ជាតិ
លោក ថោង ខុន៖ ពាក់កណ្តាលម៉ារ៉ាតុននៅអង្គររួមចំណែកយ៉ាងសំខាន់ក្នុងការទាក់ទាញភ្ញៀវទេសចរ
× ភ្នំពេញ៖ ព្រឹត្តិការណ៍រត់ពាក់កណ្តាលម៉ារ៉ាតុននៅអង្គរ ខេត្តសៀមរាប នៅថ្ងៃទី៨ ខែធ្នូនេះ បានទាក់ទាញភ្ញៀវទេសចរជាតិ-អន្តរជាតិចំនួន១ម៉ឺន២ពាន់នាក់។ លោក ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា (NOCC) បានលើកឡើងថា ចំនួនភ្ញៀវទេសចរនេះ នាំឲ្យមានការផ្លាស់ប្តូរថ្មីមួយសម្រាប់វិស័យទេសចរណ៍ និងសេដ្ឋកិច្ចនៅក្នុងខេត្តសៀមរាប។
លោក ថោង ខុន បានបញ្ជាក់ថា ព្រឹត្តិការណ៍រត់ពាក់កណ្តាលម៉ារ៉ាតុនអង្គរឆ្នាំនេះ មានអ្នកចូលរួមប្រមាណ១២,១៧៥ ដែលមកពី៨៥ប្រទេស ដែលកើនឡើងដល់២០ភាគរយ បើធៀបនឹងឆ្នាំ២០១៨។ បើតាមលោក ថោង ខុន ទិវានេះ ពិតជានាំមកនូវកាលានុវឌ្ឍភាពថ្មីៗសម្រាប់វិស័យទេសចរណ៍ និងសេដ្ឋកិច្ចសង្គម គឺស្របពេលដែលកម្ពុជាកំពុងតែរស់នៅក្នុងសន្តិភាព ស្ថេរភាពនយោបាយ និងសម្បូរសប្បាយ។
«ខ្ញុំពិតជាមានមោទកភាពណាស់ ដែលព្រឹត្តិការណ៍កីឡាទេសចរណ៍នេះ បានក្លាយជាដែកឆក់ថ្មី នៃផលិតផលទេសចរណ៍ច្នៃបង្កើតថ្មីមួយដ៏មានសារៈសំខាន់ រួមចំណែកទាក់ទាញភ្ញៀវទេសចរជាតិ និងអន្ដរជាតិរ៉ាប់ម៉ឺននាក់ក្នុងរយៈពេលតែមួយ។ ក្រសួងទេសចរណ៍ និងគ្រប់ភាគីពាក់ព័ន្ធ បានខិតខំប្រឹងប្រែងការធ្វើពិពិធកម្មផលិតផលទេសចរណ៍ឲ្យកាន់តែមានភាពទាក់ទាញថ្មីៗ ប្លែកៗបន្ថែមទៀត ដើម្បីសម្រេចគោលដៅកំណើនទេសចរអន្ដរជាតិដល់ ៧លាននាក់ក្នុងឆ្នាំ២០២០»។ នេះជាការលើកឡើងរបស់លោក ថោង ខុន រដ្ឋមន្ត្រីក្រសួងទេសចរណ៍។
ព្រឹត្តិការណ៍រត់ពាក់កណ្តាលម៉ារ៉ាតុនកាលពីព្រឹកថ្ងៃអាទិត្យ មានអ្នករត់២១គីឡូម៉ែត្រ ចំនួន៣,០៧៩នាក់ អ្នករត់ ១០គីឡូម៉ែត្រមាន៥,០២៩នាក់, អ្នករត់៥គីឡូម៉ែត្រមាន១,៨០៤នាក់ និងអ្នករត់៣គីឡូម៉ែត្រមាន ២,២៦៣នាក់។ ក្នុងព្រឹត្តិការណ៍នោះក៏មានការប្រណាំងម៉ូតូធំដែលមានអ្នកចូលរួមចំនួន៥ម៉ឺននាក់ ចូលរួមចំណែកផ្សព្វផ្សាយវិស័យកីឡា និងទេសចរណ៍ផងដែរ។ នេះបើតាមការផ្សាយព័ត៌មានរបស់ក្រសួងទេសចរណ៍៕
Tag:
ថោង ខុន
សៀមរាប
ម៉ារ៉ាតុង
កីឡា
© រក្សាសិទ្ធិដោយ thmeythmey.com