អន្តរជាតិ
នាយករដ្ឋមន្ត្រីចាស់ជាងគេផ្ដាំនាយករដ្ឋមន្ត្រីក្មេងជាងគេ៖ កុំភ្លេចសួរយោបល់មនុស្សចាស់
× នាយករដ្ឋមន្ត្រីម៉ាឡេស៊ី មហាធៀ មហាម៉ាត់ ដែលជាប្រមុខរដ្ឋាភិបាលចាស់ជាងគេលើពិភពលោកនៅថ្ងៃទី១០ ខែធ្នូ បានផ្ដល់យោបល់ឲ្យអ្នកស្រី សាន់ណា ម៉ារីន (Sanna Marin) នាយករដ្ឋមន្ត្រីថ្មីរបស់ហ្វាំងឡង់ឲ្យរៀនពីបទពិសោធមនុស្សចាស់។ បច្ចុប្បន្ន អ្នកស្រី ម៉ារីន ជាប់ឈ្មោះជានាយករដ្ឋមន្ត្រីវ័យក្មេងជាងគេរបស់ពិភពលោក។
ក្នុងវ័យ៣៤ឆ្នាំ អ្នកស្រី សាន់ណា ម៉ារីន ត្រូវបានជ្រើសរើសឲ្យដឹកនាំហ្វាំងឡង់ទាំងវ័យក្មេង ជានាយករដ្ឋមន្ត្រីស្ត្រីទីបីរបស់ប្រទេស និងជាប្រមុខរដ្ឋាភិបាលក្មេងជាងគេលើលោកផងដែរ។ អ្នកស្រី ម៉ារីន បានស្បថចូលកាន់តំណែងនាយករដ្ឋមន្ត្រីហ្វាំងឡង់ជំនួសលោក Antti Rinne ដែលបាត់បង់ទំនុកចិត្តពីបក្សក្នុងសម្ព័ន្ធភាពកាន់អំណាច។
ពីទីក្រុងគួឡាឡាំពួ លោក មហាធៀ មហាម៉ាត់ ដែលជានាយករដ្ឋមន្ត្រីចាស់ជាងគេលើលោក ក៏បានផ្ដល់មតិខ្លះសម្រាប់អ្នកនយោបាយជំនាន់ក្រោយវ័យក្មេងដូចអ្នកស្រី ម៉ារីន ។ ក្នុងកិច្ចសម្ភាសជាមួយទីភ្នាក់ងារព័ត៌មាន Reuters លោក មហាធៀ ដែលមានវ័យ៩៤ឆ្នាំនិយាយថា ខណៈយើងជឿជាក់លើឧត្តមគតិរបស់មនុស្សវ័យក្មេង វាក៏ជារឿងសំខាន់សម្រាប់ពួកគេក្នុងការពិចារណាពីបទពិសោធរបស់មនុស្សចាស់។
«បន្ទាប់មក នឹងមានគំនិតពីរបញ្ចូលគ្នា ហើយនោះជារឿងល្អ។» នេះជាការបញ្ជាក់របស់លោក មហាធៀ ដែលកំពុងដឹកនាំម៉ាឡេស៊ីលើកទីពីរក្រោយដឹកនាំប្រទេសអាស៊ីអាគ្នេយ៍មួយនេះលើកដំបូងរយៈពេល២៣ឆ្នាំពីឆ្នាំ១៩៨០ ដល់ឆ្នាំ២០០៣ ។
បើទោះជាមានវ័យក្មេងក្ដី បទពិសោធផ្នែកនយោបាយរបស់អ្នកស្រី ម៉ារីន ក៏មិនខ្ចីដែរ។ អាជីពនយោបាយរបស់អ្នកស្រី បានរះត្រដែតបន្ទាប់ពីជាប់ឆ្នោតជាប្រធានក្រុមប្រឹក្សាទីក្រុងឧស្សាហកម្ម Tampere នៅវ័យត្រឹម២៧ឆ្នាំ។ បន្តបន្ទាប់មក អ្នកស្រី ក៏ជាប់ឆ្នោតជាតំណាងរាស្ត្រ និងក្លាយជារដ្ឋមន្ត្រីដឹកជញ្ជូន និងគមនាគមន៍នៅខែមិថុនា ឆ្នាំ២០១៩ មុននឹងត្រូវជ្រើសរើសជាប្រមុខរដ្ឋាភិបាលហ្វាំងឡង់វ័យក្មេងបំផុត៕
Tag:
ម៉ាឡេស៊ី
ហ្វាំងឡង់
មហាធៀ មហាម៉ាត់
សាន់ណា ម៉ារីន
© រក្សាសិទ្ធិដោយ thmeythmey.com