កីឡាជាតិ
ជាតិ
សង្គមជាតិ
អ្នករៀបចំពាក់កណ្តាលម៉ារ៉ាតុន បកស្រាយករណីដបទឹកសុទ្ធរាយពពាយ លោក សែម ផល្លា ប្រធានគណៈកម្មការរៀបចំព្រឹត្តិការណ៍រត់ប្រណាំងពាក់កណ្តាល់ម៉ារ៉ាតុនអន្តរជាតិចក្រភពខ្មែរ និងដបទឹកសុទ្ធរាយពពាយ។រូបថត ហ្វេសប៊ុក
× សៀមរាប៖ ព្រឹត្តិការណ៍រត់ប្រណាំងពាក់កណ្តាលម៉ារ៉ាតុនអន្តរជាតិចក្រភពខ្មែរ ដែលមានអ្នកចូលរួមជាង១,២ម៉ឺននាក់ នៅខេត្តសៀមរាប បង្កឲ្យមានការរិះគន់ថា ព្រឹត្តិការណ៍នេះ បានបន្សល់សំរាម ពិសេសសំបកទឹកសុទ្ធ ដែលធ្វើឱ្យប៉ះពាល់ដល់បរិស្ថាន។ ប៉ុន្តែ ជាទូទៅកីឡាកររត់ប្រណាំងម្នាក់ ដើម្បីឱ្យខ្លួនឆាប់ដល់ទីក្នុងល្បឿនមួយដ៏ខ្លី មិនអាចដើររកធុងសំរាម សម្រាប់ដាក់សំរាមបានទេ។ លោក សែម ផល្លា ប្រធានគណៈកម្មការរៀបចំព្រឹត្តិការណ៍រត់ប្រណាំងពាក់កណ្តាល់ម៉ារ៉ាតុនអន្តរជាតិចក្រភពខ្មែរ បានលើកឡើងថា ថ្វីដ្បិតក្រុមការងារពិបាកបញ្ជាអ្នករត់កុំឱ្យចោលសំរាមតាមផ្លូវ ប៉ុន្តែក្រុមការងារ ក្រោយចប់កម្មវិធីនេះភ្លាមបានចុះប្រមូលសំរាមភ្លាមៗផងដែរ។
លោក សែម ផល្លា បានបន្តប្រាប់សារព័ត៌មានថ្មីៗ តាមទូរសព្ទ នាព្រឹកថ្ងៃទី៩ធ្នូ ថា កីឡាកររត់ម៉ារ៉ាតុនម្នាក់ៗ ក្រោយផឹកទឹក និងស្រោចនៅលើក្បាល ដែលទទួលបានពីស្ថានីយ៍ទឹកនីមួយៗនៅតាមផ្លូវរត់ គឺតែងតែបោះចោលសំបកដកទឹកសុទ្ធទាំងនោះភ្លាមៗ ដើម្បីបន្ថែមល្បឿនឆ្ពោះទៅរកគោលដៅដល់ទី។ ការបកស្រាយបែបនេះ ធ្វើឡើងក្រោយមានមតិមួយចំនួនរិះគន់ពាក់ព័ន្ធបញ្ហាសំបកដបទឹកសុទ្ធ ដែលបន្សល់ក្រោយចប់ការប្រណាំងពាក់កណ្តាលម៉ារ៉ាតុនអន្តរជាតិចក្រភពខ្មែរកាលពីថ្ងៃទី៨ ធ្នូ។
សម្រាប់កីឡាកររត់ប្រណាំង គឺផ្តោតសំខាន់លើពេលវេលា ទោះព្រឹត្តិការណ៍នោះធ្វើឡើងក្នុងគោលបំណងអ្វីក៏ដោយ ព្រោះពួកគេចង់រក្សា ឬបំបែកកំណត់ត្រាចាស់របស់ពួកគេ ពិសេសចង់ទទួលបានជ័យជម្នះពីក្នុងការប្រកួត។ កត្តានេះជាមូលហេតុ ដែលពួកគេ ត្រូវបង្ខំចិត្តបោះសំបកដបទឹកសុទ្ធចោលនៅតាមដងផ្លូវ ក្រោយបរិភោគ ឬស្រោចលើដងខ្លួនរួច។ នេះបើតាមការបន្ថែមរបស់លោក សែម ផល្លា ដែលអះអាងបញ្ហានេះមិនមែនកើតមាននៅតែកម្ពុជានោះទេ សូម្បីប្រទេសធំៗលើពិភពលោក ក៏ជួបបញ្ហានេះដែរ។
សម្រាប់បញ្ហាសំបកដបទឹកសុទ្ធនៅកម្ពុជា លោក សែម ផល្លា បាននិយាយដូច្នេះថា៖«ពេលចប់ព្រឹត្តិការណ៍ម៉ារ៉ាតុនភ្លាម ក្រុមការងារដែលយើងត្រៀមទុកនោះ នឹងចុះប្រមូល និងបោសសម្អាត សំរាម ក៏ដូចជាសំបកដបទឹកសុទ្ធទាំងនោះចេញពីផ្លូវឱ្យអស់ ភ្លាមផងដែរ។ យើងមិនមែនទុកសំរាមទាំងនោះ រាប់ថ្ងៃ...រាប់ខែចោល ដោយគ្មានការរៀបចំ និងប្រមូលចេញនោះទេ ហើយក៏មិនមែនទុកសំរាមទាំងនោះ ឱ្យបំផ្លាញបរិស្ថាន ផងដែរ»។
