សហព័ន្ធកីឡាបាល់ទាត់អន្តរជាតិ (FIFA) បានទាក់ទងជាមួយទីភ្នាក់ងារ ប្រឆាំងការប្រើសារធាតុញៀនពិភពលោក (WADA) ដើម្បីបញ្ជាក់ឲ្យច្បាស់ពីរបៀបដែលស្ថាប័ននេះ ហាមរុស្ស៊ីមិនឲ្យចូលរួមព្រឹត្តិការណ៍កីឡាលំដាប់ពិភពលោក ជាពិសេសកីឡាបាល់ទាត់។ FIFA បង្ហាញបំណងចង់ឲ្យ WADA កុំដាក់ពិន័យរុស្ស៊ីលើក្រុមកីឡាបាល់ទាត់។
រុស្ស៊ីត្រូវបានហាមឃាត់មិនឲ្យចូលរួមព្រឹត្តិការណ៍កីឡាអន្តរជាតិធំៗរយៈពេល៤ឆ្នាំ បន្ទាប់ពី WADA រកឃើញថា ទីភ្នាក់ងារប្រឆាំងសារធាតុញៀនរុស្ស៊ី (RUSADA) បានបន្លំទិន្នន័យក្នុងមន្ទីរពិសោធន៍ដែលធ្វើឲ្យឯកសារស៊ើបអង្កេតមិនស៊ីចង្វាក់គ្នាជុំវិញការប្រើប្រាស់សារធាតុប៉ូវកំលាំងខុសច្បាប់នេះ។ RUSADA មានរយៈពេល ២១ ថ្ងៃដើម្បីប្តឹងឧទ្ធរណ៍លើករណីនេះ មុនបញ្ជូនទៅតុលាការអាជ្ញាកណ្តាលកីឡា។
ការហាមនេះ នឹងធ្វើឲ្យអត្តពលិករុស្ស៊ីមិនអាចប្រកួតប្រជែងនៅក្រោមទង់ជាតិរុស្ស៊ីនាព្រឹត្តិការណ៍អូឡាំពិកឆ្នាំ២០២០ នៅតូក្យូ ឬកីឡាអូឡាំពិករដូវរងាឆ្នាំ២០២២ ឡើយ ខណៈដែលវត្តមានរបស់ក្រុមកីឡាបាល់ទាត់រុស្ស៊ី ក្នុងពានរង្វាន់កីឡាបាល់ទាត់ពិភពលោក FIFA World Cup ឆ្នាំ២០២២ នៅកាតា ក៏ស្ថិតក្នុងគ្រោះថ្នាក់ផងដែរ។
យ៉ាងណាក៏ដោយ សហព័ន្ធកីឡាបាល់ទាត់រុស្ស៊ី (RFU) សង្ឃឹមថា ផ្នែកកីឡាបាល់ទាត់នឹងមិនរងផលប៉ះពាល់អ្វីនោះទេ ស្របពេលប្រទេសនេះកំពុងរង់ចាំស្តាប់ដំណឹងពី FIFA។
មកទល់ពេលនេះ FIFA នៅមិនទាន់បង្ហាញជំហររបស់ខ្លួនណាមួយជុំវិញការដាក់ពិន័យលើអត្តពលិករុស្ស៊ីនៅឡើយទេ ប៉ុន្តែស្ថាប័នគ្រប់គ្រងកីឡាបាល់ទាត់មួនេះនេះ បញ្ជាក់ប្រាប់ទូរទស្សន៍ Omnisport ថាខ្លួនកំពុងទាក់ទងជាមួយ WADA និងសហព័ន្ធកីឡាអូឡាំពិកអន្តរជាតិរដូវក្តៅ (ASOIF) ដើម្បីដោះស្រាយសម្រាប់ក្រុមជម្រើសជាតិបាល់ទាត់រុស្ស៊ី។
«FIFA បានកត់សំគាល់ពីការសម្រេចចិត្តរបស់គណៈកម្មាធិការប្រតិបត្តិ WADA នៅថ្ងៃនេះ។ FIFA កំពុងទាក់ទងជាមួយ WADA និង ASOIF ដើម្បីបញ្ជាក់ពីទំហំនៃការសម្រេចចិត្តទាក់ទងនឹងកីឡាបាល់ទាត់។ នេះជាការអះអាងរបស់អ្នកនាំពាក្យ FIFA ខណៈដែលស្ថាប័នហាកមិនចង់ឲ្យមានការដាក់ពិន័យលើក្រុមកីឡាទាត់រុស្ស៊ីនៅព្រឹត្តិការណ៍ World Cup 2020 នោះឡើយ។
លោក Jonathan Taylor ប្រធានគណៈកម្មាធិការត្រួតពិនិត្យការអនុវត្តច្បាប់ដែលបានផ្តល់យោបល់ដល់ការដាក់ទណ្ឌកម្មនេះក្នុងសន្និសីទសារព័ត៌មានថា នេះជាការ សម្រេចចិត្តដ៏សំខាន់បំផុតសម្រាប់រាល់ព្រឹត្តិការណ៍កីឡាលំដាប់ពិភពលោកដែលត្រូវហាមឃាត់។ លោកបន្ថែមថា កីឡានីមួយៗត្រូវវាយតម្លៃដោយផ្អែកលើមូលដ្ឋានខុសៗគ្នា។
«សូមឲ្យច្បាស់អំពីចំនួនកីឡាសរុបដែលស្ថិតក្នុងកញ្ចប់ពិន័យនេះ។ វាជាកញ្ចប់ពិន័យរយៈពេល៤ឆ្នាំ ហើយកីឡានីមួយៗគឺខុសគ្នា។ ដូច្នេះត្រូវសម្រេចឲ្យបានទៅតាមស្តង់ដារច្បាស់លាស់បំផុត»។ នេះជាការលើកឡើងរបស់លោក Taylor។
ប្រសិនបើរុស្ស៊ីត្រូវហាមលេង World Cup ឆ្នាំ២០២២ តាមការអនុវត្តរបស់ WADA ក៏ដោយ ប៉ុន្តែសម្រាប់ពានអឺរ៉ុប Euro2020 ក្រុមដែលដឹកនាំដោយគ្រូបង្វឹកលោក Stanislav Cherchesov នៅតែអាចចូលលេងបាន ដ្បិត UEFA មិនបានចុះបញ្ជីសម្រាប់ប្រទេសហត្ថលេខីជាមួយ WADA នោះទេ៕