អាមេរិក រកឃើញថា ឧកញ៉ា ទ្រី ភាព និង ទេសរដ្ឋមន្រ្តី គន់ គីម បានប្រព្រឹត្តអំពើពុករលួយ ហើយក៏សម្រេចដាក់ទណ្ឌកម្មលើលោកទាំងពីរ។ អ្នកនាំពាក្យការបរទេស និងអ្នកនាំពាក្យរដ្ឋាភិបាលកម្ពុជា បានប្រតិកម្មព្រមគ្នាទៅនឹងអាមេរិក។
អ្នកនាំពាក្យក្រសួងការបរទេសកម្ពុជា សម្តែងការខកចិត្ត ចំពោះអាមេរិក ដែលបានដាក់ទណ្ឌកម្មលើឧកញ៉ាទ្រី ភាព និង លោក គន់ គីម ទេសរដ្ឋមន្ត្រីទទួលបន្ទុកបេសកកម្មពិសេស និង ជាអនុប្រធានទីមួយនៃគណៈកម្មាធិការជាតិគ្រប់គ្រងគ្រោះមហន្តរាយ ដោយចោទប្រកាន់លោកទាំងពីរ ថាប្រព្រឹត្តអំពើពុករលួយ។
តាមរយៈសេចក្តីថ្លែងការណ៍ ដែលចេញនៅថ្ងៃទី១០ ខែធ្នូ ឆ្នាំ២០១៩ អ្នកនាំពាក្យការបរទេស តបនឹងអាមេរិកដូច្នេះថា៖«ទង្វើនេះ ធ្វើឲ្យមានការស្រងាកចិត្តយ៉ាងខ្លាំង នៅពេលបុគ្គលសាធារណៈរបស់ប្រទេសមួយ ត្រូវបានក្លាយទៅជាកម្មវត្ថុនៃវិធានការទណ្ឌកម្មរបស់ប្រទេសដទៃទៀត ដោយផ្អែកលើការចោទប្រកាន់គ្មានមូលដ្ឋាន និងគ្មានការគោរពទាល់តែសោះ ចំពោះឯករាជ្យនៃច្បាប់និងយុត្តិធម៌របស់ប្រទេសមួយ...»។
អ្នកនាំពាក្យការបរទេស បន្តថា ទង្វើរបស់អាមេរិក គឺជាការបំពានយ៉ាងធ្ងន់ធ្ងរ លើគោលការណ៍ស្តីពីស្មើភាពនៃអធិបតេយ្យ និងការមិនជ្រៀតជ្រែកកិច្ចការផ្ទៃក្នុងរបស់ប្រទេសដទៃ ដូចមានចែងក្នុងធម្មនុញ្ញអង្គការសហប្រជាជាតិ និងច្បាប់អន្តរជាតិផ្សេងទៀត។
លើសពីនេះ អ្នកនាំពាក្យការបរទេស បានហៅការដាក់ទណ្ឌកម្មនេះ ថាជាការវាយប្រហារប្រឆាំងនឹងកិច្ចប្រឹងប្រែងក្នុងការស្តារទំនុកចិត្តរវាងកម្ពុជានិងអាមេរិក តាមរយៈសាររបស់សម្តេចនាយករដ្ឋមន្ត្រី ហ៊ុន សែន និង លោកប្រធានាធិបតី ដូណាល់ ត្រាំ ដែលបានផ្ញើឲ្យគ្នាទៅវិញទៅមកនាពេលថ្មីៗនេះ។
ប្រតិកម្មនឹងអាមេរិកដូច្នេះរួចហើយ អ្នកនាំពាក្យការបរទេស ក៏សរសើរថា លោក គន់ គីម ត្រូវបានទទួលស្គាល់ជាសាធារណៈ ចំពោះការរួមចំណែកយ៉ាងច្រើន ក្នុងការថែរក្សាសុខសន្តិភាព ស្ថិរភាព និងសណ្តាប់ធ្នាប់សង្គម ហើយលោក ទ្រី ភាព បានដើរតួនាទីដ៏សកម្មក្នុងការជួយអភិវឌ្ឍសេដ្ឋកិច្ចកម្ពុជា។
