កីឡាអន្តរជាតិ
អន្តរជាតិ
Herrera អតីតខ្សែបម្រើ Man Utd ជាប់បទចោទកំណត់លទ្ធផលទុកមុន
× Ander Herrera អតីតខ្សែបម្រើ Manchester United ជាកីឡាករម្នាក់ក្នុងចំណោមកីឡាករ ៣៦ នាក់ផ្សេងទៀតដែលតុលាការអេស្ប៉ាញត្រូវជម្រះក្តីជុំវិញបទចោទពុករលួយដោយការកំណត់លទ្ធផលការប្រកួតទុកមុន។
Herrera សញ្ជាតិអេស្ប៉ាញ វ័យ៣០ឆ្នាំ ដែលសព្វថ្ងៃកំពុងប្រកបអាជីពជាមួយក្រុម Paris Saint-Germain រួមជាមួយលោក Javier Aguirre គ្រូបង្វឹកក្រុម Leganes និងកីឡាករ Gabi អតីតប្រធានក្រុម Atletico Madrid ត្រូវបានស៊ើបអង្កេតលើការសង្ស័យនៃការកំណត់លទ្ធផលទុកមុននាជំនួបរវាងក្រុម Levante និង Real Zaragoza ក្នុងក្របខណ្ឌ LaLiga កាលពីរដូវកាល ២០១០-២០១១។ Herrera ជាកីឡាករឈុតធំរបស់ Zaragoza ចន្លោះឆ្នាំ២០០៩ ដល់ឆ្នាំ២០១១ ហើយរូបគេក៏ពាក់ព័ន្ធករណីនោះដែរ។
កាលនោះ Zaragoza បានឈ្នះការប្រកួតដ៏សំខាន់នេះដើម្បីរក្សាកៅអីលេងក្នុងលីគលំដាប់កំពូលអេស្ប៉ាញបន្តទៀត ប៉ុន្តែពួកគេត្រូវបានចោទប្រកាន់ថាបានបង់ប្រាក់ឲ្យកីឡាកររបស់ Levante ចំនួន ៩៦៥,០០០ អឺរ៉ូ (១០៦០០០០ដុល្លារអាមេរិក) ដើម្បីធ្វីចាញ់ការប្រកួតនេះ។
ជុំវិញករណីនេះ មានអ្នកពាក់ព័ន្ធផ្សេងទៀតចំនួន៤១នាក់ ហើយពួកគេត្រូវចូលរួមការជំនុំជម្រះពីការចោទប្រកាន់ពីសំណាក់តុលាការ Valencian ផងដែរ។ យ៉ាងណាក៏ដោយតុលាការបានដោះលែងពួកគេវិញ ដោយអះអាងថានៅមានការខ្វះភ័ស្តុតាងនៅឡើយ ទោះបីអតីតមន្ត្រី Zaragoza ពីរនាក់ត្រូវបានផ្តន្ទាទោសពីបទកំណត់ទល្ធផលនេះហើយក៏ដោយ។
អតីតប្រធានក្លិប Zaragoza លោក Agapito Iglesias និងជាអតីតនាយកហិរញ្ញវត្ថុលោក Javier Porquera ក៏ត្រូវបានរកឃើញថាមានកំហុសពីការប្រើប្រាស់ទឹកប្រាក់ជាង ១,៨៨លាដុល្លារពីគណនីរបស់ក្លិបនេះ ដើម្បីទូទាត់ប្រាក់ក្រោយចប់រដូវកាលនោះ។
អ្នកទាំងពីរត្រូវកាត់ទោសឲ្យជាប់ពន្ធនាគាររយៈពេល១៥ខែ ទោះបីច្បាប់នៅអេស្ប៉ាញមានការព្យួរទោសចំពោះអ្នកមានកំហុសណាមួយជាលើកដំបូងក៏ដោយ៕
Tag:
Ander Herrera
កំណត់លទ្ធផលទុកមុន
© រក្សាសិទ្ធិដោយ thmeythmey.com