ជាតិ
សង្គមជាតិ
×![]()
ភ្នំពេញ៖ ក្រសួងធនធានទឹក និងឧតុនិយម បានចេញផ្សាយសេចក្តីជូនដំណឹងថា ចាប់ពីថ្ងៃទី១០ ខែធ្នូ ឥទ្ធិពលជ្រលងសម្ពាធខ្ពស់ដែលបានគ្របដណ្តប់លើកម្ពុជានោះ នឹងចុះថមថយដោយរំកិលឡើងលើជាលំដាប់។ ស្ថានភាពបែបនេះ ធ្វើឲ្យអាកាសធាតុ ចាប់ពីថ្ងៃទី១០ ដល់ទី១៣ ខែធ្នូនៅខេត្តឧត្តរមានជ័យ ព្រះវិហារ ស្ទឹងត្រែង រតនគិរី មណ្ឌលគិរី និងប៉ៃលិន មានសីតុណ្ហភាពអប្បបរមាពី ១៧-១៩ អង្សា និងសីតុណ្ហភាពអតិបរមាពី២៤-២៦អង្សា ។ 
រីឯខេត្តបន្ទាយមានជ័យ សៀមរាប បាត់ដំបង កំពង់ធំ ពោធិ៍សាត់ ក្រចេះ និងកោះកុង មានសីតុណ្ហភាពអប្បបរមាពី១៩-២១អង្សា និងសីតុណ្ហភាពអតិបរមាពី២៥-២៧អង្សា។ នេះបើតាមសេចក្តីជូនដំណឹងដដែល ដោយបន្តថា ខេត្តកំពង់ស្ពឺ កំពង់ឆ្នាំង កណ្តាល ព្រៃវែង ស្វាយរៀង កំពង់ចាម ត្បូងឃ្មុំ និងរាជធានីភ្នំពេញ មានសីតុណ្ហភាពអប្បបរមាពី២០-២២អង្សា និងសីតុណ្ហភាពអតិបរមាពី២៧-២៩អង្សា។ ចំណែកខេត្តតាកែវ កំពត កែប និងព្រះសីហនុ មានសីតុណ្ហភាពអប្បបរមាពី២២-២៤អង្សា និងសីតុណ្ហភាពអតិបរមាពី២៨-៣០អង្សា។
ដោយឡែក ចាប់ពីថ្ងៃទី១៤ ដល់ថ្ងៃទី១៦ ធ្នូ បណ្តាខេត្តនៅជាប់ក្បែរតំបន់ជួរភ្នំដងរែក និងខ្ពង់រាប នឹងមានសីតុណ្ហភាពអប្បបរមាពី ២១-២៣ អង្សា និងសីតុណ្ហភាពអតិបរមាពី ២៨-៣១ អង្សា។ រីឯបណ្តាខេត្តនៅតំបន់វាលទំនាបកណ្តាល និងតំបន់មាត់សមុទ្រ នឹងមានសីតុណ្ហភាពអប្បបរមាពី ២២-២៥ អង្សា និងសីតុណ្ហភាពអតិបរមាពី ២៩-៣២ អង្សា។ នេះបើតាមការផ្សាយរបស់ក្រសួងធនធានទឹក និងឧតុនិយម។
ក្រសួងធនធានទឹក អំពាវនាវឲ្យប្រជាពលរដ្ឋ ពិសេសកងទ័ពនៅតាមបន្ទាត់ព្រំដែន ក្នុងភូមិសាស្ត្រតំបន់ជួរភ្នំដងរែក និងខ្ពង់រាបឦសាន ប្រុងប្រយ័ត្ន បង្ការ និងថែរក្សាសុខភាពពីអាកាសធាតុត្រជាក់ ចាប់ពីថ្ងៃទី១០ ដល់ថ្ងៃទី១៣ ធ្នូនេះ៕
Tag:
ធាតុអាកាស
ត្រជាក់
រងា
© រក្សាសិទ្ធិដោយ thmeythmey.com