លោកបានបន្តទៀតថា ការរៀបចំព្រឹត្តិការណ៍ប្រកួតម៉ារ៉ាតុន ពិសេសនៅក្នុងតំបន់ទេសចរណ៍ ក្រុមការងារពាក់ព័ន្ធ តែងតែគិតទៅដល់បញ្ហាសំរាមនានា ហើយក្រុមការងារបានរៀបចំធុងសំរាម នៅតាមផ្លូវរត់ម៉ារ៉ាតុនទាំងនោះ និងស្នើដល់អ្នកប្រចាំការនៅស្ថានីយ៍ផ្តល់ទឹកនីមួយៗ ជួយរើសសំរាម ឬសំបកកំប៉ុង និងសំបកដបទឹកនានា ទាំងនោះនៅតាមកន្លែងរៀងៗ ពិសេសនៅលើផ្លូវរត់តែម្តង ដើម្បីកុំឱ្យជាន់រដួល ក៏ដូចដើម្បីសម្រួលដល់ការសម្អាតក្រោយចប់កម្មវិធីនេះ ផងដែរ។
«បើឲ្យប្រមូលភ្លាមៗគឺពិបាកណាស់ ពីព្រោះគេរត់ពេញនឹង ប្រមូលមួយគេបោះមួយ យើងមិនមានកម្លាំងគ្រប់គ្រាន់នោះទេ។ បើចង់ប្រមូលភ្លាមៗយើងត្រូវការកម្លាំងយ៉ាងតិច៥ពាន់នាក់ ដោយសារយើងត្រូវពង្រាយពី៣ទៅ៤ម៉ែត្រម្នាក់តាមដងផ្លូវ ដែលត្រូវរត់រហូត»។ នេះជាការលើកឡើងរបស់លោក សែម ផល្លា ប្រធានគណៈកម្មការរៀបចំព្រឹត្តិការណ៍រត់ប្រណាំងពាក់កណ្តាលម៉ារ៉ាតុនអន្តរជាតិចក្រភពខ្មែរ។
ពាក់ព័ន្ធបញ្ហារឿងសំរាមនេះដែរ លោក ថោង ខុន រដ្ឋមន្ត្រីក្រសួងទេសចរណ៍ទទួលស្គាល់ថា នៅមានបញ្ហាខ្វះខាតមួយចំនួន ដែលត្រូវដោះស្រាយ។ តែយ៉ាងណា លោក សង្កេតឃើញថា អត្តពលិកជាតិនិងអន្តរជាតិមានការយល់ដឹងកាន់តែច្រើនពាក់ព័ន្ធបញ្ហានេះ។
«ឆ្នាំនេះ បញ្ហាបរិស្ថានខ្ញុំកត់សម្គាល់ឃើញថា មានភាពល្អប្រសើរជាងមុន គឺបងប្អូនគាត់យកចិត្តទុកដាក់ចូលរួមណាស់ នៅមានចំណុចខ្វះខាតតិចតួច ប៉ុន្តែយើងសង្កេតឃើញថា ពីមួយឆ្នាំទៅមួយឆ្នាំមានអ្នកចូលរួមកើនឡើង និងមានការយល់ដឹងច្រើន»។ នេះជាការលើកឡើងរបស់លោក ថោង ខុន។
រដ្ឋមន្ត្រីក្រសួងទេសចរណ៍រូបនេះ បានវាយតម្លៃខ្ពស់ចំពោះព្រឹត្តិការណ៍ខាងលើថា បានប្រព្រឹត្តទៅដោយរលូន និងប្រកបដោយភាពសប្បាយរីករាយ។ ជាពិសេសអ្នករត់ទាំងនោះ រត់ដោយស្នាមញញឹម និងប្រកបដោយការអធ្យាស្រ័យ។ ប្រធានគណៈកម្មាធិការជាតិអូឡាំពិកកម្ពុជារូបនេះ រំពឹងថា នៅឆ្នាំក្រោយព្រឹត្តិការណ៍រត់ប្រណាំងពាក់កណ្តាលម៉ារ៉ាតុនអន្តរជាតិចក្រភពខ្មែរ នឹងអាចរក្សាកំណើតភ្ញៀវទេសចរជាតិ និងអន្តរជាតិដូចឆ្នាំនេះ។
អត្តពលិកជាតិ និងអន្តរជាតិចំនួន១២,១៧៥នាក់បានចូលរួមរត់ប្រណាំងក្នុងព្រឹត្តិការណ៍ពាក់កណ្តាលម៉ារ៉ាតុនអន្តរជាតិ ដែលធ្វើឡើងដើម្បីស្វែងរកជំនួយសម្បុរសធម៌នៅឆ្នាំនេះ។ ចំនួននេះមានការកើនឡើងប្រមាណ២០ភាគរយបើធៀបនឹងឆ្នាំមុន មានអ្នកចូលរួមត្រឹមតែ១០,៥០០នាក់។ ក្រៅពីស្វែងរកថវិកាជួយមន្ទីរពេទ្រគន្ធបុប្ឆា, កុមារអង្គរ និងអង្គការសប្បុរសធម៌នានា ការការពារបរិស្ថាន ការទាក់ទាញភ្ញៀវទេសចរឲ្យមកកម្សាន្តនៅរមណីយដ្ឋានប្រវត្តិសាស្ត្រអង្គរ ក៏ស្ថិតក្នុងគោលបំណងនៃព្រឹត្តិការណ៍នេះដែរ៕
Tag:
ពាក់កណ្តាលម៉ារ៉ាតុនអន្តរជាតិ
សៀមរាប
© រក្សាសិទ្ធិដោយ thmeythmey.com