អន្តរជាតិ
មន្ត្រីកូរ៉េខាងជើង ឌឺលោក ត្រាំ ថា ទីក្រុងព្យុងយ៉ាងគ្មានអ្វីត្រូវបាត់បង់ឡើយ
ប្រធានាធិបតីអាមេរិក ដូណាល់ ត្រាំ (ខាងឆ្វេង) ចាប់ដៃជាមួយមេដឹកនាំកូរ៉េខាងជើង គីម ជុងអ៊ុន នៅក្នុងតំបន់គ្មានយោធា ក្នុងឧបទ្វីបកូរ៉េ។ រូបភាព៖ AP
×![]()
ដោយ: ធៀន ភារិន្ទ
មន្ត្រីជាន់ខ្ពស់កូរ៉េខាងជើង បានឌឺដងដាក់ប្រធានាធិបតីអាមេរិក ដូណាល់ ត្រាំ វិញថា ទីក្រុងព្យុងយ៉ាង គ្មានអ្វី ត្រូវបាត់បង់ឡើយ។ ការលើកឡើងបែបនេះ គឺបន្ទាប់ពីប្រធានាធិបតីអាមេរិក បានព្រមានកូរ៉េខាងជើងថា ប្រសិនបើនៅតែបង្កសកម្មភាពអរិភាពបន្តទៀត ទីក្រុងព្យុងយ៉ាង នឹងបាត់បង់អ្វីៗគ្រប់យ៉ាង។ នេះបើតាមការចុះផ្សាយរបស់ទីភ្នាក់ងារព័ត៌មាន Yonhap នៅថ្ងៃទី៩ ខែធ្នូ។ 
បន្ទាប់ពីពាក្យព្រមានរបស់ប្រធានាធិបតីអាមេរិក ដូណាល់ ត្រាំ ដាក់កូរ៉េខាងជើងយ៉ាងច្បាស់ៗ ពេលនេះលោក Kim Yong-chol អតីតអ្នកចរចានុយក្លេអ៊ែររបស់កូរ៉េខាងជើង បានឆ្លើយតបក្នុងន័យឌឺដងដាក់អាមេរិកវិញថា៖ « យើងគ្មានអ្វី ដែលត្រូវបាត់បង់ទៀតឡើយ»។ បើតាមលោក Kim អាមេរិកស្គាល់កូរ៉េខាងជើងតិចពេកហើយ ហើយលោកដូណាល់ ត្រាំ មានរឿងជាច្រើន ដែលត្រូវដឹងពីកូរ៉េខាងជើង។
ក្នុងសេចក្តីថ្លែងការណ៍ដែលបានចុះផ្សាយដោយទីភ្នាក់ងារព័ត៌មានរដ្ឋកូរ៉េខាងជើង KCNA អតីតអ្នកចរចានុយក្លែអ៊ែរកូរ៉េខាងជើងរូបនេះ បានរំឭកលោក ត្រាំ ដែរថា អាមេរិកកុំសូវព្រមានកូរ៉េខាងជើងពេក ព្រោះវានឹងបង្កឲ្យមានភាពល្អក់កករ ក្នុងទំនាក់ទំនងរវាងប្រទេសទាំងពីរ។ ក្នុងនោះលោក Kim បានណែនាំឲ្យអាមេរិកស្វែងរកផ្លូវ ដែលទប់ស្កាត់ការទាស់គ្នារវាងប្រទេសទាំងពីរ គឺវាល្អជាង។
ជាការពិត ពាក្យព្រមានលោក ត្រាំ បានធ្វើឡើង បន្ទាប់ពីកូរ៉េខាងជើង បានប្រកាសថា ខ្លួនបានទទួលជោគជ័យយ៉ាងធំធេងលើការសាកល្បងរបស់មួយ ប៉ុន្តែមកទល់ពេលនេះ គឺមិនទាន់ដឹងថា កូរ៉េខាងជើងសាកល្បងអ្វីនៅឡើយទេ។ បើតាមអ្នកជំនាញមួយចំនួន កូរ៉េខាងជើង អាចសាកល្បងម៉ាស៊ីនបាញ់គ្រាប់រ៉ុក្កែត។ ប្រសិនជាម៉ាស៊ីននោះមែន វានឹងកាន់តែគ្រោះថ្នាក់ ព្រោះវាអាចនឹងបាញ់បង្ហោះមីស៊ីលបាលីស្ទិកអន្តរទ្វីបកាន់តែឆ្ងាយជាងមុន។
សូមបញ្ជាក់ថា មួយរយៈចុងក្រោយនេះ កូរ៉េខាងជើង និងអាមេរិក មានការឆ្លើយឆ្លងពាក្យសម្តីឌឺដង ព្រមានដាក់គ្នាយ៉ាងខ្លាំង ខណៈពេលឱសាទរបស់កូរ៉េខាងជើង ដែលទាមទារអាមេរិកផ្លាស់ប្តូររបៀបវារៈចេញ ជិតដល់ថ្ងៃកំណត់។ ចំណែកនៅឯអង្គការសហប្រជាជាតិឯណោះវិញ ក្រុមប្រឹក្សាសន្តិសុខ នឹងបើកកិច្ចប្រជុំក្នុងសប្តាហ៍នេះ ដើម្បីជជែកគ្នាពីបញ្ហាកូរ៉េខាងជើង បន្ទាប់ពីទីក្រុងព្យុងយ៉ាង ប្រកាសពីការទទួលជោគជ័យយ៉ាងធំធេងក្នុងមជ្ឈមណ្ឌលបាញ់បង្ហោះផ្កាយរណប Sohae ក្នុងទីតាំងសាកល្បងអាវុធ Tongchang-ri៕
Tag:
កូរ៉េខាងជើង
អាមេរិក
© រក្សាសិទ្ធិដោយ thmeythmey.com
