សៀមរាប៖ ប្រជាសហគមន៍ឃុំកំពង់ឃ្លាំង ដែលមានភូមិសាស្ដ្រជាប់បឹងទន្លេសាបក្នុងខេត្តសៀមរាប កាន់តែយល់ដឹងពីបញ្ហាបរិស្ថាន បន្ទាប់ពីមានកម្មវិធីអប់រំ កម្មវិធីសម្អាតបរិស្ថានក្នុងភូមិជាច្រើនលើកមក។ សហគមន៍នេះ កាន់តែយល់ដឹងពីគុណវិបត្តិនៃសំរាមប្លាស្ទិក និងយល់ពីសារប្រយោជន៍ពេលសហគមន៍មានបរិស្ថានស្អាត។ បរិស្ថានស្អាត នឹងជួយដល់សហគមន៍នេះមានភាពទាក់ទាញដល់ភ្ញៀវទេសចរថែមមួយកម្រិតទៀត និងធ្វើឱ្យសហគមន៍នេះទាញប្រយោជន៍បានកាន់តែច្រើនពីវិស័យទេសចរណ៍ ក្រៅពីពឹងផ្អែកលើការនេសាទ។
ព័ត៌មានលម្អិត សូមស្ដាប់បទយកការណ៍ដែលរៀបរៀងដោយអ្នកនាង អ៊ីសា រ៉ហានី ពីខេត្តសៀមរាបដូចតទៅ
ពីមួយឆ្នាំទៅមួយឆ្នាំ អ្នកឃុំកំពង់ឃ្លាំង មានការយល់ដឹងពីបញ្ហាសំរាមប្លាស្ទិកកាន់តែច្រើន។ ពួកគេបានបង្ហាញការចូលរួម ការចង់ឱ្យសហគមន៍មានភាពស្អាត បរិស្ថានល្អ ជាទីគាប់ភ្នែករបស់ទេសចរទាំងពួង។ សហគមន៍នេះ កាន់តែខិតជិតទៅរកសហគមន៍ទេសចរណ៍ធម្មជាតិមួយដ៏ទាក់ទាញនាពេលអនាគត។
ទិវាបុណ្យបរិស្ថានរដូវទឹកសម្រក ត្រូវបានធ្វើជាទៀងទាត់នាអំឡុងខែវិច្ឆិកា និងខែធ្នូ នាពេលដែលទឹកទន្លេសាបផ្តើមរំកិលខ្លួន ហូរចាក់ទៅផ្នែកខាងលើនៃទន្លេមេគង្គនិងទន្លេបាសាក់។ ទឹកស្រកទៅក៏ពិតមែន តែមិនបាននាំសំរាមប្លាស្ទិកដែលកឿងជាប់នឹងដីល្បាប់ទៅជាមួយនោះទេ។ សំរាមប្លាស្ទិកដែលសេសសល់ទាំងនោះមាន ថង់ប្លាស្ទិក សំបកដបប្លាស្ទិក និងប្រភេទសម្ភារប្រើប្រាស់ធ្វើពីស្លោយ៉ាងច្រើនសន្ធឹក។
នាថ្ងៃទី១ ធ្នូ សហគមន៍កំពង់ឃ្លាំងដោយមានការគាំទ្រពីអង្គការអភិវឌ្ឍន៍បានប្រារព្ធទិវាបុណ្យបរិស្ថានបឹងទន្លេសាបរដូវទឹកសម្រក។ ទិវានេះធ្វើឡើងក្នុងបំណងអប់រំពលរដ្ឋឱ្យមានចំណេះដឹងទាក់ទងនឹងសំរាមប្លាស្ទិក ចេះទុកដាក់វេចខ្ចប់ឱ្យបានត្រឹមត្រូវ ការកែច្នៃ និងសង្គ្រោះបឹងទន្លេសាបចេញពីការបំពុលដោយប្លាស្ទិក។
មេឃុំកំពង់ឃ្លាំង លោក ទូច សុផុន បានឱ្យដឹងថា សហគមន៍លោកប្រារព្ធទិវាសម្អាតបរិស្ថាននេះឡើង ក្នុងបុព្វហេតុចង់ឱ្យសហគមន៍មានភាពស្រស់ស្អាត គ្មានសំរាម និងពញាក់ស្មារតីពលរដ្ឋឱ្យមានចំណេះដឹងជុំវិញបញ្ហាបរិស្ថាន។ លោកបន្តថា រីករាយពេលមានអង្គការដៃគូចូលរួមក្នុងយុទ្ធនាការបរិស្ថាននេះ ដ្បិតថាបញ្ហាសំរាមលោកមិនអាចដោះស្រាយតែម្នាក់ឯងនោះទេ។
