ជាតិ
២៥ខេត្ត/រាជធានី
សារព័ត៌មានថ្មីៗ ចូលរួមកាត់បន្ថយប្លាស្ទិកនៅកន្លែងធ្វើការ
× ភ្នំពេញ៖ សំរាមនៅកម្ពុជា បានកើនឡើងប្រមាណ១០ភាគរយ ក្នុងមួយឆ្នាំ ហើយនៅក្នុងឆ្នាំ២០១៩នេះ សំរាមនៅកម្ពុជាមានទំហំ៤លានតោន ដែល២០ភាគរយគឺជាសំណល់ប្លាស្ទិក។ នេះបើតាមការបញ្ជាក់របស់អ្នកនាំពាក្យក្រសួងបរិស្ថាន លោក នេត្រ ភក្ត្រា។ សព្វថ្ងៃ សំណល់ប្លាស្ទិក គឺជាក្តីកង្វល់រួមរបស់ពិភពលោក។ សារព័ត៌មានថ្មីៗ បានប្រកាសការប្តេជ្ញាចិត្តចូលរួមចំណែកក្នុងការកាត់បន្ថយការប្រើប្រាស់ប្លាស្ទិកនៅកន្លែងធ្វើការផងដែរ។
សូមអញ្ជើញទស្សនាវីដេអូខាងក្រោមដូចតទៅ៖
លោក ធៀន ភារិន្ទ សហការីនៃសារព័ត៌មានថ្មីៗផ្នែកអន្តរជាតិបានលើកឡើងថា៖ «ប្លាស្ទិកមានអាយុកាលរាប់រយឆ្នាំ និងបង្កផលប៉ះពាល់យ៉ាងខ្លាំងដល់បរិស្ថាន»។ សហការីផ្នែកអន្តរជាតិរូបនេះ បន្តថា កន្លងមកលោកបានបកប្រែព័ត៌មានអន្តរជាតិទាក់ទងនឹងបច្ច័យអាក្រក់នៃថង់ប្លាស្ទិកចំពោះបរិស្ថាន។ នៅពេលសារព័ត៌មានថ្មីៗប្រកាសកាត់បន្ថយការប្រើប្រាស់ប្លាស្ទិកនៅកន្លែងធ្វើការ លោកធារិន បានស្ម័គ្រចិត្តចូលរួមក្នុងយុទ្ធនាការនេះដោយមិនរារែកឡើយ ដោយលោកបានទិញបំពង់ទឹកអាលុយមីញ៉ូមមកប្រើជាប្រចាំវិញ។
មិនខុសពីលោកភារិន្ទនោះទេ កញ្ញា សុខអេង សហការីនៃសារព័ត៌មានថ្មីៗមួយរូបទៀត បានប្រើប្រាស់កែវទឹកជំនួសការប្រើប្រាស់កែវប្លាស្ទិក និងបានសម្រេចចិត្តទៅបរិភោគអាហារនៅកន្លែងលក់ផ្ទាល់ ជំនួសការវិចខ្ចប់ដោយថង់ប្លាស្ទិក ដែលកញ្ញាតែងបានធ្វើក្នុងពេលកន្លងមក។
លោកសំណាង រ៉ាហ្វីឌីន សហការីផ្នែកទីផ្សារនៃសារព័ត៌មានថ្មីៗ បានឲ្យដឹងថា បញ្ហាប្លាស្ទិកជាបញ្ហាដ៏ធំរបស់ពិភពលោក។ លោក រ៉ាហ្វីឌីន ប្តេជ្ញាមិនប្រើប្រាស់ថង់ប្លាស្ទិកនៅគ្រប់ទីកន្លែង ពោលគឺមិនត្រឹមតែនៅកន្លែងធ្វើការសព្វថ្ងៃនេះប៉ុណ្ណោះទេ។
«បញ្ហាប្លាស្ទិកជារឿងសំខាន់ដែលបង្កផលប៉ពាល់យ៉ាងខ្លាំងដល់បរិស្ថាន។ សំណល់ប្លាស្ទិកមានច្រើនលើសលប់នៅកម្ពុជា»។ នេះជាការលើកឡើងរបស់លោក សែម វណ្ណា សហការីផ្នែកវីដេអូនៃសារព័ត៌មានថ្មីៗ ដោយលោកបានប្រើប្រាស់កែវទឹក ជំនួសកែវកាហ្វេប្លាស្ទិក។
កញ្ញា ញឹក ស្រីល័ក្ខ ឯណោះវិញ ក៏បានប្រើប្រាស់ប្រអប់ជ័រដែលអាចប្រើប្រាស់ឡើងវិញ ជំនួសឲ្យការប្រើប្រាស់ថង់ប្លាស្ទិកដែរ។
សហការីនៃសារព័ត៌មានថ្មីៗ បានសំណូមពរឲ្យប្រជាពលរដ្ឋចូលរួមកាត់បន្ថយការប្រើប្រាស់ប្លាស្ទិកទាំងអស់គ្នាផងដែរ ទោះជានៅកន្លែងធ្វើការ ឬនៅគេហដ្ឋាន ឬនៅកន្លែងសាធារណៈនានាដទៃទៀត៕
Tag:
ប្លាស្ទិក
សារព័ត៌មានថ្មីៗ
© រក្សាសិទ្ធិដោយ thmeythmey.com