កីឡាជាតិ
ជាតិ
លោក Felix៖ ចាញ់វៀតណាមមិនមែនជាអ្វីដែលយើងចង់បាន ប៉ុន្តែខ្ញុំពេញចិត្តស្មារតីក្រុមរបស់កីឡាករ ទិដ្ឋភាពប្រកួតកាលពីថ្ងៃទី៧ ខែធ្នូ។ រូបថត FFC
× ភ្នំពេញ៖ នាសន្និសីទសារព័ត៌មានក្រោយចប់ការប្រកួតវគ្គពាក់កណ្តាលផ្តាច់ព្រ័ត្រ កីឡាស៊ីហ្គេម ដែលកម្ពុជាចាញ់វៀតណាម៤-0 កាលពីថ្ងៃទី៧ ខែធ្នូ លោក Felix Dalmas គ្រូបង្វឹកកម្ពុជា បានលើកឡើងថា ថ្វីដ្បិតលទ្ធផលដែលកម្ពុជាទទួលបាននេះមិនមែនជាអ្វីដែលកម្ពុជាចង់បានក៏ដោយ តែនេះក៏ចាត់ទុកថា ជាអ្វីដែលកីឡាករបានខិតខំអស់ពីកម្លាំងកាយចិត្ត។
«ទោះជាលទ្ធផលនេះមិនមែនជាអ្វីដែលយើងចង់បាន សម្រាប់ខ្ញុំគឺពេញចិត្តនឹងអ្វីដែលយើងបានបង្ហាញ ហ៊ានលេង ការតាំងចិត្ត និងស្មារតីជាក្រុម គឺដូចអ្វីដែលខ្ញុំចង់បានពីកីឡាកររបស់យើង»។ នេះជាការបញ្ជាក់របស់លោក Felix Dalmas សញ្ជាតិអាហ្សង់ទីន។
ក្រុមយុវជនអាយុក្រោម២២ កម្ពុជានៅមានឱកាសដណ្តើមេដាយសំរឹទ្ធិជាមួយមីយ៉ាន់ម៉ា នាថ្ងៃទី១០ ខែធ្នូ វេលាម៉ោង៣រសៀល ខាងមុខនេះ ដែលនឹងប្រព្រឹត្តនៅកីឡដ្ឋាន Rizal Memorial ដដែល មុនពេលវៀតណាម ត្រូវតទល់ជាមួយឥណ្ឌូណេស៊ី ដណ្តើមមេដាយមាស នៅវគ្គផ្តាច់ព្រ័ត្រ។
លោក Felix សង្ឃឹមថា ការប្រកួតនេះនឹងជាការប្រកួតដ៏ជក់ចិត្តបន្ថែមទៀត។ «ខ្ញុំសង្ឃឹមថាក្នុងការប្រកួតបន្តទៀតនេះ ពលរដ្ឋខ្មែរនឹងនៅតែជួយលើកទឹកចិត្តកីឡាករយើង ហើយយើងនៅតែមានឆន្ទៈ ធ្វើឲ្យទង់ជាតិកម្ពុជាត្រដែតខ្ពស់តាមតែអាចធ្វើបាន»៕
Tag:
បាល់ទាត់
ស៊ីហ្គេម
SEAGames
© រក្សាសិទ្ធិដោយ thmeythmey.com