កីឡាជាតិ
ជាតិ
ស៊ីហ្គេម៖ U22 កម្ពុជាដណ្តើមមេដាយសំរឹទ្ធជាមួយមីយ៉ាន់ម៉ានៅម៉ោង៣រសៀលនេះ
ខ្សែបម្រើស៊ិន កក្កដា (ខៀវ) របស់កម្ពុជា ប្រជែងយកបាល់ជាមួយខ្សែការពារមីយ៉ាន់ម៉ា SOE AUNG WUNN នាការប្រកួតក្នុងពូល A កន្លងមក ដែលមីយ៉ាន់ម៉ាឈ្នះ ២-១។ រូបថត FFC
×![]()
ក្រុមកីឡាករបាល់ទាត់ជម្រើសជាតិអាយុក្រោម២២ឆ្នាំកម្ពុជា ត្រូវប្រជែងជាមួយមីយ៉ាន់ម៉ា ដើម្បីដណ្តើមចំណាត់ថ្នាក់លេខ៣ក្នុងព្រឹត្តិការណ៍កីឡាស៊ីហ្គេមនៅហ្វីលីពីន វេលាម៉ោង៣រសៀល(ម៉ោងនៅកម្ពុជា)ថ្ងៃទី១០ ធ្នូ នេះ។ ចំណែកក្រុមវៀតណាមប្រជែងដណ្តើមជើងឯកជាមួយឥណ្ឌូណេស៊ី វេលាម៉ោង៧យប់។ ការប្រកួតទាំងពីររៀបចំនៅកីឡដ្ឋាន Rizal Memorial Stadium ដូចគ្នា។
ក្រោយបរាជ័យក្រោមថ្វីជើងវៀតណាម ៤-០ នៅវគ្គពាក់កណ្តាលផ្តាច់ព្រ័ត្រ ក្រុមគោព្រៃជំទង់កម្ពុជាក្រោមការដឹកនាំរបស់លោក Felix Dalmas ត្រូវប៉ះជាមួយមីយ៉ាន់ម៉ា ដែលចាញ់ឥណ្ឌូណេស៊ី ៤-២ ដើម្បីដណ្តើមមេដាយសំរឹទ្ធប្រចាំព្រឹត្តិការណ៍ស៊ីហ្គេមនៅហ្វីលីពីន។ ក្រុមទាំងពីរធ្លាប់គ្នាម្តងរួចមកហើយក្នុងវគ្គជម្រុះពូល A ដោយមីយ៉ាន់ម៉ាយកឈ្នះកម្ពុជាក្នុងលទ្ធផល ២-១។
ក្នុងសន្និសីទសារព័ត៌មានក្រោយចាញ់មីយ៉ាន់ម៉ា ២-១ លោក Felix Dalmas គ្រូបង្វឹកក្រុម U22 កម្ពុជារំពឹងជួបមីយ៉ាន់ម៉ាម្តងទៀតនៅវគ្គផ្តាច់ព្រ័ត្រ។ ដូច្នេះការជួបគ្នាលើកនេះ វាជាឱកាសសងសឹកសម្រាប់កម្ពុជា ហើយវាក៏ជាអ្វីដែលលោក Felix ប៉ងផងដែរ គ្រាន់តែខុសវគ្គប៉ុណ្ណោះ។
ដោយឡែកក្នុងវគ្គជម្រុះពូល B ក្រុម U22 វៀតណាមបានយកឈ្នះឥណ្ឌូណេស៊ីក្នុងលទ្ធផល ២-១ ផងដែរ។ បើតាមលទ្ធផលនេះវៀតណាមអាចមានភាគរយខ្ពស់ក្នុងការគ្រងជើងឯកប្រចាំព្រឹត្តិការណ៍នេះ។ តែយ៉ាងណា យើងត្រូវរង់ចាំអ៊ុតមើលលទ្ធផលចប់ការប្រកួត៩០នាទីសិន ព្រោះបាល់ទាត់អ្វីៗក៏អាចកើតមានដែរ៕
Tag:
បាល់ទាត់
U22 កម្ពុជា
SEA Games
© រក្សាសិទ្ធិដោយ thmeythmey.com