ទាក់ទងនឹងបញ្ហាសំរាមនេះ លោកមេឃុំកំពង់ឃ្លាំងយល់ថា ការសម្អាតបរិស្ថានគឺសំខាន់ណាស់ ព្រោះថាសំរាមប៉ះពាល់ដល់សុខភាពមនុស្ស និងការបំពុលប្រព័ន្ធជីវៈចម្រុះក្នុងទឹកដែលមានត្រី ក៏ដូចជាប្រភពទឹកដែលជាធនធានសំខាន់សម្រាប់អ្នកភូមិ។ ជាមួយគ្នានោះ ពេលណាបរិស្ថានស្អាត ភាពទាក់ទាញក្នុងវិស័យទេសចរណ៍ក៏ទៅជាមួយគ្នានោះដែរ ទេសចរនឹងកោតសរសើរពីការយកចិត្តទុកដាក់លើការគ្រប់គ្រងបរិស្ថាននៅតំបន់នេះ។
ប្រធានអង្គការមូលនិធីទំពាំងស្នងឫស្សី លោក ស៊ា សុផល ដែលបានសហការចូលរួមរៀបចំទិវាបរិស្ថានបឹងទន្លេសាប បានឱ្យដឹងថា នេះជាឆ្នាំទី២ហើយដែលអង្គការលោកបានសហការចូលរួមសម្អាតបរិស្ថាននៅកំពង់ឃ្លាំងនារដូវទឹកសម្រក។ លោក សុផល កត់សម្គាល់ឃើញថា សំរាមនៅឆ្នាំនេះមិនសូវសម្បូរច្រើនទេ ព្រោះរបបទឹកទាបនិងលិចភូមិលឿន គឺទឹកឡើងលឿនហើយស្រកទៅវិញក៏លឿនដែរ ទើបមិនសូវមានសំរាមទើរលើមែកឈើ។ យ៉ាងណា សំរាមប្លាស្ទិកកឿងកកច្រើននៅជាប់ដីល្បាប់ ហើយអង្គការលោក សុផល នឹងធ្វើយុទ្ធនាការម្ដងទៀត មុននឹងរដូវទឹកឡើង។
ខុសពីឆ្នាំទៅបន្ដិច ដ្បិតថាយុទ្ធនាការសម្អាតបរិស្ថានរដូវទឹកសម្រកឆ្នាំនេះ ក៏បានធ្វើនៅក្នុងស្ទឹងសៀមរាបដែរ។ អង្គការមូលនិធិទំពាំងស្នងឫស្សីបានចាប់ដៃគ្នាជាមួយសង្កាត់សៀមរាប ចុះបារសំរាមជាច្រើនសន្ធឹកក្នុងស្ទឹង ដែលស្ទឹងសៀមរាបជាប្រភពទឹកសំខាន់ហូរចាក់ទៅបឹងទន្លេសាប។ យុទ្ធនាការនៅឆ្នាំនេះចាប់ផ្តើមពីថ្ងៃទី២៨ វិច្ឆិកា ដោយបានចុះសម្អាតបរិស្ថាននៅស្ទឹងសៀមរាប សហគមន៍មេជ្រៃ សហគមន៍ចុងឃ្នៀស និងថ្ងៃបញ្ចប់កម្មវិធីនៅថ្ងៃទី១ ធ្នូ ជាទិវាបរិស្ថាននៅសហគមន៍កំពង់ឃ្លាំង ដែលមានអ្នកចូលរួមសរុបប្រមាណ៦ពាន់នាក់។
ក្រោយមានការចុះអប់រំបរិស្ថាន និងប្រមូលសំរាមប្លាស្ទិកជាប់ៗគ្នាមក សហគមន៍នេះមានការប្រែប្រួល។ មេឃុំកំពង់ឃ្លាំង លោក ទូច សុផុន កត់សម្គាល់ថា សហគមន៍លោកប្រែមុខមាត់ថ្មី បរិស្ថានកាន់តែស្អាត ចំណែកទេសចរមានចំនួនកើនឡើង។ តាមការពន្យល់របស់លោកឃុំ ប្រជាពលរដ្ឋផ្តើមយល់ពីផលប៉ះពាល់បរិស្ថាន ដូចជាលែងដុតសំរាមជាដើម។ លោក ទូច សុផុន មិនភ្លេចអរគុណអង្គការដៃគូ រួមនិងស្ថាប័នពាក់ព័ន្ធនានាដែលបានជួយកិច្ចការបរិស្ថាននៅក្នុងសហគមន៍នេះទេ គឺស្ថាប័នទាំងនោះហើយទើបធ្វើឱ្យកំពង់ឃ្លាំងប្ដូរមុខមាត់ថ្មី។
គួរបញ្ជាក់ថា យុទ្ធនាការសម្អាតបរិស្ថានរដូវទឹកសម្រកនៅឆ្នាំនេះ សហគមន៍បានប្រមូលសំរាមសរុបជាង ២ពាន់ការ៉ុង ដែលមានអ្នកចូលរួមប្រមាណ៦ពាន់នាក់៕