លោក ផៃ ស៊ីផាន អ្នកនាំពាក្យរដ្ឋាភិបាលកម្ពុជា ក៏មិននៅស្ងៀមដែរ។ លោក សរសេរលើគណនីហ្វេសប៊ុកបែបនេះថា៖«ជាការភ្ញាក់ផ្អើលមួយ នៅពេល ដែលខ្ញុំទទួលបានព័ត៌មានផ្សព្វផ្សាយជាសាធារណៈពីការចោទប្រកាន់ និងការដាក់ទណ្ឌកម្ម ក្នុងលក្ខណៈឯកតោភាគីពីស្ថាប័នហិរញ្ញវត្ថុរបស់អាមេរិកមកលើប្រជាពលរដ្ឋខ្មែរ»។
ប៉ុន្តែ លោក ផៃ ស៊ីផាន យល់ថា ទំនាក់ទំនងនិងកិច្ចសហប្រតិបត្តិការរវាងកម្ពុជានិងអាមរិក មិនមានអ្វីប៉ះពាល់ឡើយ ពោលគឺ ប្រទេសទាំងពីរ នៅតែបន្តគោរពគ្នាទៅវិញទៅមក។
នៅថ្ងៃទី៩ ខែធ្នូ ឆ្នាំ២០១៩ ដែលជាទិវាអន្តរជាតិប្រឆាំងនឹងអំពើពុករលួយ ក្រសួងរតនាគារអាមេរិក បានចេញ
សេចក្តីប្រកាសព័ត៌មាន ស្តីពីការអនុវត្តច្បាប់ Global Magnitsky ក្នុងការដាក់ទណ្ឌកម្មលើលោក ទ្រី ភាព និង លោក គន់ គីម។
ក្រសួងហិរញ្ញវត្ថុអាមេរិក រកឃើញថា លោក ទ្រី ភាព និង លោក គន់ គីម បានពាក់ព័ន្ធនឹងអំពើពុករលួយដូចគ្នា ដូចជា ការកេងបន្លំយកទ្រព្យសម្បត្តិរដ្ឋ និង ការដកហូតយកទ្រព្យសម្បត្តិឯនជន ធ្វើជាប្រយោជន៍ផ្ទាល់ខ្លួន។ ក្រសួងហិរញ្ញវត្ថុអាមេរិក បន្តថា លោកទាំងពីរ ក៏បានប្រព្រឹត្តអំពើពុករលួយផ្សេងទៀតដែរ ដូចជា ការចុះកិច្ចសន្យាជាមួយរដ្ឋាភិបាល ក្នុងការទាញយកធនធានធម្មជាតិ និង ការស៊ីសំណូកសូកប៉ាន់។
ក្រៅពីនេះ ក្រសួងរតនាគារអាមេរិក នៅរកឃើញថា លោកទាំងពីរ បានប្រព្រឹត្តអំពើពុករលួយផ្សេងពីគ្នាទៀត។
ចំពោះលោក ទ្រី ភាព ត្រូវក្រសួងរតនាគារអាមេរិក ចោទថា បានបង្កើតបណ្តាញកាប់ឈើខុច្បាប់យ៉ាងធំធេង ដោយមានបង្អែកពីមន្ត្រីរដ្ឋាភិបាល។ ក្រសួងរតនាគារអាមេរិក អះអាងថា លោក ទ្រី ភាព ទទួលបានការការពារផ្នែកយោធា ហើយ លោក បានប្រើប្រាស់កម្លាំងយោធានោះ ដើម្បីបង្កលក្ខណៈងាយស្រួលដល់សកម្មភាពនាំឈើចេញទៅវៀតណាម ចិន អឺរ៉ុប និង រុស្សី។
ក្រសួងរតនាគារអាមេរិក សរសេរក្នុងសេចក្តីប្រកាសព័ត៌មានដូច្នេះថា៖«ការទទួលបានការគាំទ្រពីមន្ត្រីរដ្ឋាភិបាលនេះ ធ្វើឲ្យអាជ្ញាធរ ពិបាកក្នុងការចាត់វិធានការផ្លូវច្បាប់លើលោក ទ្រី ភាព។ ឧទាហរណ៍ ដូចជាករណីដែលលោក ទ្រី ភាព បានឲ្យលុយដល់មន្ត្រីឧទ្យានជាតិ ដើម្បីឲ្យរក្សាការសម្ងាត់ កុំឲ្យសហគមន៍អន្តរជាតិដឹងឮពីអំពើរបស់លោក»។
