លារ ទៅ ១,៥ ពាន់លានដុល្លារ ដោយភ្ជាប់ជាមួយអត្រាការប្រាក់ទាបរហូតដល់ឆ្នាំ ២០២៥។ យ៉ាងណាក៏ដោយ ការផ្តល់ឥណទានជាមធ្យមរបស់ធនាគាពិភពលោក ទៅឲ្យប្រទេសចិន មានការធ្លាក់ចុះ បើធៀបទៅនឹងប្រាំឆ្នាំមុន។ ពោលគឺវាមានទំហំទឹកប្រាក់ជាមធ្យម ១,៨ពាន់លានដុល្លារអាមេរិក។
ក្រោយការអនុម័តផ្តល់ជំនួយក្នុងរយៈពេលតែមួយថ្ងៃប៉ុណ្ណោះ លោកប្រធានាធិបតីអាមេរិក ដូណាល់ ត្រាំ បានចេញមុខប្រតិកម្មយ៉ាងដូច្នេះថា៖ « ហេតុអ្វីធនាគាពិភពលោកផ្តល់ប្រាក់កម្ចីទៅចិន? តើនេះអាចទៅរួចទេ? ចិនមានលុយយ៉ាងច្រើន ហើយប្រសិនបើទីក្រុងប៉េកាំង មិនមានទេ ពួកគេអាចបង្កើតលុយបាន។ ឈប់ទៅ»។ នេះបើតាមការសរសេររបស់លោក ត្រាំនៅលើបណ្តាញសង្គម Twitter នៅថ្ងៃទី៦ ខែធ្នូ។
រហូតមកទល់ពេលនេះ មិនទាន់មានប្រតិកម្មណាមួយចេញពីអ្នកនាំពាក្យរបស់សេតវិមានអាមេរិក និងធនាគារពិភពលោក ទាក់ទិនទៅនឹងបញ្ហានេះនៅឡើយទេ។
ធនាគារពិភពលោក បានផ្តល់ឥណទានដល់ប្រទេសចិនចំនួន ១,៣ ពាន់លានដុល្លារ ក្នុងឆ្នាំសារពើពន្ធ ២០១៩ ដែលបានបញ្ចប់កាលពីថ្ងៃទី៣០ ខែមិថុនា។ ការផ្តល់កម្ចីមួយនេះ គឺមានការធ្លាក់ចុះ បើធៀទៅនឹងឆ្នាំសារពើពន្ធ ២០១៧ ដែលមានទំហំទឹកប្រាក់ ២,៤ពាន់លានដុល្លារ។ បើទោះបីជា ការផ្តល់កម្ចីរបស់អង្គការពិភពលោកមួយនេះ ទៅឲ្យប្រទេសចិនមានការធ្លាក់ចុះក៏ដោយ ក៏ប្រធានាធិបតីអាមេរិក នៅតែមិនពេញចិត្តពីបញ្ហានេះដែរ ព្រោះលោកត្រាំ បានចាត់ទុកចិនថា ជាប្រទេសអ្នកមាន។
សូមបញ្ជាក់ថា ទំនាក់ទំនងរវាងអាមេរិក និងចិន មួយរយៈចុងក្រោយនេះ ទទួលរងភាពចម្រូងចម្រាស់យ៉ាងខ្លាំង។ ជាក់ស្តែងអាមេរិក មិនត្រឹមតែអនុម័តច្បាប់គាំទ្រក្រុមបាតុករនៅទីក្រុងហុងកុងប៉ុណ្ណោះទេ ប៉ុន្តែរដ្ឋសភាអាមេរិកថែមទាំងអនុម័តសេចក្តីស្នើច្បាប់ស្តីពីជនជាតិភាគតិចវីហ្គ័រថែមទៀត។ ជាពិសេសកិច្ចព្រមព្រៀងពាណិជ្ជកម្មដំណាក់កាលទីមួយរបស់ប្រទេសទាំងពីរ កំពុងស្ថិតក្នុងភាពស្រពេចស្រពិលថែមទៀត ៕
Tag:
អាមេរិក
ចិន
ធនាគាពិភពលោក
© រក្សាសិទ្ធិដោយ thmeythmey.com