អន្តរជាតិ
អង់គ្លេស ត្រៀមបោះឆ្នោតលើកទីបីក្នុងពេលបួនឆ្នាំកន្លះ, លោក ចនសុន រំពឺងបន្តធ្វើនាយករដ្ឋមន្ត្រី
នាយករដ្ឋមន្រ្តីអង់គ្លេស បូរីស ចនសុន និងមេដឹកនាំប្រឆាំង ជេរេមី ខប៊ីន ។ រូបភាព AFP
×![]()
ដោយ: តន ចាន់រិទ្ធារ៉ា
នៅថ្ងៃទី១៤ ខែធ្នូខាងមុខ ពលរដ្ឋអង់គ្លេស នឹងត្រូវបោះឆ្នោតជ្រើសរើសសមាជិកសភាជាលើកទីបីក្នុងរយៈពេលត្រឹមបួនឆ្នាំកន្លះប៉ុណ្ណោះ។ ការចាកចេញពីសហភាពអឺរ៉ុប ដែលជាដើមហេតុនាំឲ្យការបោះឆ្នោតមុនអាណត្តិពេលនេះ ជាសំណុំរឿងសំខាន់ដែលបក្សនយោបាយនានាយកទៅទាក់ទាញការគាំទ្រ។ លោក បូរីស ចនសុន របស់បក្សអភិរក្សកំពុងកាន់អំណាច រំពឹងថា អាចបន្តដឹកនាំអង់គ្លេសទៀត ខណៈត្រូវប្រឈមមុខជាមួយលោក ជេរេមី ខប៊ីន គូប្រជែងស្រួចស្រាល់មកពីបក្សពលករ។
យុទ្ធនាការស្វែងរកសំឡេងឆ្នោតនៅអង់គ្លេស បានឈានដល់ដំណាក់កាលចុងក្រោយនៅថ្ងៃទី៩ ខែធ្នូ ខណៈនាយករដ្ឋមន្ត្រី បូរីស ចនសុន និងគូប្រជែងធំ ជេរេមី ខប៊ីន កំពុងព្យាយាមប្រមូលសំឡេងគាំទ្រមុនការបោះឆ្នោតថ្ងៃទី១៤ ខែធ្នូខាងមុខ។ ការចាកចេញពីសហភាពអឺរ៉ុប នៅតែជារបៀបសំខាន់ក្នុងចំណោមបក្សនយោបាយនានា។
លោក ចនសុន រំពឹងថា អាចប្រមូលបានសំឡេងភាគច្រើននៅក្នុងសភាដែលមានកៅអីសរុប៥៥០ ។ បក្សអភិរក្សបានបាត់សំឡេងភាគច្រើននេះសម័យអ្នកស្រី ថេរ៉េសា ម៉េយ៍ ក្នុងការបោះឆ្នោតកាលពីពីរឆ្នាំមុន។ បើមិនអាចរកសំឡេងភាគច្រើនទេនោះ គោលដៅចាកចេញពីអឺរ៉ុបរបស់បក្សអភិរក្ស នឹងជួបបញ្ហាមិនខាន។ នៅថ្ងៃទី៨ ខែធ្នូ លោក ចនសុន ចេញមុខព្រមានថា លទ្ធផលបោះឆ្នោតថ្ងៃទី១៤ មានឥទ្ធិពលរាប់សិបទសវតរ្ស៍ឯណោះ។
បើតាមទីភ្នាក់ងារព័ត៌មាន AFP ការស្ទាបស្ទង់បង្ហាញថា បក្សអភិរក្សលោក ចនសុន មានសំឡេងនាំមុខបក្សពលកររបស់លោក ខប៊ីន ចំនួន១០ភាគរយ ខណៈលោក ខប៊ីន មិនទាន់អាចរកសំឡេងបានច្រើនដូចកាលពីការបោះឆ្នោតឆ្នាំ២០១៧ ដែលធ្វើឲ្យបក្សអភិរក្សបាត់បង់សំឡេងភាគច្រើននោះឡើយ។ បើអាចរក្សាគម្លាតនេះបាន បក្សអភិរក្សអាចទទួលបានសំឡេងភាគច្រើន ហើយលោក ចនសុន ក៏អាចបន្តអង្គុយកៅអីនាយករដ្ឋមន្ត្រីក្នុងនាមជាប្រធានបក្សកាន់អំណាចផងដែរ។
ក្នុងករណីបក្សធំទាំងពីរមិនអាចរកសំឡេងបានគ្រប់ដើម្បីដឹកនាំរដ្ឋាភិបាល បក្សតូចៗមួយចំនួនទំនងដើរតួជាកូនជញ្ជីង។ តួយ៉ាង គណបក្សសេរីនិយមប្រជាធិបតេយ្យ ដែលជាបក្សធំទីបី អាចកាន់សន្លឹកបៀសំខាន់ ប៉ុន្តែបក្សនេះប្រកាន់ជំហរបន្តសមាជិកភាពក្នុងសហភាពអឺរ៉ុប។ ដូចនេះ វាអាចជារឿងលំបាកសម្រាប់លោក ចនសុន ដែលចង់ចាកចេញពីអឺរ៉ុប ប៉ុន្តែជារឿងងាយស្រួលសម្រាប់បក្សពលករដែលមានជំហរមិនដាច់ស្រេច។
ការបោះឆ្នោតនៅប៉ុន្មានថ្ងៃខាងមុខនេះ ជាការស្នើដោយលោក ចនសុន ផ្ទាល់ បន្ទាប់ពីបរាជ័យជាបន្តបន្ទាប់ក្នុងការអនុម័តកិច្ចព្រមព្រៀងចាកចេញពីសហភាពអឺរ៉ុប។ លោក ចនសុន ទំនងជាសង្ឃឹមខ្ពស់ក្នុងការទទួលបានសំឡេងភាគច្រើនក្នុងសភាដើម្បីបន្តដំណើរចាកចេញពីអឺរ៉ុបដែលជាប់គាំងត្រឹមសភា ខណៈសភាបានចេញច្បាប់ហាមរដ្ឋាភិបាលលោកចាកចេញដោយគ្មានកិច្ចព្រមព្រៀង។ កាលបរិច្ឆេទចាកចេញចុងក្រោយ គឺនៅខែមករា ឆ្នាំ២០២០ ខាងមុខ៕
Tag:
Brexit
អង់គ្លេស
បូរីស ចនសុន
© រក្សាសិទ្ធិដោយ thmeythmey.com