ចំណែក លោក គន់ គីម ត្រូវបានក្រសួងរតនាគារអាមេរិក ចោទថា ទទួលបានលុយជាច្រើនពីអង្គភាពរដ្ឋមួយរបស់ចិន។ ក្រសួងរតនាគារអាមេរិក លាតត្រដាងថា លោក គន់ គីម ដែលធ្លាប់ជានាយសេនាធិការចម្រុះនៃកងយោធពលខេមរភូមិន្ទ បានប្រើប្រាស់កម្លាំងយោធា ដើម្បីបំភិតបំភ័យ និងរុះរើ (ផ្ទះសម្បែង) ហើយយកដីធ្លីរបស់ប្រជាពលរដ្ឋ ទៅឲ្យអង្គភាពរដ្ឋរបស់ចិន ដែលមានទំនាក់ទំនងជាមួយលោក។
ក្នុងសេចក្តីប្រកាសព័ត៌មាន ក្រសួងរតនាគារអាមេរិក រិះគន់បែបនេះថា៖«ឥស្សរជនកម្ពុជា ដូចលោក គន់ គីម ជាដើម បានប្រើប្រាស់បណ្តាញជាគ្រួសាររបស់ពួកគេ បង្កើតជារចនាសម្ព័ន្ធស្រមោល ដើម្បីការពារទ្រព្យសម្បត្តិរបស់ពួកគេ ដែលបានមកដោយអំពើទុច្ចរិត»។
ក្រសួងរតនាគារអាមេរិក ចាត់ទុកអំពើពុករលួយបែបនេះ ថាអាចបង្កមហន្តរាយដល់ចក្ខុវិស័យរបស់ឥណ្ឌូ-ប៉ាស៊ីហ្វិក ដែលមានលក្ខណៈសេរីនិងបែកចំហ ដូច្នេះ អាមេរិក ត្រូវចែករំលែកព័ត៌មាននេះ ដល់ប្រទេសក្នុងតំបន់អាស៊ាន និង ដៃគូផ្សេងទៀត នៅឥណ្ឌូ-ប៉ាស៊ីហ្វិក»។
ក្រសួងរតនាគារអាមេរិក គ្រាន់តែប្រើពាក្យថា ដាក់ទណ្ឌកម្មលើលោក ទ្រី ភាព និង លោក គន់ គីម តែពុំបានបញ្ជាក់ឲ្យច្បាស់ឡើយថា ការទណ្ឌកម្មលើអ្វីខ្លះ។ យ៉ាងណា Global Magnitsky គឺជាច្បាប់មួយប្រភេទ ដែលអាមេរិក យកមកប្រើប្រាស់ ដើម្បីដាក់ទណ្ឌកម្មលើមន្ត្រីនៃប្រទេសដទៃ ដែលប្រព្រឹត្តអំពើពុករលួយ។ ទណ្ឌកម្មទាំងនោះ មានដូចជា ការបង្កកទ្រព្យសម្បត្តិ និងការមិនផ្តល់ទិដ្ឋាការឲ្យចូលទឹកដីអាមេរិក ជាដើម។
សារព័ត៌មានថ្មីៗ មិនអាចទាក់ទងលោក ទ្រី ភាព ដើម្បីសុំការឆ្លើយតបឡើយ ឯលោក គន់ គីម ហៅទូរស័ព្ទចូលដែរ តែលោក មិនបានលើក។
មិនមែនជាលើកទីមួយទេ កន្លងមក អាមេរិក បានដាក់ទណ្ឌកម្មលើមន្រ្តីនិងឧកញ៉ាកម្ពុជាមួយចំនួនរួចហើយ ដោយចោទថា អ្នកទាំងនោះ បានរំលោភសិទ្ធិមនុស្សយ៉ាងធ្ងន់ធ្ងរ។ ទណ្ឌកម្មដែលដាក់នោះ គឺបង្កកទ្រព្យរបស់ពួកគេ ដែលផ្ញើនៅអាមេរិក និង មិនឲ្យពួកគេជាន់ទឹកដីអាមេរិក៕